މާލޭ ސްކޫލެއްގެ ލެބޯޓަރީއަކުން ކެމިކަލް ވަގަށްނަގައި އެއިން ގޮވާތަކެތި ހަދަން އުޅުނު މައްސަލާގައި ފުލުހުން ފެށި ޚާއްސަ އޮޕަރޭޝަން ރޭވެސް ކުރިއަށް ދިޔަކަށް ފުލުހުން ވިދާޅުވެއްޖެއެވެ. ރޭގެ އޮޕަރޭޝަނުގައި ވެސް ވަނީ މާލޭގެ އެކިތަންތަން ބަލައި ފާސްކޮށްފައެވެ.
ފުލުހުންގެ ތަރުޖަމާނު ޗީފްއިންސްޕެކްޓަރ އޮފް ޕޮލިސް އިޒުމިއާ ޒާހިރު ވިދާޅުވީ އެ މައްސަލާގައި އަދިވެސް މީހަކުވެސް ކުއްޖަކު ވެސް ބަންދު ކޮށްފައި ނުވާކަމަށެވެ.
ސްކޫލު ލެބޯޓަރީން ވަގަށްނެގި ކަމަށްބުނާ ކެމިކަލް މިހާރުވަނީ ފުލުހުންގެ ބެލުމުގެ ދަށަށް ގެނެސްފައެވެ. އެހެންނަމަވެސް އެތަކެތި ހޯދައިފައިވަނީ ކޮންތާކުން ކަމެއް ފުލުހުން ވިދާޅެއް ނުވެއެވެ. އަދި އެއީ ކޮންނަމެއް ކިޔާ އެއްޗެއް ކަމެއްވެސް ހާމައެއް ނުކުރެއެވެ. އަދި ކެމިކަލް ވަގަށްނެގި ކަމަށްބުނާ 15 އަހަރުން ދަށުގެ ކުދިންނާ ބެހޭ އެއްވެސް މަޢުލޫމާތެއް ވެސް ހާމައެއް ނުކުރައްވައެވެ.
