އިސްރާއީލުގައި އިއްޔެ ބޭއްވުނު އާއްމު އިންތިޚާބުގައި ބޮޑުވަޒީރު ނަތަންޔާހޫ، އޭނާއާއި ވާދަކުރި ބެނީ ގަންޓްޒްގެ މައްޗަށް ކުރިހޯދައިފިއެވެ. މިއީ އެއް އަހަރުގެ ތެރޭގައި އިސްރާއީލުގައި ބޭއްވުނު ތިންވަނަ އިންތިޚާބެވެ. ކުރިން ބޭއްވި ދެ އިންތިޚާބުވެސް އެއްވެސް ފަރާތަކަށް ކުރި ނުލިބުމުން، ސަރުކާރެއް އެކުލަވާނުލެވި އަނެއްކާވެސް އިންތިޚާބެއް ބޭއްވީއެވެ.
ރަސްމީ ނަތީޖާ އަދި ލިބިފައި ނުވިޔަސް، އެގްޒިޓް ޕޯލްތަކުން ދައްކާ ގޮތުގައި ނަތަންޔާހޫގެ ލިކުޑް ޕާޓީން ވަނީ ގާނޫނުހަދާ މަޖިލިސް (ކްނެސެޓް) ގެ 37 ގޮނޑި ކާމިޔާބުކޮށްފައެވެ. އޭނާއަށް ތާއީދުކުރާ ކޯލިޝަނަށް ލިބުނު ޖުމްލަ ގޮނޑީގެ އަދަދަކީ 59 އެވެ. 120 ގޮނޑި ހިމެނޭ ކްނެސެޓުގެ އަޣުލަބިއްޔަތަކީ 61 އެވެ.
މި ނަތީޖާއާއެކު ނަތަންޔާހޫ ވަނީ އޭނާ އިންތިޚާބު ކާމިޔާބުކުރި ކަން އިއުލާންކޮށްފައެވެ.
އިދިކޮޅު މައި ޕާޓީ، ބްލޫ އެންޑް ވައިޓް ޕާޓީއަށް ލިބުނީ 34 ގޮނޑިއެވެ. އެ ޕާޓީއަށް ތާއީދުކުރާ ޕާޓީތަކާއެކު އިދިކޮޅަށް ޖުމްލަ ލިބެނީ 52 ގޮނޑިއެެވެ. އެހެންނަމަވެސް، ބްލޫ އެންޑް ވައިޓް ޕާޓީގެ ލީޑަރު ބެނީ ގަންޓްޒް ބުނީ އޭނާ އަދި ބަލި ގަބޫލުނުކުރާ ކަމުގައެވެ.
އެކްޒިޓް ޕޯލްތަކުގެ ނަތީޖާއަށް ބަލާއިރު، އިސްރާއީލުގެ އަރަބިން ތަމްސީލުކުރާ އެރެބް ޖޮއިން ލިސްޓުން ވަނީ ގާނޫނު ހަދާ މަޖިލީހުގެ 15 ގޮނޑި ކާމިޔާބުކޮށްފައެެވެ. މިއާއެކު އެ ޕާޓީ ވެފައި ވަނީ ލިކޫޑާއި، ބްލޫ އެންޑް ވައިޓަށް ފަހު ކްނެސެޓްގައި ތިންވަނައަށް އެންމެ ބޮޑު ޕާޓީއަށެވެެ. މިއީ ފާއިތުވި އިންތިޚާބުގައި އަރަބި ކޯލިޝަނުން ހޯދި ނަތީޖާއަށްވުރެ ރަނގަޅު ނަތީޖާއެކެވެ.
ނަތަންޔާހޫއަށް އަޣުލަބިއްޔަތު ލިބިއްޖެނަމަ ބޮޑުވަޒީރުކަމުގެ އާ ދައުރަކަށް ހޮވި އޭނާއަށް ދެކޮޅަށް ޝަރީއަތަށް ހުށަހެޅިިފައިވާ ކޮރަޕްޝަންގެ މައްސަލަތަކާ ކުރިމަތިލުމަށް އިތުރު ހިތްވަރެއް އޭނާއަށް ލިބޭނެއެވެ.
އޭނާގެ ކާމިޔާބީ އިއުލާންކުރުމަށް ދެއްކި ވާހަކައިގައި، އިސްރާއީލު ދުށް އެންމެ ހަރުކަށި، ފަލަސްޠީނު މީހުންނަށް އެންމެ އަނިޔާވެރިވި އެއް ލީޑަރު ކަމުގައިވާ ނަތަންޔާހޫ ވަނީ އަރަބަ އަދި އިސްލާމީ ދުނިޔޭގެ އިތުރު ގައުމުތަކުގެ ލީޑަރުންނާ އެކު ގުޅުން ބަދަހިކުރާނެ ކަމަށް ބުނެފައެވެ. ބޭނުމަކީ އެމެރިކާގެ ރައީސު ޓްރަމްޕްގެ 'ގަރުނު އެއްބަސްވުން' ކާމިޔާބު އެެއްޗަކަށް ހެދުމަށް އެގައުމުތަކުގެ އެހީ ހޯދުމެވެ. މި ކަމުގައި ނަތަންޔާހޫ ކާމިޔާބުވެއްޖެނަަމަ މިނިވަން ދައުލަތަކަށް ފަލަސްޠީނު މީހުން ދެކޭ ހުވަފެން ހަގީގަތަށް ވުމަށް ހުރަސްއެޅޭނެއެވެ.
