ބައެއް ރަށްރަށް ކޯޒުވޭއަކުން ގުޅާލުމަށްޓަކައި ބޭނުންވާ ޑިޒައިނިންއާއި، އީއައިއޭ ހެދުމުގެ މަސައްކަތް ބަޔަކާ މިއަދު ޙަވާލުކޮށްފިއެވެ.
ކޯޒްވޭއަކުން ގުޅާލަނީ ތ. ވޭމަންޑުއާއި ކިނބިދޫ، ގދ. ފަރެސްމާތޮޑާއި ފަރެސްމާތޮޑާ އެއަރޕޯޓު، ގދ. މަޑަވެއްޔާއި ހޯޑެއްދޫ، މ. މުއްޔާއި، ނާލާފުށްޓެވެ. މަޝްރޫޢުތަކުގެ ޑިޒައިން އަދި އީ.އައި.އޭގެ މަސައްކަތް ކުރުމަށް ޙަވާލުކޮށްފައިވަނީ އިންސާ ޕްރައިވެޓް ލިމިޓެޑާއެވެ.
މުއްޔާއި ނާލާފުށީގެ މަސައްކަތް ނިންމަން އެއްބަސްވެފައިވަނީ 39 ދުވަސްތެރޭގައެވެ. އެމަސައްކަތުގެ އަގަކީ 210,000.33 ރުފިޔާ އަށެވެ. ފަރެސްމާތޮޑާއި އެރަށުގެ އެއާޕޯޓުގެ ކޯޒުވޭއާއި، އެއަތޮޅު މަޑަވެއްޔާ ހޯޑެއްދޫ ކޯޒުވޭގެ މަސައްކަތް ނިންމުމަށް އެއްބަސްވެފައިވާ މުއްދަތަކީ 80 ދުވަހެވެ. މަސައްކަތުގެ އަގަކީ 174,661.50 ރުފިޔާއެވެ. ވޭމަންޑުއާއި ކިނބިދޫ ކޯޒްވޭގެ މަސައްކަތް ނިންމުމަށް ދީފައިވާ މުއްދަތަކީ 33 ދުވަހެވެ. މަސައްކަތުގެ އަގަކީ 185,000.60 ރުފިޔާ އެވެ.
މިޝްރޫޢުތަކުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަރޖެނެރަލް ފާތިމަތު ޝާނާ ފާރޫގެވެ. އިންސާ ޕްރައިވެޓް ލިމިޓެޑުގެ ފަރާތުން ސޮއިކުރެއްވީ އިންޖިނިއަރ އާދަމް ސާނީޒެވެ.
