ރައީސް ޔާމީންގެ މުޅި މިލްއްޔާތު ފްރީޒްކުރުމަށް އެދިފައިވާ ސަބަބު ސާފުކޮށްދެއްވުމަށް ފުލުހުންގެ ފަރާތުން، ސުޕްރީމްކޯޓުން އެދިވަޑައިގެން ފިއެވެ. ސުޕްރީމް ކޯޓުން މިކަން ސާފްކޮށް ދެއްވުމަށް އެދި ވަޑައިގެންނެވީ ރައީސް ޔާމީންގެ އެކައުންޓްތަކުގައިވާ ފައިސާ ފްރީޒް ކުރުމުގެ އަމުރާބެހޭ އިސްތިއުނާފު މިއަދުގެ އަޑުއެހުން ނިންމާލައްވަމުންނެވެ.
ދަށު ކޯޓުން ނެރުނު އަމުރު ހައިކޯޓުން ބާޠިލް ކުރުމުން އެނިންމުން އިސްތިއުނާފްކުރުމަށް ސުޕްރީމް ކޯޓަށް ހުށަހެޅުއްވީ ދައުލަތުގެ ފަރާތުންނެވެ. ދަށު ކޯޓްގެ އަމުރުގައި ތިންބޭންކެއްގައި ހުރި ރައީސް ޔާމީންގެ އެކައުންޓްތައް ފްރީޒްކުރަން ވަނީ އަމުރު ނެރެފައެވެ. އޭގޭތެރޭގައި ބޭންކް އޮފް މޯލްޑިވސްގައި އޮތް ތިން އެކައުންޓަކާއި އިސްލާމިކް ބޭންކްގައި އޮތް އަށް އެކައުންޓަކާއި މޮރިޝަސް ބޭންކްގައި އޮތް ދެ އެކައުންޓެއް ހިމެނެއެވެ.
މިއަދުގެ އަޑުއެހުން ނިންމާލެއްވުމުގެ ކުރިން ޝަރީޢަތުގެ މަޖިލީހުގެ ރިޔާސަތުގައި ހުންނެވި ފަނޑިޔާރު ޙުޞްނު ސުޢޫދު ވިދާޅުވީ އަބްދުﷲ ޔާމީންގެ އެކައުންޓްތައް ފްރީޒް ކުރުމުގެ އަމުރަށް ފުލުހުން އެދިވަޑައިގެންނެވިއިރު ދައުލަތަށް ލިބެންޖެހޭނެކަމަށް ޓާޖެޓްކުރެވޭ ފައިސާގެ ޢަދަދާއި އެފައިސާ ދައުލަތަށް ލިބެންޖެހޭ ފައިސާކަމަށް ބުނާ ހެކި ތަކަކީ ނުވަތަ ސަބަބު ސާފުކޮށްދެވޭ ވަރަށް ދެންއޮންނަ އަޑުއެހުމަށް ތައްޔާރުވެ ވަޑައިގެންނެވެވުމަށެވެ.
މީހެއްގެ މުޅި މިލްކިއްޔާތު އެއްކޮށް ހިފެއްހެއްޓުމުގެ އަމުރަކަށް އެދި ވަޑައިގެންނެވިދާނެތޯ ފަނޑިޔާރު ސުޢޫދު ދައުލަތާ ކުރެއްވި ސުވާލާ ގުޅިގެން، ދައުލަތުގެ ވަކީލާ ވިދާޅުވީ އެފައިސާއަކީ މަނީ ލޯންޑްރިން ފަދަ ކުށެއް ކޮށްގެން ހޯދައިފައިވާ ފައިސާ އާ ގުޅުންހުރި ފައިސާ ކަމަށް ތުޙުމަތު ކުރެވޭނަމަ މުޅި މިލްކިއްޔާތު ފްރީޒްކުރުމުގެ އަމުރަށް ވެސް އެދެވިދާނެކަމަށެވެ.
މިއަދުގެ އަޑު އެހުމުގައި ރައީސް ޔާމީން ވިދާޅުވީ އެމްއެމްއޭގެ އެސްޓީއާރާ ގުޅިގެން އެމަނިކުފާނުގެ މުޅި މިލްކިއްޔާތުގައި ހުރި ފައިސާ ހިފަހެއްޓޭނެކަމަކަށް ޤަބޫލުފުޅު ނުކުރައްވާކަކަށެވެ. ޖިނާޢީ އިޖުރާތުގެ ޤާނޫނުގައި ބުނާ މޮނިޓަރިންގެ އަމުރަކާ ނުލައި އެކައުންޓްތައް ފްރީޒް ކުރެވޭނެ ކަމަށް ވެސް ޤަބޫލުފުޅު ނުކުރައްވާކަމަށެވެ. މުސާރައާ ނުބައްދަލު އާމްދަނީއެއް، އެމަނިކުފާނަށް ލިބޭ ކަމަށް، ފުލުހުން ވިދާޅުވާއިރު އެމަނިކުފާނު އާއްމުދަނީ ލިބޭ އެހެން މަސައްކަތެއް ކުރައްވާތޯވެސް ފުލުހުން ސުވާލު ނުކުރައްވާކަމަށެވެ. ނަމަވެސް އެމަނިކުފާނަކީ 1993 ވަނަ އަހަރުން ފެށިގެން ގެދޮރު ކުއްޔަށް ދީގެން އާއްމުދަނީ ހޯއްދަވަމުން އަންނަ މީހެއްކަމަށް ވިދާޅުވިއެވެ. ފައިސާ ގެންގުޅުމަކީ ރާއްޖޭގެ ޤާނޫނުތައް މަނާކުރާ ކަމެއް ނޫންކަމަށާއި އެމަނިކުފާނަކީ ސިޔާސީ ހަރާކާތް ހިންގާ އަދި ސިޔާސީ ޕާޓީއެއް ހިންގާ މީހެއްކަމަށް ވިދާޅުވިއެވެ.
ދައުލަތުން ވިދާޅުވީ މޮނިޓަރިންގެ އަމުރެއް ނެތިވެސް އެކައުންޓްތައް ފްރީޒް ކުރުމަށް ޖިނާއީ އިޖްރާތުގެ ޤާނުނުން ތަންދޭކަމަށެވެ. އެފައިސާއަކީ ދައުލަތަކަށް ލިބެންޖެހޭ ފައިސާއަކަށް ވާއިރު އެފައިސާ ގެއްލިދާނެކަމުގެ ބިރު އޮތިއްޔާ ބޭންކިން ޤާނުނުގެ 41 ވަނަ މާއްދާގެ ދަށުން އެކައުންޓްތައް ފްރީޒް ކުރުމުގެ އަމުރަށް އެދެވޭނެކަމަށެވެ.
ރައީސް ޔާމީންގެ ވަކީލް ވިދާޅުވީ ދައުލަތުން ފްރީޒްކުރުމަށް އެދިފައިވާ ފައިސާއަކީ އެމްއެމްއޭގެ އެސްޓީއާރުގައި ބުނާ އެއްމިލިއަން ޑޮލަރު ނޫންކަމަށެވެ. އެފައިސާ ހުރީ އޭސީސިގެ އެސްކްރޯ އެކައުންޓެއްގައިކަން ފާހަގަ ކުރެއްވިއެވެ.
