ޗައިނާގެ އަވަށެއްގައި 17 އަހަރު ވަންދެން ޗޭނު ޖަހައި އައްސައިގެން ގެންގުޅުނު މީހަކު އެގައުމުގެ ފުލުހުން ސަލާމަތް ކޮށްފިއެވެ.
މީޑިޔާ ރިޕޯޓުތައް ބުނާ ގޮތުގައި އޭނާ ޗޭނު ޖަހައިގެން ގެންގުޅުނީ އޭނާގެ އާއިލާގެ މީހުންނެވެ. ސަބަބަކީ އެމީހާއަކީ ސިކުނޑީގެ މައްސަލަތަކެއް ހުންނަ މީހަކަށް ވުމުން އޭނާ ހިފެހެއްޓުމުގައި އާއިލާއަށް އެނޫން ގޮތެއް ނެތުމުންނެވެ. ފަގީރު އާއިލާއަކަށް ނިސްބަތްވާ މި މީހާ ފެނުމުން ފުލުހުން ވަނީ އޭނާގެ ދެފައިގައި ޖަހާފައިވާ ޗޭނުތައް ނައްޓުވާފައެވެ. އާއިލާގެ ފަގީރު ކަމުގެ ސަބަބުން އެމީހާ ބަހައްޓާފައި ހުރީވެސް ވީރާނާވެފައިވާ ހޮހަޅައެއް ކަހަލަ ކޮޓަރިއެއްގައެވެ.
މީޑިޔާ ރިޕޯޓުތައް ބުނާ ގޮތުން އޭނާގެ ސިއްޙީ ޙާލަތު ދެނެގަނެ އޭނާއަށް ފަރުވާ ކުރުމަށްޓަކައި މިހާރު ވަނީ ހޮސްޕިޓަލަށް ގެންގޮސްފައެވެ.
