'ގޮނީ'ގެ ނަން ދެވިފައިވާ ސުޕަރ ޓައިފޫން ފިލިޕީންސަށް އަރައިފިއެވެ. ބައެއް ފަރާތްތަކުން "ދުނިޔޭގެ އެންމެ ބާރުގަދަ ޠޫފާން" ގެ ގޮތުގައި ސިފަކުރާ 'ގޮނީ' އަކި ޠޫފާނުގެ އެންމެ މަތީ ގިންތި ކަމުގައިވާ 5 ވަނަ ގިންތީގެ ޠޫފާނެކެއެވެ.
ފިލިޕީންސް އިރުމަތީ ކަޓަންޑުއާން ޖަޒީރާއަށް މިއަދު ޠޫފާން އެރިއިރު ވައިހުރީ ގަޑިއަކު 225 ކިލޯމީޓަރު ބާރުމިނުގައެވެ. އަދި ކޮޅިގަނޑުގައި ގަޑިއަކު 280 ކިލޯމީޓަރަށް ވައިގަދަވިއެވެ. ޠޫފާން ދަތުރުކުރި މަގުގައި ހުރި ގަސްތަކާއި، ކަރަންޓު މުޑިތައް ވެއްޓިފައި ވާއިރު، ގޭގޭގެ ފުރާޅުތައް ވެސް ވަނީ އުދުހިގެން ގޮސްފައެވެ.
މިހާތަނަށް (ރާއްޖޭ ގަޑިން މެންދުރު 12 ޖެހިއިރު) ލިބުނު ޚަބަރުތަކަށް ބަލާއިރު ޠޫފާނުގެ ސަބަބުން 4 މީހަކު ވަނީ މަރުވެފައެވެ.
ޠުފާން ދަތުރުކުރާނެ ކަމަށް ލަފާކުރެވޭ އަވަށްތަކުން މީހުން ހުސްކޮށްފައިވާއިރު، މިލިއަނެއްހާ މީހުން ވަނީ އެހެން ހިސާބުތަކަށް ބަދަލުކޮށްފައެވެ. ޠޫފާނުގެ ސަބަބުން ވެރިރަށް މެނީލާގެ އިންޓަނޭޝަނަލް އެއާޕޯޓުވެސް ވަނީ ބަންދުކޮށްފައެވެ.
"ނުރައްކަލަށް ހުށަހެޅިފަވާ ސަރަހައްދުގައި ގިނަ ބަޔަކު ދިރިއުޅޭ. އަހަރުމެން ލަފާކުރަނީ ބޮޑެތު ގެއްލުންވާނެ ކަމަށް." ނޭޝަނަލް ޑިޒާސްޓަރ ރިސްކް ރިޑަކްޝަން އެންޑް މެނޭޖްމަންޓް ކައުންސިލް (އެންޑީއާރްއާރްއެމްސީ) ގެ އެގްޒެކަޓިވް ޑިރެކްޓަރ ރިކާޑޯ ޖަލާޑް ވިދާޅުވިއެވެ. އޭނާ އިތުރަށް ވިދާޅުވި ގޮތުގައި 31.9 މިލިއަން މީހުންނަށް ވަނީ ޠޫފާނުގެ އަސަރުކޮށްފައެވެ.
ކަޓަޑުއާންއަށް އެރިތާ ދެ ގަޑިއިރު ފަހުން ޠޫފާން 'ގޮނީ' ވަނީ އެރަށުގެ ހުޅަގުން 80 ވަރަކަށް ކިލޯމީޓަރު ދުރުގައި އޮތް އަލްބޭ ޕްރޮވިންސަށް އަރާފައެވެ. އެހެންނަމަވެސް، އޭރު ޠޫފާންގެ ބާރު ދެރަވެފައި ވީނަމަވެސް ކޮޅިގަނޑުގައި ޖެހޭ ވައިގެ ބާރުގަދަވެ ގަޑިއަކު 310 ކިލޯމީޓަރަށް ވައި ޖެހިފައި ވެއެވެ.
"ދުނިޔޭގެ އެންމެ ބާރުގަދަ ޠޫފާން"ގެ ގޮތުގައި ބައެއް ފަރާތްތަކުން މި ޠޫފާން ސިފަކޮށްފައި ވަނީ އެހެންވެއެވެ. މި ޠޫފާނުގެ ޖެހޭ ވައި ކުއްލިކުއްލިއަށް ގަދަވަމުން ދާތީ މޫސުމާ ބެހޭ އިދާރާތަކުން ބުނާ ގޮތުގައި މިއީ މިއަހަރުގެ މިހާތަނަށް ދުނިޔޭގެ އެއްވެސް ތަނަކަށް އެރި އެންމެ ބާރުގަދަ ޠޫފާނެވެ.
ހެލްތު ސެކްރެޓަރީ (ހެލްތު މިނިސްޓްރ) ފްރާންސިސްކޯ ޑޫކޭ ވިދާޅުވި ގޮތުގައި ކަރަންޓީނުގައި ތިބި ކޮވިޑް- 19 ބަލިމީހުންގެ އެތައް ހާސް ބަޔަކު ވަނީ ސްކޫލްތަކާއި، ހޮޓެލްތަކުގައި ގާއިމުކޮށްފައިވާ ޑޭކެއާ ސެންޓަރުތަކަށް ބަދަލުކޮށްފައެވެ.
ފިލިޕީންސަކީ ދެކުނު އިރުމަތީ އޭޝިޔާ ސަރަހައްދުގައި އިންޑޮނޭޝިޔާއަށް ފަހު ކޮވިޑް- 19ގެ ހާލަތު އެންމެ ގޯސް ގައުމެވެ. އެ ގައުމުގައި މިހާތަނަށް 3 ލައްކަ 80 ހާހަށްވުރެ ގިނަ މީހުން އެ ބައްޔަށް ޕޮޒިޓިވްވެފައި ވާއިރު، އެ ބަލީގައި 7200 އަށްވުރެ ގިނަ މީހުން ވަނީ މަރުވެފައެވެ.
