މިސްރުގެ ރައީސު ޢަބްދުލްފައްތާޙު އައްސީސީގެ ވެރިކަން ނިމުމަކަށް ގެނައުމަށް ގޮވާލައި، މިސުރުގެ އެތައް ހާސް ބަޔަކު މަގުތަކަށް ނުކުމެ މުޒާހަރާކުރަން ފަށައިފިއެވެ.
މިސްރުގެ އަސްކަރިއްޔާއަށް ކޮންޓްރެކްޓަރެއްގެ ގޮތުގައި ގިނަ މަސައްކަތްތަކެއް ކޮށްދީފައިވާ ވިޔަފާރިވެރިޔާ އަދި ފިލްމީ ފަންނާނު މުޙައްމަދު ޢަލީގެ ގޮވާލުމަށް އިޖާބަދިނުމުގެ ގޮތުން އިއްޔެ ވެރިރަށް ގާހިރާއާއި މިސްރުގެ އެހެން ރަށްރަށުގެ އެތައް ހާސް ބަޔަކު މަގުމައްޗަށް ނުކުމެފައި ވެއެވެ.
'ނުކުމޭ'، 'ބިރުނުގަނޭ'، 'ސީސީ ޖެހޭނީ ފައިބަން'، 'ރައްޔިތުން ބޭނުންވަނީ ވެރިކަން ބަދަލުކުރަން' ފަދަ ގޮވުންތަކާއެކު، ގިނަ ބަޔަކު ގާހިރާގެ ތަހުރީރު މައިދާނަށް އެއްވާތަން މީސް މީޑިޔާގައި އާއްމުވެފައިވާ ވީޑިއޯތަކުން ފެނެއެވެ. ބޮޑެތި އެހެން ރަށްތައް ކަމުގައިވާ އިސްކަންދަރިއްޔާއާއި ސުވޭސްގައި ވެސް ގިނަ ބަޔަކު މަގުމައްޗަށް ނުކުމެފައިވާ ކަމުގެ ޚަބަރުތައް ދަނީ ލިބެމުންނެވެ.
އަވާހަރަވެފައިވާ ކުރީގެ ރައީސު މުޙައްމަދު އަލްމުރްސީގެ ވެރިކަން އިންގިލާބަކުން ވައްޓަވާލެއްވުމަށް ފަހު 2014 ވަނަ އަހަރު ވެރިކަމަށް ވަޑައިގަތް ސީސީ ވަނީ އޭނާއާ އިދިކޮޅު ފަރާތްތަކު އަޑުކަނޑުވާލުމަށް ގިނަ މަސައްކަތްތަކެއް ކުރައްވާފައި ވާތީ، އޭނާގެ ވެރިކަމާ ދެކޮޅަށް މިހާތަނަށް މުޒާހަރާއަށް ނުކުމެފައި ނުވެއެވެ.
ގައުމުން ބޭރުގައި ހުރެގެން ފާއިތު މަހެއްހާ ދުވަހުގެ ތެރޭގައި މުޙައްމަދު ޢަލީ ވަނީ ސީސީގެ އާއިލާއާއި މިސްރުގެ އަސްކަރިއްޔާގެ އެތައް ބިލިއަން އެމެރިކާ ޑޮލަރުގެ ކޮރަޕްޝަން ހާމަކޮށް ގިނަ ވީޑިއޯތައް މީސް މީޑިޔާގައި އާއްމުކޮށްފައެވެ. އަދި އޭނާ ދަނީ ސީސީއާ ދެކޮޅަށް ނުކުންނަންވީ ވަގުތު އަތުވެއްޖެކަމަށް ބުނެ މިސްރުގެ ރައްޔިތުންނަށް އެމަކަށް ހިތްވަރު ދެމުންނެވެ.
މިހާރު ސްޕޭންގައި ދިރިއުޅެމުންދާ މުޙައްމަދު ޢަލީ ހޯދަން މިސްރުގެ ސިއްރު ފުލުހުން އެގައުމުގައި ހަރަކާތްތެރިވަމުންދާ ކަމުގެ ޚަބަރުތައް ވެސް ވަނީ ލިބިފައެވެ.
އިއްޔެ ރައްޔިތުން ނުކުތުމަށް މުހައްމަދު އަލީ ގޮވާލި ގޮވާލުމަށް މީސް މީޑިޔާގައި ހަރަކާތްތެރިވާ ސީސީއާ އިދިކޮޅު އެހެން ފަރާތްތަކުން ވެސް ތާއީދުކޮށްފައެވެ.
