ވަޒީފާގައި ދެމިތިއްބެވޭނީ، ނުވަތަ ވަޒީފާއަށް ކުރިއެރުމެއް ލިބޭނީ މައުމޫނާ ބެހޭގޮތުން މީޑިއާގައި ގޯސް ވާހަކަ ދެއްކެވީމާ ކަމަށް ވާނަމަ ރެއާއި ދުވާލު އެކަން ކުރެއްވިއަސް މައްސަލައެއް ނެތްކަމަށް ރައީސް މައުމޫން ވިދާޅުވެއްޖެއެވެ. އަދި އެބޭފުޅުން ގޮވައިގެން ޝަރީއަތަށް ވަޑައިނުގަންނަވާނެ ކަމަށް ވެސް އެމަނިކުފާނު ވިދާޅުވިއެވެ. އެމަނިކުފާނު މިހެން ވިދާޅުވީ ކުނޫޒުގައި އިދިކޮޅު އިއްތިހާދުގެ ފަރާތުން މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައިސް މައުމޫން ވިދާޅުވީ ރޭ ޕީޕީއެމް އިން ބޭއްވި ބައްދަލުވުމެއްގައި އެމަނިކުފާނަށް އިޝާރާތް ކުރައްވައި 30 އަހަރު ވެރިކަން ކުރެއްވި ބޭފުޅާއަށް ޗައިނާ މާކެޓް އެނގިވަޑައިނުގަންނަވާ ކަމަށް ވިދާޅުވެ ބޭފުޅަކު ދެއްކެވި ވާހަކައަށް ރައްދު ދެއްވަމުންނެވެ. ރައީސް މައުމޫން ވިދާޅުވީ ޗައިނާއަށް އެތައް ފަހަރަކު ރަސްމީ ދަތުރުފުޅުތަކުގައި ވަޑައިގެންނެވި ކަމަށާއި، ޗައިނާގެ ބޮޑު ވަޒީރާއި މިނިސްޓަރުންނާ އެކިފަހަރު މަތިން ބައްދަލުވެ ވަޑައިގެންނެވި ކަމަށެވެ. ޗައިނާގެ ބޮޑުވަޒީރު ރާއްޖެވަޑައިގެންނެވި ކަމަށާއި، ޗައިނާގެ މާކެޓް ރާއްޖޭގައި ފެށިގެން އައީ އެމަނިކުފާނުގެ ވެރިކަމުގައި ކަމަށް ވެސް ރައީސް މައުމޫން ވިދާާޅުވިއެވެ.
އެމަނިކުފާނު ވިދާޅުވީ އިއްތިހާދުން މިކުރާ މަސައްކަތަކީ ގައުމު އިސްލާހުކުރުމުގެ މަސައްކަތް ކަމަށާއި، އެއީ ވަކި ބަޔަކާ ދެކޮޅަށް ނުވަތަ ވަކި މީހަކު ޖަލަށް ލުމަށް ކުރާ މަސައްކަތެއް ނޫންކަމަށެވެ. އެމަނިކުފާނު މަސައްކަތްޕުޅު ކުރައްވަނީ ގާނޫނުގެ ކުރިމަތީގައި އެންމެން ހަމަހަމަވާން ޖެހޭނެތީ އެމަސައްކަތް ކަމަށްވެސް ވިދާާޅުވިއެވެ. ނަމަވެސް ލާރި ގޯނި ހިފައިގެން ދިޔަކަމަށް އަމިއްލައަށް އިއުތިރާފުވި ބޭފުޅާއާ މެދު އެއްވެސް ފިޔަވަޅެއް ނާޅުއްވައި، ކުށެށް ނުކުރާ މެންބަރު ހުންނެވީ ޝަރީއަތަކާ ނުލައި ޖަލުގައި ކަމަށްވެސް ވިދާޅުވިއެވެ. ރިޝްވަތުގެ ތުހުމަތުގައި އެމަނިކުފާނުގެ ދަރިކަލުން، ދިއްގަރު ދާއިރާގެ މެންބަރު ފާރިސް މައުމޫން މިވަގުތު ހުންނެވީ ޖަލުގައެވެ.
އެމަނިކުފާނު ވިދާޅުވީ އިންސާފެއް ނެތި ކުރާ ކަންކަން ކަމުނުދާނެކަމަށާއި، ކުށްކުރާ މީހުންނަށް ހައްގު އަދަބު ލިބެންޖެހޭނެ ކަމުގައެވެ. އަދި ގާނޫނު އަސާސީގެ ކުރިމަތީގައި އެންމެން ހަމަހަމަވާން ޖެހޭނެކަމަށްވެސް ރައީސް މައުމޫން ވިދާޅުވިއެވެ.
