ކޮންޓޭނަރ މުދާ އެތެރެކުރަން ބޭނުންވާ ހުރިހާ ކުންފުންޏަކަށް ވެސް ރާއްޖޭގެ ޤައުމީ ޝިޕިން ކުންފުނި، މޯލްޑިވްސް ސްޓޭޓް ޝިޕިންގ (އެމްއެސްއެސް) ގެ ޚިދުމަތް ހޯދޭނެކަމަށް އެ ކުންފުނީގެ މެނޭޖިން ޑިރެކްޓަރ ޢަބްދުﷲ ސަޢީދު ވިދާޅުވެއްޖެއެވެ.
މިއަދު ޓެލެވިޒަން މޯލްޑިވްސްގެ، ކޮވިޑް 19 ގެ ކަވަރޭޖްގައި ވާހަކަ ދައްކަވަމުން ޤައުމީ ޝިޕިން ލައިންގެ އެމްޑީ ވިދާޅުވީ ޤައުމީ ޝިޕިން ކުންފުންޏަކީ އެސްޓީއޯގެ ސަބްސިޑަރީ ކުންފުންޏެއް ކަމުގައިވިއަސް އެކުންފުންޏަކީ ކޮންޓޭނާ މުދާ އުފުލަން ބޭނުންވާ ހުރިހާ ވިޔަފާރިތަކަށް ވެސް ޚިދުމަތް ދިނުމަށް އުފައްދައިފައިވާ ކުންފުންޏެއްކަމަށެވެ. އު ކުންފުނީގައި މިހާރު އޮތް އުޅަނދުން 20 ފުޓާއި 40 ފުޓްގެ ކޮންޓޭނާ އުފުލޭނެ ކަމަށް އެމްޑީ ވިދާޅުވިއެވެ.
ޤައުމީ ސިޕިން ލައިނަކީ ދައުލަތުގެ ކުންފުންޏެއްކަމުން ޚިދުމަތް ދެމުންދާނީ ރައްޔިތުންނަށް ވީހާވެސް ލުއިވާނެ ގޮތަކަށް ކަން އެމްޑީ ފާހަގަ ކުރެއްވިއެވެ.
"ކުންފުނިތަކުން ވަރަށް ގިނަ ޗާޖްތައް ނަގަމުންދާ ވާހަކަ އިވޭ. އަޅުގަނޑުމެންނަކީ ދައުލަތުގެ ކުންފުންޏަކަށް ވުމުން އެގޮތަކަށް ކަންކަމެއް ނުދާނެ. އަޅުގަނޑުމެން ނަގާނީ ހަމައެކަނި ފްރައިޓް ޗާޖާއި ޑޮކިއުމެންޓް ޗާޖް، އެހެންވީމާ ވިޔަފާރިވެރިންނަށް ވަރަށް ބޮޑު ލުޔެއް ލިބޭނެ" އެމްއެސްއެސްގެ އެމްޑީ ވިދާޅުވިއެވެ.
އެމްއެސްއެސް އިން ރާއްޖެއަށް މިހާރު މުދާ އުފުލަނީ، ރާއްޖެއާއި އެންމެ ގާތުގައި އޮތް ހަބް ޕޯރޓްކަމަށްވާ ކޮލަމްބޯ ބަނދަރުން ކަމަށް ޢަބްދުﷲ ސަޢީދު ވިދާޅުވިއެވެ. ކޮލަމްބޯ ބަނދަރަކީ ރާއްޖެއަށް ގެންނަ ވަރަށް ގިނަ މުދާ ޖަމާވާނެ ބަނދަރެއްކަން ޢަބަދުﷲ ސަޢީދު ފާހަގަ ކުރެއްވިއެވެ. ޚާއްޞަ ގޮތެއްގައި ރަމަޟާންމަސްފަދަ ގިނަ މުދާ ބޭނުންވާ ދުވަސް ވަރަށް ރާއްޖެއަށް އަންނަ ގިނަ މުދާ ނުގެނެވި ކޮލްމްބޯ ބަނދަރުގައި ތާށިވާކަންވެސް އެނާ ފާހަގަ ކުރެއްވިއެވެ. ކުންފުނީގެ ޚިދުމަތް ފުޅާ ވަމުންދާ ވަރަކަށް އެހެން ބަނަދަރުތަކުންވެސް ޑައިރެކްޓްކޮށް މުދާ ގެންނާނެ ކަމަށް އެމްޑީ ވިދާޅުވި އެވެ.
