އަންހެނަކަށްވީތީ ފަޚުރުވެރި ނުވަންހެއްޔެވެ؟ މިއީ މިއަދު އަޅުގަނޑު އަންހެނަކަށްވެހުރެ އަންހެނުންނާ ކޮށްލަން ބޭނުންވާ ސުވާލެކެވެ. މިއަދަކީ އަޅުގަނޑުމެން އަންހެނުންނަށްޓަކައި ބައިނަލްއަޤްވާމީ ގޮތުން ފާހަގަ ކުރަމުން އަންނަ ދުވަހެވެ. ކޮންމެ އަހަރެއްގެ މާރޗް މަހުގެ އަށްވަނަ ދުވަހަކީ ބައިނަލްއަޤަވާމީ އަންހެނުންގެ ދުވަހެވެ. އަންހެނުންގެ ދުވަހެއް ބައިނަލްއަޤްވާމީ ގޮތުން ފާހަގަކުރަމުން އަންނަނީ އަންހެނުންގެ ޙައްޤުތައް ހޯދައިދިނުމުގެ ބޭނުމުގައެވެ.
އަންހެނުންގެ ޙައްޤުތަކުގެ ވާހަކަދައްކާއިރު އަޅުގަނޑުމެން މުސްލިމުންނަށްވެތިބެ ހަނދާންކުރަންޖެހޭ ކަމަކީ އަންހެނުންގެ ޙައްޤުތައް އެންމެ ފުރިހަމަގޮތުގައި ރައްކާތެރިކޮށްދީފައިވަނީ މާތްވެގެންވާ އިސްލާމްދީނުގައި ކަމެވެ. އިސްލާމްދީން އައުމުގެ ކުރިން އަންހެނުންނަކީ ވަރަށް ދަށުދަރަޖައެއްގައި ގެންގުޅުނު ބައެކެވެ. ޖާހިލިއްޔަ ޒާމަނުގައި އަންހެންދަރިން ދިިރިތިއްބާ ވަޅުލިކަން ކީރިތި ޤުރުއާންގެ މޫރިތި އާޔަތަކުން އަނޅުގަނޑުމެންނަށް ފެންނަން އެބަ އޮތެވެ. އެއީ އަންހެންކުއްޖަކު ލިބުމުން އެބައިމީހުންނަށް ހިތާމައާއި ހިތްދަތިކަމާ ކުރިމަތިލާންޖެހޭނެކަމަށް ޤަބޫލުކުރާތީއެވެ. އަދި ފިރިމީހާ މަރުވުމުން ފިރިމީހާގެ އާއިލާއަށް ވާރުތަވާ މުދާގަނޑެއްގެ ގޮތުގައި އަންހެނުން ގެންގުޅުނެވެ. އަންހެންމީހާއަށް އެހެން ކައިވެންޏެއް ނުކުރެވެއެވެ. ނަމަވެސް އިސްލާމްދީން އައުމުން މިފަދަ ނުބައި ޢަމަލުތައް ހުއްޓި އަންހެނުންގެ ހުރިހާ ޙައްޤުތަކަކަށް ރައްކާތެރިކަން ލިބިގެން ދިޔައެވެ.
އިސްލާމްދީނުގައި އަންހެނުންކަނީ އަބަދުވެސް ވަރަށްބޮޑު ރައްކާތެރިކަމެއް ލިބިގެންވާ ބައެވެ. ފުރަތަމަ ކުޑަކުއްޖެއްގެ ގޮތުގައި އަޅުގަނޑުމެން ތިބެނީ މައިންބަފައިންގެ ރައްކާތެރިކަމުގައެވެ. ކައިވެއްޏަކަށްފަހު ފިރިމީހާގެ ރައްކާތެރިކަމާއި އަޅާލުމާއި އޯގާތެރިކަމުގެ ދަށުގައެވެ. އަދި މުސްކުޅިވުމަށްފަހު ދަރިންގެ އޯގާތެރި އަޅާލުމުގެ ދަށުގައެެވެ. އާއިލާ ބެލެހެއްޓުމަށް މާލީގޮތުން އުފުލަންޖެހޭ އެއްވެސް މަސްޢޫލިއްޔަތެއްގެ ބުރަ އަންހެނުން އުފުލުމަކަށް އިސްލާމްދީނުގައި ނޯވެއެވެ. ބައްޕަ މަރުވެެއްޖެނަމަވެސް އެމަސްއޫލިއްޔަތު ދަނީ ޢާއިލީ ގޮތުން ބަލަދު އަރާ ފިރިހެނަކަށެވެ. ކުދިންގެ މަންމަ ނުވަތަ އަނބިމީހާއަށް އެބުރަ އުފުލާކަށް ނުޖެހެއެވެ. މިކަން މިހެން އޮތްއިރު އަންހެނުންނަށް މުދާ މިލްކު ކުރުމުގެ ޙައްޤުވެސް ލިބިދީފައި ވަނީ މާތްވެގެންވާ އިސްލާމްދީން އައުމަށްފަހުގައެވެ. ވާރުތަ މުދާ އަންހެނުންނަށް ލިބުމުގެ ޙައްޤުލިބިގެންދިޔައީ އިސްލާމްދީނުގައެވެ. އަނބިމީހާގެ ހުއްދަ ނެތި އޭނާގެ މުދާ ބޭނުންކުރުން އިސްލާމްދީނުގައި ފިރިހެނުންނަށް ވަނީ ޙަރާމްކުރައްވައިފައެވެ. މިކަމުންވެސް އެނގެނީ އަންހެނުންގެ މުދާރައްކާތެރިކޮށް ދިނުމަށް އިސްލާމްދީނުގައި ބާރުއަޅައިފައިވާ މިންވަރެވެ. އަނބި މީހާގެ މުދާ އާއިލާއަށް ޚަރަދު ކުރުމަށް އިސްލާމްދީނުގައި މަޖުބޫރެއް ނޫނެވެ. އަނބިމީހާއާއި ދަރިންނަށް ޚަރަދު ކުރުމަކީ ފިރިހެންމީހާގެ މައްޗަށް އިސްލާމްދީނުގައި ވާޖިބުކުރައްވައިފައިވާ ކަމެކެވެ.
އަންހެންދަރިންނަށް ތަޢުލީމުދީ ތަރުބިއްޔަތު ކުރުމަށްވެސް އިސްލާމްދީނުގައި ބާރުއަޅާފައިވާ މިންވަރު މާތް ރަސޫލާ މުޙައްމަދު ޞައްލައްﷲ ޢަލައިހި ވައްސަލަމަގެ ހަދީސްފުޅުތަކުން ސާބިތުވެއެވެ. އެކަލޭގެފާނުގެ ޙަދީސް ފުޅެއްގެ މާނައިގައިވެއެވެ. "އަންހެންދަރިން ލިބި އެދަރިން ހެޔޮގޮތުގައި ތަރުބިއްޔަތުކޮށްޕި މީހަކަށް ނަރަކައިން ރައްކާތެރިވުމެއް ކަމުގައި އެދަރިންވެއެވެ." އަދި "އަންހެންދަރިއަކު ލިބި އެދަރިފުޅަށް ޢިލްމު އުގަންނައިދީ، ހެޔޮ ގޮތުގައި ތަރުބިއްޔަތު ކޮށްފި މީހަކަށް، ދެ ހެޔޮކަން ލިބިގެންވެއެވެ."
އިސްލާމީ ތާރީޚުގެ ތެރެއަށް ދާއިރު އެކި ދާއިރާތަކުން އަންެހެނުން ތަޢުލީމާއި ތަމްރީނު ހޯދައިފައިވާކަން އެނގެއެވެ. އުއްމުލް މުއުމިނީން ޢައިޝާ ރަޟިޔަﷲ ޢަންހާ އަކީ ޙަދީސް ރިވާ ކުރެއްވި ބޭކަނބަލެކެވެ. އަދި ޢިލްމު އުގަންނަވައި ދެއްވި ބޭކަނބަލެކެވެ.
އަންހެނުން ބާރުވެރި ކުރުމުގެ ވާހަކަ ދެކެވޭއިރު އިސްލާމީ ޙަޟާރަތު ބިނާ ކުރުމުގައި އަންެހެނުން ވަނީ ވަރަށް މުހިންމު ރޯލެއް އަދާކޮށްފައެވެ. އެންމެ ފުރަަތަމަ އިސްލާމްވީވެސް އަންހެން ބޭކަނބަލެކެވެ. އެއީ މާތް ރަސޫލާ ޞައްލަﷲ ޢަލައިހި ވަސައްލަމަގެ ލޮބުވެތި އަނބިކަނބަލުން ޚަދިޖާ ރަޟިޔަﷲ ޢަންހާއެވެ. އިސްލާމްދީން ފެތުރުއްވުމަށްޓަކައި މާތްރަސޫލާ ޞައްލަﷲ ޢަލައިހި ވަސައްލަމައަށް އެންމެބޮޑު އެހީތެރިކަމެއް ދެއްވީ ވެސް އެކަމަނާއެވެ. އެކަމަނާގެ މުދާވަނީ އިސްލާމްދީނަށްޓަކައި ހޭދަކުރައްވައިފައެވެ. އަދި ހުދައިބިއްޔާގެ ޞުލްހައިގެ އެއްބަސްވުމުގައި ރަސޫލާ ޞައްލަﷲ ޢަލައިހި ވައްސަލަމައަށް އުއްމުލް މުއުމިނީން އުއްމު ސަލަމާ ދެއްވި މަޝްވާރާ ފާހަގަކޮށްލަންޖެހެއެވެ. އެންމެ ފުރަތަމަ ޝަހީދުވީވެސް އަންހެން ބޭކަނބަލެކެވެ. އެއީ ސުމައްޔާ ރަޟިޔަﷲ ޢަންހާއެވެ. މިނޫންނަސް އިސްލާމްދީނުގެ ދިފާޢުގައި ކުރެވުނު ހަނގުރާމަތަކުގައިވެސް އަންހެނުން ޖިހާދު ކޮށް ތަފާތު އެކިގޮތްގޮތުން ޙަރަކާތްތެރި ވެފައިވާކަން އިސްލާމީ ތާރީޚުން އެނގެއެވެ.
