ސަރުކާރުން ކުރިޔަށް ގެންދާ "ގެދޮރުވެރި ކުރުން" ގެ ދަށުން ހުޅުމާލެއިން އަލަށް ދޫކުރަން ނިންމާފައިވާ 7000 ފްލެޓުގެ ތެރެއިން 1000 ފްލެޓް ސަރުކާރުގެ މުއައްޒަފުންނަށް ދޫކުރަން ސަރުކާރުން ނިންމައިފިއެވެ.
ހައުސިންގ މިނިސްޓަރ ޑރ މުޙަންމަދު މުއިއްޒު ވިދާޅުވީ ރައީސް އަބްދުﷲ ޔާމީން ނިންމަވާފައި ވަނީ 7000 ފްލެޓްގެ ތެރެއިން 1000 ފްލެޓް ސިވިލްސާވަންޓުންގެ ތެރެއިން އެކަމަށް ކުރިމަތިލާ ފަރާތްތަކުގެ ތެރެއިން އެންމެގިނަ މާކްސް ހޯދާ ފަރާތްތަކަށް ދޫކުރަން ކަމަށެވެ. މިނިސްޓަރު ވިދާޅުވީ އެ 1000 ފްލެޓް ދޭނީ ތިން ކެޓަގަރީއަކަށް ބަހާލައިގެން ކަމަށެވެ. އަދި ފްލެޓަށް އެދި ކުރިމަތިލާ ފަރާތްތަކުގެ ތެރެއިން ވަޒީފާގައި ވެފައިވާ މުއްދަތާއި ތައުލީމީ ފެންވަރަށް ބަލާނެ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި މި 1000 ފްލެޓަށް އެދި ކުރިމަތިލުމުގެ ފުރުޞަތު އަންނަ މަހުގެ 1 ވަނަ ދުވަހުން ފެށިގެން އަންނަ މަހުގެ 15 ވަނަ ދުވަހާ ހަމައަށް ވަނީ ހުޅުވާލާފައެވެ.
މި 1000 ފްލެޓްގެ ތެރެއިން ސިވިލްސާވިސްގެ ސަޕޯޓް ސާވިސްގައި އުޅޭ މީހުންނަށް ދޫކުރަނީ 400 ފްލެޓެވެ. ފަންނީ އަދި މެނޭޖްމެންޓް ލެވެލްގައި މަސައްކަތް ކުރާ ފަރާތްތަކަށް 300 ފްލެޓް ދޭއިރު އިދާރީ މުއައްޒަފުންނަށްވެސް ދޫކުރަން ނިންމާފައި ވަނީ 300 ފްލެޓެވެ.
މި ފްލެޓް ތަކަށް ކުރިމަތި ލެވޭނީ މާލެ، ހުޅުމާލެ، އަދި ވިލިނގިލީގައި ހުންނަ ސަރުކާރު މުއައްސަސާތަކުގައި މަސައްކަތްކުރާ މުއައްޒަފުންނަށެވެ. ނަމަވެސް ކުރިމަތިލާ މީހުންގެ ތެރެއިން މާލޭ ރައްވެއްސެއް، އަތޮޅު ތެރޭގެ ރައްވެއްސެއް ތަފާތު ނުކުރައްވާނެ ކަމަށް ހައުސިންގ މިނިސްޓަރު ވިދާޅުވިއެވެ. މި ފްލެޓްތައް ލިބޭ ފަރާތްތަކަށް އަންނަ އަހަރުގެ އޭޕްރީލް މަހުގެ ތެރޭގައި ފްލެޓް ލިބުނުކަމުގެ ލިޔުން ހަވާލު ކުރަންވެސް ވަނީ ނިންމާފައެވެ.
