ކަނޑު އޮތްގިރި ކައިރީ ޖަހާފައިވާ ފަރު ބައްތި ކައިރިއަށް، ރޭ ލޯންޗެއް އަރައިފިއެވެ.
އެމްއެންޑީއެފުން ބުނީ ފަރަށް އެރީ "މުނިޔާ 2" ނަމަކަށްކިޔާ ލޯންޗެއް ކަމަށެވެ. މިހާދިސާގެ މަޢުލޫމާތު ރޭ 23:08 ހާއިރު އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބުމާއެކު ހާބަރ ކްރާފްޓް ލޯންޗެއްވަނީ ޑައިވަރުންނާއެކު ހަރަކާތްތެރިވާން ފަށާފައެވެ.
މި ހާދިސާގައި ލޯންޗުގައި ތިބި މީހުންގެ ތެރެއިން ފަޅުވެރިން ފިޔަވާ އެހެން މީހުން އެމްއެންޑީއެފް ކޯސްޓްގާޑުގެ ހާބަރ ކްރާފްޓް ލޯންޗުގައި ހިންމަފުއްޓަށް ވަނީ ގެންގޮސްދީފައެވެ. އަދި މި ލޯންޗު ފުން ކުރުމަށްޓަކައި ލޯންޗުގެ ވެރިފަރާތުން މިހާރުވަނީ ދޯންޏެއް ގެނެސް ލޯންޗު ފުން ކުރުމުގެ މަސައްކަތް ފަށާފައެވެ. މިމަސައްކަތުގައި އެމްއެންޑީއެފް ކޯސްޓްގާޑުގެ ޑައިވަރުން ދަނީ އެހީތެރިކަން ފޯރުކޮށްދެމުންނެވެ.
މާލެއިން ފުރައިގެން ހިންމަފުއްޓަށް ދަތުރުކުރި މި ލޯންޗުގައި 9 ދިވެހިން ތިބި އިރު، އޭގެ ތެރޭގައި ހިމެނެނީ 2 އަންހެނުންނާއި 7 ފިރިހެނުންނެވެ. މީގެ ތެރެއިން އެއްވެސް މީހަކަށް ގެއްލުމެއް ލިބިފައެއް ނުވެއެވެ.
