ޤައުމީ ޝިޕިންގ ކުންފުނިން ޒުވާނުންނަށް ވަޒިފާގެ ފުރުޞަތު އެބަ އޮތްކަމަށް މޯލްޑިވްސް ސްޓޭޓް ޝިޕިންގެ މެނޭޖިން ޑިރެކްޓަރ ޢަބްދޫﷲ ސަޢީދު ވިދާޅުވެއްޖެއެވެ.
މިއަދު ޓެލެވިޒަން މޯލްޑިވްސްގެ، ކޮވިޑް 19 ގެ ކަވަރޭޖްގައި ވާހަކަ ދައްކަވަމުން ޤައުމީ ޝިޕިންކުންފުނީގެ އެމްޑީ ވިދާޅުވީ ކެރިއަރ އެއްގެ ގޮތުގައި ނުވަތަ ކުރިއަށްދާން ބޭނުންވާ ދާއިރާއެއްގެ ގޮތުގައި ޝިޕިން އިންޑަސްޓްރީ ޚިޔާރު ކުރުމަށެވެ. ވަޒީފާގެ ފުރުޞަތު އޮތް މުސްތްޤްބަލް އޮތް އިންޑަސް ޓްރީއަކަށް ރާއްޖޭގައި އަލުން ފެށި ޝިޕިން އިންޑަސްޓްރ ހެދޭނެ ކަމުގެ ޔަޤީންކަން އެބަ އޮތްކަމަށް ވެސް އޭނާ ވިދާޅުވިއެވެ.
ޢަބްދުﷲ ސަޢީދު ވިދާޅުވީ ޝިޕިން އިންޑަސްޓްރީ އަކީ ކުރިއަށް ދެވެން އޮތް އިންޑަސްޓްރީއެއްކަމަށް މިހާރު މީހުން ވަނީ ހަނދާން ނެތިފައި ކަމަށެވެ. މިދާއިރާއަށް ދިވެހިން، ޚާއްޞަގޮތެއްގައި ސްކޫލު ނިމިގެން ނުކުންނަ ކުދިން މާބޮޑު ޝަޢުޤްވެރިކަމެއް ހުރިކަން ފާހަގަ ނުކުރެވޭކަމަށް ވެސް ސަޢިދު ވިދާޅުވިއެވެ. ސްކޫލޫ ނިމިގެންވެސް ޝިޕިން އިންޑަސްޓްރީއަށް ކުދިން ނުކުންނަ ވާހަކަ އަޑުވެސް ނީވޭ ކަމަށް އޭނާ ވިދާޅުވިއެވެ.
މިވަގުތު އެމްއެސްއެސްގައި އޮތީ ޗާޓަރ ވެސެލްއެއްކަމުން އެބޯޓްގައި މަސައްކަތް ކުރަނީ ބިދޭސީން ކަމަށް އެމްޑީ ފާހަގަ ކުރެއްވިއެވެ. ނަމަވެސް ގްރައުންޑްގައި މަސައްކަތް ކުރަނީ ދިވެހިންނެވެ. ކުރިއަށް ތަނުގައި ކުންފުނީގެ އަމިއްލަ ބޯޓެއްގަނެ ފަޅުވެރިންނާއި އޮފިސަރުން ހޯދަންޖެހޭނެކަމަށް އެމްޑީ ވިދާޅުވިއެވެ. އެހެންކަމުން ކުރިއަށް އޮތް ތަނުގައި ދިވެހި ސީމެނުންނަށް ޤައުމީ ޝިޕިންގ ކުންފުނީގައި މަސަކަތް ކުރުމުގެ ފުރުޞަތު ލިބިގެންދާނެކަމަށް ވެސް އެމްޑީ ވިދާޅުވިއެވެ.
ޝިޕިންގ އިންޑަސްޓްރީ އަކީ ކެރިއަރއެއްގެ ގޮތުގައި ކުރިއަށް ދިއުމަށް ފުރުޞަތު އޮތް ދާއިރާއެއްކަން ޤައުމީ ޝިޕިންލައިންގެ އެމްޑީ ފާހަގަ ކުރެއްވިއެވެ. އެނާ ވިދާޅުވީ ޝިޕިން އިންޑަސްޓްރީގެ މާސްޓަރ ކެޕްޓަނަކަށް އާދައިގެ ކުންފުންޏަކުން ވެސް ނުވާހާސްޑޮލަރު ލިބޭނަކަމަށެވެ. އެއަށްވުރެ ދަށް ވަޒިފާތަކަށް ވެސް ފަސް ހާސް ޑޮލަރާއި ހަތަރު ހާސް ޑޮލަރާ މެދުގެ މުސާރަ ލިބޭކަން އެމްޑީ ފާހަގަ ކުރެއްވިއެވެ. ކުރިއާ ޚިލާފަށް މިޒަމާނުގައި ޝިޕިން އިންޑަސްޓްރީގައި މަސައްކަތް ކުރުމުގައި ހަމަސް ދުވަހު މަސައްކަތް ކުރުމަށްފަހު ތިންމަސް ދުވަހުހެ ޗުއްޓީއެއް ލިބޭކަންވެސް އެމްޑީ ފާހަގަ ކުރެއްވިއެވެ.
"ކުރީގައިވިއްޔާ ބޯޓްދަތުރުކުރަން ދާމީހަކު ދެން ނާންނާނޭ ބުނާނީ، މިޒާނުގައި އޮންނަނީ ހަމަސްދުވަހު މަސައްކަތް ކޮށްފައި ތިން މަސް އޯފްކޮށް" އެމްޑީ ސަޢީދު ވިދާޅުވިއެވެ.
