ރާއްޖޭގައި ކޯވިޑް-19 އަށް ފަރުވާ ހޯދަމުން އަންނަ މީހުންގެ ތެރެއިން 6 މީހަކު ބަލިން ރަގަޅުވެއްޖެކަމަށް ނޭޝަނަލް އެމަރޖެންސީ އޮޕަރޭޝަން ސެންޓާ (އެންއޯއީސީގެ) ތަރުޖަމާނު މަބްރޫކް އަޒީޒް ވިދާޅުވެއްޖެއެވެ. ނޭޝަނަލް އެމަރޖެންސީ އޮޕަރޭޝަން ސެންޓާގައި ކުރިޔަށް ގެންދިޔަ ނޫސްވެރިންގެ ބައްދަލުވުމުގައި، މި ބަލިން ރަގަޅުވީ 6 ދިވެހިން ކަން މަބްރޫކް ފާހަގަކުރެއްވިއެވެ.
މި ބަލިން ރަނގަޅުވި 6 ކޭސްއާއި ބެހޭގޮތުން އިތުރު މައުލޫމާތު ދެމުން ޑރ އަފްޒަލް ވިދާޅުވީ މީގެތެރެއިން އެކަކު ރަގަޅުވީ އިއްޔެގެ ވަގުތެއްގައި ކަމަށާއި ބާކީ ތިބި 5 މީހުން ރަގަޅުވީ މިއަދުގެ ވަގުތެއްގައި ކަމަށެވެ. މީގެ ތެރޭގައި ހިމެނެނީ 5 ފިރިހެނުންނާއި އެއް އަންހެނަކު ކަމަށްވެސް ޑރ އަފްޒަލް ވިދާޅުވިއެވެ.
ރާއްޖޭއިން ކޯވިޑް-19 އަށް ޕޮޒިޓިވްވި މީހުންގެ އަދަދު ވަނީ 982 ކަށް އަރާފައެވެ. އޭގެ ތެރޭގައި މިއަދު ރާއްޖެއިން ފެނުނު 27 އާ ކޭސްވެސް ހިމެނެއެވެ. ރާއްޖޭގައި ކޯވިޑް-19 އަށް ފަރުވާ ދެމުންދާ މީހުންގެ ތެރެއިން 11 މީހަކު ވަނީ ހޮސްޕިޓަލުގައި އެޑްމިޓްކޮށްފައެވެ. އެއީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ފަރުވާދެމުން އަންނަ 2 މީހަކާއި ޓްރީޓޮޕް ހޮސްޕިޓަލުގައި ފަރުވާދެމުން އަންނަ 9 މީހެކެވެ. ދަރުމަވަންތަ ހޮސްޕިޓަލުގައި އެޑްމިޓްކުރެވިފައިވާ ދެ މީހުންނަށް ވެސް ފަރުވާ ދެމުން އަންނަނީ ވެންޓިލޭޓަރުގައެވެ. ޓްރީޓޮޕް ހޮސްޕިޓަލުގައި ފަރުވާދެވެމުންދާ މީހުންގެ ތެރެއިން ވެންޓިލޭޓަރުގައި ތިބީ ދެ މީހެކެވެ.
