އައްޑޫސީޓިއަށް މިހާރު ކުރަމުންދާ ވިއްސާރައިގައި މީހުންނަށާއި ގޭގެއަށް ގެއްލުމެއް ލިބިފައިވޭތޯ ބެލުމުގެ މަސައްކަތް އަވަށު އޮފީސް ތަކުން ކުރަމުން ގެންދާނެ ކަމަށް އައްޑޫ ސިޓީ ކައުންސިލުން ވިދާޅުވެއްޖެއެވެ.
އައްޑޫސިޓީގެ ޑެޕިޔުޓީ މޭޔަރ މުޙައްމަދު ޔަސްރިފް ވިދާޅުވީ އެ މަސައްކަތްތައް ކުރިއަށް ގެންދާނީ ސިޓީގެ އަވަށްތަކުގެ އޮފީސްތަކުން ކަމަށެވެ. އެހެންނަމަވެސް މިހާތަނަށް އެއްވެސް މީހަކަށް ނުވަތަ ގެއަކަށް އެއްވެސް ކަހަލަ ސީރިއަސް ގެއްލުންވެގެން ރިޕޯޓުކޮށްފައި ނުވާކަމަށް އޭނާ ވިދާޅުވިއެވެ.
ޔަސްރިފް ވިދާޅުވީ އައްޑުއަށް ކުރަމުންދާ ވިއްސާރައިގައި ބޯކޮށް ވާރޭވެހި ރެއިން ފެށިގެން ފެން ހިންދުމުގެ މަސައްކަތް ކުރަމުންދާ ކަމަށެވެ. އެމަސައްކަތް ކުރަމުންދަނީ އެމްއެންޑީއެފާއި، ޕޮލިހުންނެވެ. އެހެން މީހުންގެ އެހީތެރިކަން ވެސް މި މަސައްކަތުގައި ލިބެމުންދާ ކަމަށް އޭނާ ވިދާޅުވިއެވެ.
ގޭގެއަށް ލިބިފައިވާ ގެއްލުންތައް ދެނެގަތުމަށް ގޭގެއަށްދާ ޓީމުތައް ވަރަށް އަވަހަށް ޙަރަކާތެރިވާން ފަށާނެ ކަމަށްވެސް އޭނާ ވިދާޅުވިއެވެ. ޓީމުތައް ގޭގެއަށްދާނީ ގެތަކުގެ މީހުންނަށް އެންމެ ފަސޭހަކަމަށް ބެލެވޭ ގަޑިތަކުގައެވެ.