އަބުރު ރައްކާތެރިކުރުމުގެ ވާހަކައަކީ މިހާރަކަށް އައިސް ވަރަށް ބާރުލާދެކެވޭ ވާހަކައެކެވެ. ޢަބުރު "ކަތިލެވޭކަށް" އަޅުގަނޑުމެން އެކަކުވެސް ބޭނުމެއް ނުވާނެއެވެ. އަންހެނުންގެ އަބުރު އެންމެ ފުރިހަމައަށް ރައްކާތެރިކޮށްދީފައިވަނީ މާތްވެގެންވާ އިސްލާމްދީނުގައެވެ. އަންހެނަކަށް ޒިނޭގެތުޙުމަތު ކުރާމީހަކަށް އެކަން ސާބިތުކޮށް ނުދެވިއްޖެނަމަ އެމީހަކަށް ހައްދު ޤާއިމުކުރެވޭނެއެވެ. އަދި އެމީހެއްގެ ހެކިބަސް ޝަރީޢަތުގެ މަޖިލީހުގައި ޤަބޫލެއްނުކުރެވޭނެއެވެ.
އިސްލާމްދީނުގައި އަންހެނުންނަށް ވަނީ ވަރަށް މަތިވެރި ޤަދަރަކާއި ދަރަޖައެއް ދެއްވައިފައެވެ. އެެކަން ސާބިތުވާ އެއްކަމަކީ މާތްﷲގެ ކަލާނގެ ފުޅު، މާތްވެގެންވާ ކީރިތިޤުރުއާނުގައި "ސޫރަތުލްނިސާ"ގެ ނަމުގައި އަންހެނުނަށް ނިސްބަތްވާ ސޫރަތެއް ބާވައިލައްވާފައި ވުމުންނެވެ. ޢިލްމުވެރިން ވިދާޅުވަނީ މިއީ އަންހެނުނަށް ލިބުނު މަތިވެރި ދަރަޖައެއްކަމުގައެވެ.
އަނބިންނަށް ހެޔޮކޮށް ހިތުމަށާއި އަނިޔާވެރި ނުވުމަށް މާތްވެގެންވާ އިސްލާމްދީނުގައި ފިރިންނަށް ވަނީ ގަދައަމުރުން އަންގަވައިފައެވެ. އަންހެން ދަރިންގެ ކައިވެނި ކުރުވުމުގައި އެކުދިން ނުރުހޭ މީހުންނާ ގަދަކަމުން ކައިވެނި ކުރުވުން އިސްލާމްދީނުގައި ވަނީ މަނާކުރައްވައިފައެވެ. އަންހެނުނަށް އަނިޔާވެރި ވުމުގެ ގޮތުން ތަފާތު ގޮތްގޮތަށް އިނދެވަރިކުރުން އިސްލާމްދީނުގައި ވަނީ މަނާކުރައްވައިފައެވެ.
އަންހެނުންނަށް ހެޔޮކޮށް ހިތުމަށް މާތްރަސޫލާ ޞައްލަﷲ ޢަލައިހި ވަސައްލަމަ ވަނީ ވަޞިއްޔަތް ކުރައްވައިފައެވެ. ރަސޫލާ ޞައްލަﷲ ޢަލައިހި ވަސައްލަމަ ޙަދީސް ކުރެއްވި ބަސްފުޅެއްގެ މާނައިގައި ވެއެވެ. "ތިޔަބައި މީހުންގެ ތެރެއިން އެންމެ ހެޔޮ މީހަކީ ތިޔަބައިމީހުންގެ އަބީންނަށް ހެޔޮ މީހާއެވެ."
