ކުޑަކުޖެއްގެ ގޮތުގައި ހުރެ ކުރާ ކުށަށް މަރުގެ އަދަބު ނުދޭން ސައޫދީ އަރަބިއްޔާއިން ނިންމައިފިއެވެ. މިކަން ހާމަކޮށްފައި ވަނީ ސައޫދީ ރަސްގެފާނުގެ ޝާހީ އަމުރަކާ ޙަވާލާދީ ސައޫދީ ހިއުމަން ރައިޓް ކޮމިޝަނުން ނެރުނު ބަޔާނެއްގައެވެ.
"މި ޝާހީ އަމުރުގެ މާނައަކީ، ކުޑަކުއްޖެއްގެ ގޮތުގައި ހުރެ ކޮށްފައިވާ ކުށަކަށް މަރުގެ ހުކުމް އިއްވާފައިވާ އެއްވެސް މީހަކު މިހާރު މަރުގެ އަދަބާ ކުރިމަތިލާން ނުޖެހޭނެ. އޭގެ ބަދަލުގައި އޭނާ ޖެހޭނީ 10 އަހަރަށްވުރެ ދިގު ނޫން ޖަލު ހުކުމެއް، ކުޑަކުދިން ބަންދުކުރާ މަރުކަޒެއްގައި ތަންފީޒުކުރަން." ހިއުމަން ރައިޓްސް ކޮމިޝަނުގެ ބަޔާނުގައި ވެއެވެ.
ސައޫދީ ޚަބަރުފަތުރާ ރަސްމީ ފަރާތަކުން މި އަމުރު އާއްމުކޮށްފައި ނުވާއިރު، މި އަމުރަށް އަމަލުކުރަން ފަށަނީ ކޮން ދުވަހަކުކަން އަދި ސާފެއް ނުވެއެވެ.
އީރާނާއި، ޗައިނާއަށް ފަހު ދުނިޔޭގައި މަރުގެ އަދަބު އެންމެ ގިނައިން ދޭ ގައުމަށް ސައޫދީ އަރަބިއްޔާ ވާއިރު، ފާއިތުވި 2019 ވަނަ އަހަރު އެ ގައުމުގައި 184 މީހަކަށް މަރުގެ އަދަބު ދީފައި ވެއެވެ.
މި އަމުރުގެ ސަބަބުން، ޤަޠީފުގައި ހިނގި ހަމަނުޖެހުންތަކާ ގުޅިގެން މަރުގެ ހުކުމް ކޮށްފައިވާ 18 އަހަރުން ދަށުގެ ހަ ކުދިން މަރުގެ އަދަބުން ސަލާމަތްވާނެއެވެ.
ތައުޒީރުކުރަން ޖެހޭ ކަންކަމުގައި ދުއްރާއިން ތެޅުމުގެ ބަދަލުގައި ޖަލަށް ލާގޮތަށް، ނުވަތަ ޖުރްމާނާ ކުރާގޮތަށް ސައޫދީ ސަރުކާރުން ނިންމީ މީގެ ދެ ދުވަސް ކުރިންނެވެ.
