ދިވެހިރާއްޖޭގެ ދުސްތޫރީ އޮނިގަނޑު ފަރުމާކުރެވިފައިވަނީ "ޑެޑްލޮކް" އަކަށް (އުސޫލީ މައްސަލަތަކެއްގެ ސަބަބުން ކުރިއަށް އެންމެ ފިޔަވަޅެއްވެސް ނޭޅި ހުއްޓުން އަރާ ފަދަ ހާލަތަކަށް ގައުމު ގެންދެވޭ ގޮތަށް) ކަމަށާއި، ދިވެހިރާއްޖޭގެ ދުސްތޫރީ އޮނިގަނޑުން ދިވެހި ޤައުމުގެ ރައީސަކަށް ހުންނަ މީހާ، އެއް އަތް ފަހަތަށް ބަނދެގެން ރައްޔިތުންގެ ކުރިމައްޗަށް ނެރެވޭގޮތަށް އެކުލަވާލެވިފައިކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ދިވެހިރާއްޖޭގެ 52 ވަނަ މިނިވަންދުވަހުގެ މުނާސަބަތުގައި، ޤައުމާ މުޚާޠަބުކުރައްވާ ދެއްވި ޚިޠާބުގައެވެ. ދިވެހިރާއްޖޭގެ ދުސްތޫރީ އޮނިގަނޑު ދިރާސާކުރައްވާ މާހިރުންނާ ޙަވާލާދެއްވައި ރައީސުލްޖުމްހޫރިއްޔާ ވިދާޅުވިގޮތުގައި، ދިވެހި ދުސްތޫރީ ހިންގުން ބައްޓަންވެފައިވާ ގޮތުން، ސަރުކާރުގެ މަސައްކަތަށް ހުރަސްއަޅައި، ދައުލަތް ހުއްޓުމަކަށް ގެނެވޭނޭ ފަދަ މަގުތަކެއް ނުވަތަ ފުރުޞަތުތަކެއް ދުސްތޫރީ އޮނިގަނޑުގައި ފަހިވާކަމަށެވެ. ހަމައެއާއެކު، 2008 ވަނަ އަހަރު އެކުލަވާލައި ތަސްދީޤުކުރެވުނު ޤާނޫނުއަސާސީއަކީ، ދިވެހިރާއްޖެފަދަ މީސްކޮޅު މަދު، އަދި ވަޞީލަތްތައް ނިސްބަތުން މަދު ޤައުމަކަށް އެއްފަހަރާ ތަންފީޛުކުރެވޭ ވަރަށްވުރެ އޮޅުންބޮޅުން ބޮޑު، ބުރަ ޤާނޫނުއަސާސީއެއްކަމަށާއި، މިކަންތައްތަކަކީ، ރާއްޖޭގެ އިންތިޚާބީ އޮނިގަނޑަށް އެކަނި ނަޒަރު ހިންގާލިނަމަވެސް ހާމަކަންބޮޑު ގޮތެއްގައި ފެންނާން އޮތް ކަންތައްތައްކަމަށެވެ.
ރާއްޖޭގެ އިންތިޚާބީ އޮނިގަނޑަށް އަލި އަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ، 2008 ވަނަ އަހަރު ތަސްދީޤުކުރެވުނު ޤާނޫނުއަސާސީއަށް ޢަމަލުކުރަން ފެށުނުތާ 9 އަހަރު ފާއިތުވެގެން ދިޔަ އިރު، ޤައުމީ ފެންވަރުގައި 7 އިންތިޚާބު ބޭއްވިފައިވާކަމަށް ރައީސުލްޖުމްހޫރިއްޔާ ފާހަގަކުރެއްވިއެވެ. ހަމައެއާއެކު، ރާއްޖޭގެ ކޮންމެ 466 ވަނަ ރައްޔިތަކަށް، ޤައުމީ ފެންވަރުގެ އިންތިޚާބަކުން އިންތިޚާބުވެފައިހުރި މުސާރަވެރިއަކު ދައުލަތުގައި އެބަ ހުރިކަމަށާއި، އަދި މި ދަނޑިވަޅުގައި މިއިން ހަމަ ކޮންމެ ބޭފުޅެއްގެ ވެސް ސުވާލަކަށް ވާންޖެހޭނީ، ޤައުމަށް ގެނެވޭ ތަރައްޤީއާއި އަމާންކަން ޤާއިމްކުރުމުގެ ޒިންމާއަކީ ދުސްތޫރުން އެ ބޭފުޅުންނާ މަތިކޮށްފައިވާ، ރައްޔިތުންގެ އުންމީދުތަކާ ގުޅިފައިވާ އަމާނާތެއް ނޫންތޯ ރައީސްވަނީ ސުވާލުކުރައްވާފައެވެ.