ޝިޕިންނަކީ ގްލޯބަލް އިންޑަސްޓްރީއެއް ކަމުން ފައިދާވާނެ ކަމަށް ބެލެވޭ ކޮންމެ ހިސާބެއްގައިވެސް އޮޕަރޭޓް ކުރެވޭނެކަމަށް އެމްޑީ ވިދާޅުވިއެވެ. އެއރ ލައިންތަކާ އަޅާބަލާއިރު ރެގިއުލޭޓްރީގޮތުންވެސް ޝިޕިންލައިންތަކަށް މާފަސޭހަކަމަށް ސަޢީދު ފާހަގަ ކުރެއްވިއެވެ.
ރާއްޖެއަށް ބޭނުންވާ ތަކެތި ދަތިކަމެއްނެތި އެތެރެކުރުމަކީ ކުންފުނީގެ މެންޑޭޓްގައި ވެސް ހިމެނޭކަމެއްކަމަށް ސަޢީދު ފާހަގަ ކުރެއްވިއެވެ. މިހާރު ރާއްޖެއަށް ދިމާވެފައިވާ ކޮވިޑްގެ ހާލަތުގައި ވެސް އަމިއްލަ ޝިޕިންލައިނެއް އޮތުމަކީ އިމަރޖެންސީ ކޮށް އެހެން ސަރަޙައްދަކުން ގެންނަންޖެހޭ ކާގޯއެއްވެސް ގެނައުމަށް އޮތް ފުރުޞަތެއްކަމަށް އެމްޑީ ފާހަގަ ކުރެއްވިއެވެ.
އެމްޑީ ވިދާޅުވީ ޚިދުމަތް ފެށްޓެވީ މާރކެޓް ރިސާރޗްކޮށް ބޭނުންވާ ދިރާސާތައް ކުރުމަށްފަހުގައި ކަމަށްވާތީ އެންމެ ފުރަތަމަ ދުވަހުން ފެށިގެންވެސްޤައުމީ ޝިޕިން ކުންފުންޏަކީ ފައިދާވާނެ ކުންފުންޏަކަށް ހެދޭނެ ކަމަށް ޤަބޫލުކުރައްވާ ކަމަށެވެ. ކުންފުނިން ދިވެހިންނަށް ވަޒީފާގެ ފުރުޞަތު ޙުޅުވާ ލެއްވުމާއި އުފެދިގްނެގެންދާނެ އެހެން ވަޒިފާތަކުން ވެސް ޤައުމުގެ އިޤްތިޞާދަށް ސިދާ ގޮތުންނާއި ނުސީދާ ގޮތުން ފައިދާވާނެ ކުންފުންޏަކަށް ޤައުމީ ޝިޕިން ކުންފުނި ވާނެކަމަށް އެމްޑީ ސަޢީދު ވިދާޅުވިއެވެ. އަދި ޤައުމީ ޝިޕިން ކުންފުންޏަކީ ޤައުމަށް ޑޮލަރު ވަންނާނެ ދާއިރާއެއްކަންވެސް އެމްޑީ ފާހަގަކުރެއްވިއެވެ. ކުންފުނީގެ އެންމެ ބޮޑު މަސްޢޫލިއްޔަތަކީ ވެސް ސަރުކާރަށް ފައިދާވާނެ ކުންފުންޏަކަށް، އެކުންފުނި ހެދުންން ކަމަށްވެސް އޭނާ ވިދާޅުވިއެވެ.
އެމްއެސްއެސް އިން މިހާރު ކާގޯ އުފުލަނީ ބޯޓެއް ޗާޓަރ ކޮށްގެނެވެ. ނަމަވެސް ކުރިއަށް އޮތްތަނުގައި ކުންފުނީގެ އަމިއްލަ ބޯޓް ހޯދޭނެކަށް އެމްޑީ ވިދާޅުވިއެވެ.
