ހެންވޭރު ބޮޑު އަލީފާނުގެ ހާދިސާގެ ގެއްލުމުގެ ސަބަބުން 9 ޢިމާރާތް ތަޅާލަން ޖެހުނު ކަމަށް ނެޝެނަލް ޑިޒާސްޓަރ މޭނެޖްމަންޓް އޮތޯރިޓީން (އެންޑީއެމްއޭ) އިން ހާމަކުރައްވައިފިއެވެ. މިޢިމާރާތްތައް ތަޅާލައިފައި ވަނީ ލިބުނު ގެއްލުންތަކާ ގުޅިގެން އާއްމު ރައްކާތެރިކަމަށެވެ.
ހާދިސާގެ ސަބަބުން ތަޅާލި 9 ޢިމާރާތުގެ ތެރޭގައި ހިމެނެނީ މީހުން ދިރިއުޅުނު ތިން ޢިމާރާތާއި ހަގުދަނެވެ. މީހުން ދިރިއުޅުނު ޢިމާރާތްތަކުގެ ތެރޭގައި ހ. ކިޔެވް އާއި ހ. ނެއިބަރ އާއި ހ. ނިގާރަން ހިމެނެއެވެ. ގުދަންތަކުގެ ތެރޭގައި ކަޅުހުރާގޭގައި ހުރި ދެ ގުދަނާއި ތިލަފުށީގޭ ގުދަނާއި މާޓިން ގޭ ގުދަނާއި އަހްމީންގޭ ގުދަނާއި އަލހުރާ ގުދަން ހިމެނެއެވެ.
ހެންވޭރު ބޮޑު އަލީފާނުގެ ހާދިސާގެ ގެއްލުމުގެ ސަބަބުން 6 ޢިމާރާތް ދިރިނޫޅެވޭވަރަށް ހަލާކުވެފައިވާ ކަމަށް އެންޑީއެމްއޭ އިން ހާމަކުރެއްވިއެވެ. ފަސް ޢިމާރާތެއް ދިރިއުޅުމަށް ރައްކާތެރި ނަމަވެސް ބައެއް މަރާމާތު ކުރަންޖެހޭކަމަށް އެމްޑީއެމްއޭ އިން ހާމަކޮށްފައިވާ ތަފާސް ހިސާބު ތަކުން ދައްކައެވެ. އަލިފާނުގެ ޙާދިސާގެ ސަބަބުން ވަގުތީ ގޮތުން މީހުން ބަދަލު ކުރެވުނު 11 ގެއެއްގައެއްގައި މީހުންނަށް މިހާރު ދިރިއުޅެވޭނެކަމަށްވެސް ވަނީ ކަނޑައަޅާފައެވެ. އޭގެތެރެއިން ގިނަ ގޭގެއަށް މިހާރު ވަނީ މީހުން ބަދަލުވެފައެވެ.
ދިރިނޫޅެވޭވަރަށް ހަލާކުވެފައިވާ ކަމަށް އެންޑީއެމްއޭ އިން ހާމަކުރައްވައިފައިވާ ހަ ގެއަކީ ހ. އިވާއު އާއި ހ.ރަދުވާނިޔާގެ އާއި ހ. އީރާނުގެއާއި ހ. ކަޅުހުރާގާރޑަން އާއި ހ. ކަޅުހުރާ އާއި ހ. އަލްފާއެވެ. މަރާމާތު ކުރަންޖެހޭކަމަށް އެމްޑީއެމްއޭ އިން ހާމަކޮށްފައިވާ ގެތަކުގެ ތެރޭގައި ހުމެނެނީ ހ. އަދޫ އާއި ހ. ނިޝާން ފްލާޒާއާއި ހ. ކީލް އާއި ހ. އިމޯޝަނާއި ހ. ގަސްވާއެވެ.
މި ޙާދިސާގައި 31 ގޭބިސީއަށް ގެންލުންވިކަމަށް އެންޑީއެމްއޭ އިން ވަނީ ހާމަކުރައްވައިފައެވެ. އޭތެރެއިން 25 ގޭ ބިސީއަކީ ކުޔަށް އުޅޭ ގޭބިސީތަކެވެ. އޭގެތެރެއިން އެންމެ ގިނަ ގޭބިސީ އުޅުނީ ހ. ކަޅުހުރާ ގޭގައެވެ. އެގޭގައި 11 ގޭބިސީއެއް ކުއްޔަށް އުޅެމުން ދިޔައެވެ. ދެން އެންމެ ގިނަ ގޭބިސީ އުޅެމުންދިޔައީ ހ. ރަދުވާނިޔާ އާއި ހ.އަދޫ ގައެވެ. އެ ދެގޭގެ ވެރިފަރާތުގެ އިތުރުން ކޮންމެ ގެއެއްގައި ކުޔަށް އުޅުނީ ފަސް ގޭބިސީއެކެވެ. މީހުން ދިރިއުޅުނުގެތަކުގެ ތެރެއިން ހ. އިވާއުގައި ފަސް ގޭބިސީ އުޅުނު އިރު ހަތަރު ގޭބިސީ އަކީ ކުއްޔަށް އުޅުނު ގޭބިސީތަކެވެ. ހ. ނިގާރަން އާއި ނެއިބަރ ގައި އުޅުނީ ހަމައެކަނި އެދެގޭގެ ވެރިފަރާތުންނެވެ. އެދެގެ ވަނީ އަލިފާނުގެ ޙާދިސާގައި އެއްކޮށް ހަލާކުވެގެން ގޮސްފައެވެ.
އެންޑީއެމްއޭ އިން ހާމަކޮށްފައިވާ ތަފާސް ހިސާބު ތަކުން ދައްކާ ގޮތުން 20 ސެޕްޓެމްބަރ ހެންވޭރުގައި ހިނގި އަލިފާނުގެ ޙާދިސާގައި 26 ގެއަކުން މީހުން ހުސްކުރެވުނެވެ. އެއީ 87 ގޭ ބިސީކަމަށް އެ އޮތޯރިޓީން ހާމަކުރެއްވިއެވެ.