ރައީސުލްޖުމްހޫރިއްޔާ ވިދާޅުވިގޮތުގައި، މިއަދު ދިވެހިން ވާދަކުރަމުންދަނީ ބޭރުގެ ފަންނުވެރިންނާއި މާހިރުންނާއި އެއް ހަރުފަތެއްގައިކަމުން، މިނިވަންދުވަހުގެ އުފާ ޤައުމު ފާހަގަކުރަމުންދާ ދަނޑިވަޅެއްގައި އަޅުގަނޑުމެންގެ ސުވާލަކަށް ވާންޖެހޭނީ، ދުނިޔޭގެ ފެންވަރުގައި ވާދަކޮށް ޤައުމަށް ކާމިޔާބު ހޯދައިދެވޭނެ ވަރުގެ ހަކަތާއި ފަންވަރު ދިވެހިންގެ ހުރިތޯ ކުރެވޭ ސުވާލުކަމަށެވެ.
ރައީސުލްޖުމްހޫރިއްޔާ ވިދާޅުވި ގޮތުގައި، ކުރަންޖެހިފައިވީނަމަވެސް އެކި ސަބަބުތަކާހެދި ނުކުރެވި ހުރި އެތައް މަސައްކަތްތަކަކާއި ރައްޔިތުންގެ ދިރިއުޅުމުގެ ފެންވަރު މަތިކޮށް، މިހާރަށްވުރެ ގިނަ ވަޒީފާގެ ފުރުޞަތުތަކެއް ހޯދައިދިނުމަށްޓަކައި ތަރައްޤީގެ އެތައް މަޝްރޫޢުތަކެއް، މި ރިޔާސީ ދައުރުގެ ވޭތުވެދިޔަ 4 އަހަރުދުވަހުގެ ތެރޭގައި ސަރުކާރުންވަނީ ފައްްޓަވާފައެވެ. އެގޮތުން، ވެލާނާ އިންޓަރނޭޝަނަލް އެއަރޕޯޓު ތަރައްޤީކޮށް، އެ އެއަރޕޯޓުން މިހާރު ޚިދުމަތްނުދެވޭ ފަދަ ޒަމާނީ ބޯޓުތަކަށް ޖާގަ ހޯދައިދީ، ސަރަޙައްދީ ފެންވަރުގައި ނަން ހިނގާފަދަ އެއަރޕޯޓަކަށް ހެދުމަށް ކުރެވެމުންދާ މަސައްކަތް ފާހަގަކުރެއްވިއެވެ. ހަމައެއާއެކު، ކަނޑުގެ ބަނދަރު ތަރައްޤީ ކުރުމުގެ މަޝްރޫޢުގެ ސަބަބުން، ވިޔަފާރީގެ ދޮރުތައް އިތުރަށް ހުޅުވިގެންދާނެކަމަށާއި، މި މަޝްރޫޢުތަކުން ވަޒީފާގެ ފުރުޞަތުތައް އެތައް ގުނައަކަށް އިތުރުކުރެވިގެންދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.
