ރާއްޖެއިން ސްރީލަންކާއަސް ކަނޑައަޅާ ސަފީރު ކަމުގެ މަގާމަށް މުޙަންމަދު ޙުސައިން ޝަރީފް (މުންދު) ގެ ނަން މިއަދު ބޭއްވި ރައްޔިތުންގެ މަޖިލީހުގައި 28 މެމްބަރުންގެ ވޯޓުން ފާސްކޮށްފިއެވެ.
އިދިކޮޅު މެމްބަރުން އިހުތިޖާޖު ކުރައްވަމުން ގެންދެވިއިރު މަޖިލީހުގެ ރިޔާސަތު ސިފައިންގެ ޙިމާޔަތާއެކު ކުރިޔަށްގޮސް މުންދުގެ ނަމަށް އަހައި ފާސްވިއިރު ވޯޓުގައި ބައިވެރިވެވަޑައިގެންނެވީވެސް ސަރުކާރު ކޯލިޝަނުގައި ތިއްބެވި 28 މެމްބަރުން އެކަންޏެވެ.
މުންދުގެ ނަން ވޯޓަށް އެސެވީ ކޮމިޓީން ފާސްކުރި ގޮތަށެވެ. ލަންކާގައި ހުންނަވާ ދިވެހި ސަފީރު ކަމުގެ މަގާމަށް މުންދުގެ ނަން ފާސް ވަންދެން އޭނާ ހުންނެވީ ރާއްޖެއިން ޖަޕާނަށް ކަނޑައަޅުއްވާ ސަފީރު ކަމުގެ މަގާމުގައެވެ. މުންދުގެ ނަން ލަންކާ ސަފީރު ކަމަށް ރައީސް ފޮނުއްވީ ކުރިން އެމަގާމުގައި ހުންނެވި ޒާހިޔާ ޒަރީރު ވަކިކުރެއްވުމަށް ފަހުއެވެ.
މިއަދު އޮތް ޖަލްސާގައި މުންދުގެ ނަމަށް ވޯޓަށް އެހުނުއިރުވެސް އިދިކޮޅު މެމްބަރުން ގެންދެވީ މަޖިލިސް ތެރޭގައި ބާރަށް ހަޅޭއްލައްވަމުންނެވެ. އިދިކޮޅު މެމްބަރުން ވިދާޅުވަމުން ގެންދެވީ އެއީ ސައްޙަ ވޯޓެއް ނޫން ކަމަށާއި ޖަލްސާވެސް ސައްޙަ ނޫން ކަމަށެވެ. މަޖިލީހުގެ ރައީސް މަސީޙުގެ އިތުބާރުނެތް ކަމުގެ ވޯޓަށް ނާއްސަވައި ޖަލްސާ ކުރިޔަށް ނުގެންދެވޭނެ ކަމަށް އިދިކޮޅު މެމްބަރުން ދިޔައީ ހަރުއަޑުން ވިދާޅުވަމުންނެވެ. އިދިކޮޅު ފަރާތްތަކުން ބުނެފައި ވަނީ މުންދުގެ ނަން ފާސްކުރީ ޤާނޫނާ ޚިލާފު ޖަލްސާއަކުން ކަމަށް ލަންކާ ސަރުކާރަށް އަންގާނެ ކަމަށެވެ.
