އަރަބި ގައުމުތަކުގެ ޖަމްއިއްޔާ އަރަބް ލީގަށް ބޮޑު މައްސަލައަކާ ކުރިމަތިލާން ޖެހިއްޖެއެވެ. އެއީ ޖަމްއިއްޔާގެ މިދައުރުގެ ރައީސުކަމާ ހަވާލުވާނެ ގައުމެއް ނުވުމެެެވެެ.
މި ދައުރުގެ ރިޔާސަތާ ހަވާލުވާން އޮތީ ފަލަސްޠީނެވެ. އެހެންނަމަވެސް އިސްރާއީލާއެކު ޔުނައިޓެޑް އަރަބް އެމިރޭޓްސް (ޔޫއޭއީ) އަދި ބަހްރޭނުން ސޮއިކުރި ސުލްހައިގެ އެެއްބަސްވުން ކުށްވެރިކުރަން ފަލަސްޠީނުން ހުށަހެޅި ގަރާރު އަރަބް ލީގުން ބަަލައިނުގަނެ ބޭރުކޮށްލުމުން، އެކަމާމެދު އިހުތިޖާޖުކުރުމުގެ ގޮތުން ފަލަސްޠީނުން ވަނީ ރިޔާސަތާ ހަވާލުވާން ދެކޮޅުހަދާފައެވެ.
ރިޔާސަތު ދައުރުވަމުން ދަނީ އަލިފުބާ ތަރުތީބުން ކަމަށްވާތީ ދެން ރިޔާސަތާ ހަވާލުވާން ޖެހުނީ ޤަޠަރަށެވެ. އެހެންނަމަވެސް، ފާއިތުވި ސެޕްޓެންބަރު މަހުގެ 25 ވަނަ ދުވަހު ޤަޠަރުންެވެެސް ވަނީ ރިޔާސަތާ ހަވާލުވާން ދެކޮޅުހަދާފައެވެ. ޤަޠަރަށް ފަހު ދެން އޮތީ ކުވޭތުގެ ދައުރެވެ. ގިނަ މައްސަލަތަކުގައި މަޑުމައިތިރިކަން އިޚުތިޔާރުކުރާ ކުވޭތުން ވެސް ވަނީ އަރަބް ލީގްގެ މިދައުރުގެ ރިޔާސަތާ ހަވާލުވުމަށް އުޒުރުވެރިވެފައެވެ.
ޤަޠަރާއި ކުވޭތަށް ފަހު ލެބެނާން (ލުބްނާން) އަދި ކޮމޯރޯސް އިންވެސް ރިޔާސަތާއި ހަވާލުވާން ދެކޮޅު ހަދައި ފަލަސްޠީނާ އެއް ސަފަކަށް ޖެހުނެވެ.
އެންމެ ފަހުން ލީބިޔާއާ ހަމައަށް އައުމުން މި އޮކްޓޯބަރު މަހުގެ 6 ވަނަ ދުވަހު ލީބިޔާއިން ވެސް ވަނީ މިދައުރުގައި ރައީސުކަން ކުރުމަށް ދެކޮޅުހަދާފައެވެ.
އަރަބް ލީގެ ސެކްރެޓޭރިއަޓުން މި މައްސަލަައާ ގުޅޭގޮތުން އަދި އެއްވެސް އެއްޗެއް ބުނެފައި ނުވެއެވެ.
މިއީ 1945 ވަނަ އަހަރުގެ މާރިޗު މަހުގެ 22 ވަނަ ދުވަހު އުފެދުނު ފަހުން އަރަބް ލީގުގެ ރިޔާސަތާ ހަވާލުވާނެ ގައުމެއް ނެތި ފަޅުވި ފުރަތަމަ ފަހަރެވެ. މިކަމާ ގުޅިގެން އަރަބް ލީގަށް ކުރިމަތިވަމުންދާ ފާޑުކިއުންތައް ދަނީ އިތުރުވަމުންނެވެ. މީސް މީޑިިޔާގައި ހަރަކާތްތެރިވާ ގިނަ ބަަޔަކު ވަނީ މިމައްސަލައިގައި އަރަބް ލީގަށް ބަހުގެ ހަމަލާތަކެއްދީފައެވެ.
"އަހަރުމެން މާ ކުރިިން ބުނެފިން. އަރަބް ލީގް ވަނީ ކްލިނިކަލް ގޮތުން މަރުވެފައޭ. އެހެންވީމާ ވަޅުލާން އަވަސްވެގަންނަންވީ. ނުވަތަ އެތަނުގެ ރިޔާސަތަށް އިސްރާއީލު ގެނަޔަސް ރަނގަޅުވާނެ." މިސްރުގެ ނޫސްވެެރިޔާ މުޢުތައްޒު މަޠަރު ލިޔެފައި ވެއެވެ.
"ފާޑުކިއުމާއި، ކުށްވެރިކުރުމުގެ ތަޖުރިބާހުރި، (އިސްރާއީލާ) ގުޅުން ބަދަހިކުރުމާމެދު މައްސަލަ ނުޖައްސާ ޑްރައިވަރަކު ބޭނުން." އަރަބި ނޫހެއްގައި ކުރަހާފައިވާ އަރަބް ލީގްގެ ކާޓޫނެއްގެ ތިރީގައި ލިޔެފައި އޮތެވެ.
މީގެ 75 އަހަރު ކުރިން އަރަބި ހަ ގައުމު (މިސްރު، އިރާގު، ޖޯޑަން (އުރްދުން)، ލެބެނާން (ލުބްނާން)، ސައޫދީ އަރަބިއްޔާ އަދ ސީރިޔާ (ސޫރިޔާ)) ގުޅިގެން މިސްރުގެ ޤާހިރާ (ކައިރޯ) ގައި އުފެއްދި އަރަބް ލީގުގެ މެންބަރުންގެ ގޮތުގައި މިހާރު 22 ގައުމު ތިބެއެެވެ. އެެެހެންނަމަވެސް، އެ ޖަމާއަތް ވެފައި ވަނީ އަރަބިންނަށް ދިމާވާ މައްސަލަތައް ހައްލުކުރުމުގައި މާބޮޑު ކަމެއް ނުކުރެވޭ ޖަމާއަތަކަށެވެ.