ހުޅުމާލޭގައި ހިންގަމުން ގެންދާ ހައުސިންގ ޕްރޮޖެކްޓާއި، ހުޅުމާލެ ޑިވެލޮޕްމަންޓް ޕްރޮޖެކްޓުގެ ސަބަބުން ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ޙައްލެއް ލިބިގެންގޮސް، އުފާވެރި ދިރިއުޅުމަކަށް ކޮންމެ ޢާއިލާއަކަށްވެސް ފުރުޞަތު ލިބިގެންދާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ރާއްޖޭގެ ރަށްރަށުގެ ރައްޔިތުންނަށް ހިތްފަސޭހަ ދިރިއުޅުމެއް ހޯދައިދިނުމަށްޓަކައި ކުރެވޭ މަސައްކަތަށް އަލި އަޅުއްވާލަމުން، ރައީސުލްޖުމްހޫރިއްޔާ ވިދާޅުވީ، 33 ރަށެއްގެ ބަނދަރުގެ މަސައްކަތް މިހާތަނަށް ނިމިފައިވާއިރު، އިތުރު 39 ރަށެއްގެ ބަނދަރުގެ މަސައްކަތް ފެށިގެން ކުރިއަށްދާކަމަށެވެ. އަދި 2018 ގެ ނިޔަލަށް، މުޅި ދިވެހިރާއްޖޭގެ 75% އަށް ފެނާއި ޒަމާނީ ނަރުދަމާގެ ޚިދުމަތްތައް ލިބިގެންދާނެކަމުގެ ޔަޤީންކަން ދެއްވަމުން ރައީސުލްޖުމްހޫރިއްޔާ އިތުރަށް ވިދާޅުވީ، ރާއްޖޭގެ 13 ރަށެއްގައި މިހާރުވެސް މަގުތައް ހެދުމުގެ މަސައްކަތްތައް ކުރެވެމުންދާކަމަށެވެ.
ރައީސުލްޖުމްހޫރިއްޔާގެ ޚިތާބުގައި، ޞިއްޙީ ދާއިރާއިން ޤައުމު ޙާޞިލްކުރަމުންދާ ތަރައްޤީއަށް އަލިއަޅުއްވާލެއްވިއެވެ. އެގޮތުން، އިންދިރާ ގާންދީ މެމޯރިއަލް ހޮސްޕިޓަލްގެ 25 ބުރީގެ ޢިމާރާތާއި، ހިތަދޫ ރީޖަނަލް ހޮސްޕިޓަލާއި ކުޅުދުއްފުށި ރީޖަނަލް ހޮސްޕިޓަލުގައި ޒަމާނީ ޞިއްޙީ ޚިދުމަތްތައް ދެވެން ފެށުމަކީ ޢާއިލާއާ ދުރުގައި ރާއްޖެއިން ބޭރުގައި، ބޮޑެތި ބަލިތަކަށް ފަރުވާކުރަން ތިބެންޖެހޭ ޖެހުން ނިމުމަކަށް ގެނެވޭނެކަމެއް ކަމަށް ރައީސް ވަނީ ފާހަގަކުރައްވާފައެވެ.
ދިވެހިރާއްޖޭގެ އިޤްތިޞާދު ކުރިއެރުވުމުގެ މުހިންމުކަމުގެ ވާހަކަ އަށް އަލިއަޅުއްވާލައްވަމުން، ރައީސް ވިދާޅުވީ، އަންނަ އަހަރުގެ ނިޔަލަށް ހުޅުވުމުގެ މަސައްކަތްކުރެވެމުންދާ 30 ރިސޯޓާއެކު، އިތުރު އަށާރަހާސް ވަޒީފާގެ ފުރުޞަތު ހުޅުވިގެންދާނެކަމަށާއި، މިއީ އެތައް ޢާއިލާތަކެއްގެ ދިރިއުޅުމުގެ ފެންވަރު މަތިވެގެންދާނޭކަމެކެވެ.
ކޮރަޕްޝަން ޑެޑްލޮކު އެޅުވުމުގެ ޒިންމާ ރައްޔަތުން ހަވާލުކޮށްފައިވަނީ ރ.މަޖިލީހާއި މިނިވަން މުއައްސަސާތަކާއި ހުދު އަމިއްލަ ފަރުދީ ޒިންމާއެއް. އެއީ ރ.ޔާމީން މިނިވަން ދުވަހުގެ ވާހަަކަޔަށް ތިސުރުހީ ހެދީމާ އަންނަނީ ހިނި. ސަރުކާރުން ބޭނުންވާހާ ގޮތަކަށް ކަންކުރަން ހުދޫދެއް ނެތް މިނިވަންކަމެއް ނުދެވޭނެ.