ޖިސްމާނީ ގޮތުންނާއި ނަފްސާނީ ގޮތުން އަންހެނުންނަށް ގެއްލުން ލިބިދާނެ އެންމެހާ ކަންކަމަށް ބޭނުންވާނެ ރައްކާތެރިކަމުގެ ފިޔަވަޅު އިސްލާމްދީނުގައި ވަނީ އަޅައި ދީފައެވެ. އެކަންކަމަށް ރައްކާތެރިވުމަށްވެސް ވަނީ އަމުރުކުރައްވައިފައެވެ.
އަޅުގަނޑުމެން އަންހެނުނަށް އިސްލާމްދީނުގައި އެފަދަ މަތިވެރި ދަރަޖައެއް ލިބިފައި ވާއިރު އެދަރަޖަ ހިފެހެއްޓުމަށް އަޅުގަނޑުމެން އަންހެނުން އަމިއްލައަށްވެސް މަސައްކަތް ކުރަންޖެހެއެވެ. މަސައްކަތުގެ މާހައުލުގައާއި މުޖުތަމައު ތެރޭގައި އުޅޭއިރު އަޅުގަނޑުމެންނަކީ މުސްލިމު އަންހެނުންކަން ހަނދާން ކޮށްގެން އުޅެންވީއެވެ. ކޮންމެ ކަމެއްގައިވެސް އިސްލާމީ ޝަރީޢަތުގައި ކަނޑައެޅިފައިވާ މިންތަކާއި އިިންތަކުގައި ހިފަހައްޓަންވީއެެވެ. އަންހެނުން ތަފާތު އެކި ދާއިރާތަކުން ތަޢުލީމާއި ތަމްރީނު ހޯދައި ޙަރަކާތްތެރިވުމަކީ އިސްލާމްދީނުގައި މަނާކަންކަތައްތަކެއް ނޫނެވެ. އަޅުގަނޑުމެންނަށް ޞިއްހީ ފަރުވާ ދޭން އަންހެން ޑޮކްޓަރުން ތިބެން އަޅުގަނޑުމެން ބޭނުންވެއެވެ. ސިޔާސަތުތައް ކަނޑައަޅާއިރު އަންހެނުންގެ އިޙްސާސްތައް ދެނެގަނެވޭނެ އަންހެނުންގެ ބައިވެރިވުން އޮންނަން އަޅުގަނޑުމެން ބޭނުންވެއެވެ. ޤާނޫނުތައް ހެދިގެންދާއިރު އަންހެނުންގެ ކަންބޮޑުވުން ތަކަށް ރިޢާޔަތް ކުރެވެން އަޅުގަނޑުމެން ބޭނުންވެއެވެ.
މުޖުތަމައެއް ބިނާވެގެން ދަނީ އާއިލާތަކަކުންނެވެ. އެއާއިލާތައް ބައްޓަންކުރުމުގެ އެންމެ ބޮޑުބާރެއް ލިބިފައިވަނީ އަޅުގަނޑުމެން އަންހެނުންނަށެވެ. އަޅުގަނޑުމެންގެ ޙަޤިޤީ މަސްއޫލިއްޔަތު ފުރިހަމައަށް އަދާކުރެވިއްޖެނަމަ އަޅުގަނޑުމެން ދިރިއުޅޭ މުޖުތަމަޢުވެގެންދާނީ ހަރުދަނާ މުޖުތަމައަކަށެވެ. ދެދުނިޔޭގެ ކާމިޔާބީއަށް އެދި ކުރާ މަސައްކަތަކީ ޙަޤީޤީ ކާމިޔާބު ހޯދުމަށް ކުރެވޭ މަސައްކަތެވެ.
ލޮބުވެތި ރަސޫލާ ޞައްލަﷲ ޢަލައިހި ވަޞައްލަމަގެ ޙަދީޘްފުޅެއްގެ މާނައިގައި ވެއެވެ. "އަންހެނާ ފަސް ވަގުތު ނަމާދުކޮށް، ރަމަޟާންމަހު ރޯދަހިފައި، ޢިއްފަތްތެރިކަން ރައްކާތެރިކޮށް ފިރިމީހާއަށް ކިޔަމަންތެރިކަން އަދާކޮށްފި ކަމުގައި ވަނީ ނަމަ އެކަނބުލޭގެއަށް ޤިޔާމަތް ދުވަހުން ބުނެވޭނެތެެެވެ! ކަނބުލޭގެ އެދޭ ދޮރަކުން ސުވަރުގެއަށް ވަންނާށެވެ."
