ކޯޓްތަކަށް ގޮސް ޝަރުއީ ޙައްލެއް ހޯދުމުގެކުރިން، ޕީޕީއެމްގެ އެތެރޭގައި މިހާރު އުފެދިފައިވާ މައްސަލަތަކަށް އެތެރޭގެ ޙައްލެއް ހޯދެންވާނެކަމަށް އެޕާޓީގެ މުސްތަޝާރު އަދި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމު ވިދާޅުވެއްޖެއެވެ.
ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު އިލްހާމް އަހުމަދު މިރޭ ޕީޕީއެމަށް ސޮއިކުރެއްވުމަށް ދަރުބާރުގޭގައި ބޭއްވި ޚާއްސަ ހަފުލާގައި ވާހަކަފުޅުދައްކަވަމުން ރައީސް އަބްދުﷲ ޔާމީން ވިދާޅުވީ ޕީޕީއެމްގެ އެތެރޭގައި މިވަގުތު އުފެދިފައިވާ މައްސަލަތަކަކީ އެމަނިކުފާނު ވަރަށްބޮޑަށް ކަންބޮޑުވެވަޑައިގަންނަވާ، އަދި ހިތާމަކުރައްވާ ކަމެއްކަމަށެވެ.
ޕީޕީއެމްއަކީ ރާއްޖޭގައި އޮތް އެންމެ ވަރުގަދަ ޕާޓީކަމަށާ، އެޕާޓީއާ ވާދަކުރެވޭވަރުގެ އެހެން ސިޔާސީ ޕާޓީއެއް ރާއްޖޭގައި މިވަގުތު ނެތްކަމަށް ރައީސް ވިދާޅުވިއެވެ.
އެހެންކަމުން މިހެން ދިމާވާ މައްސަލަތައް ޙައްލުކޮށް ނަމޫނާދައްކާ ބަޔަކަށް ޕީޕީއެމްގެ ވެރިންނާއި ޢާއްމުމެމްބަރުން ވާންޖެހޭނެކަމަށް ރައީސް ވިދާޅުވިއެވެ.
"އެހެންވީމަ މި ޕާޓީގެ ތެރެއިން އުފެދިގެން ދާ ކަންކަމުގައި އަޅުގަނޑުމެން ނަމޫނާ ދައްކަންޖެހޭނެ. އާންމު މެންބަރުންނަށްވެސް ދަންނަވާލަން އޮތީ އުފެދިގެން އުޅޭ ނުތަނަވަސް ކަމުގައި އެންމެ ބޮޑު ނުތަނަވަސްކަން އޮތީ އަޅުގަނޑަށޭ، އެކަމަކު އަޅުގަނޑު ގަބޫލެއް ނުކުރަމޭ ޕާޓީގައި ޖެހިގެން އުޅޭ މައްސަލަތައް ޕާޓީގެ ތެރޭގައި މަޝްވަރާކޮށްގެން ހައްލު ނުކުރެވިދާނެ ކަމަކަށް. އެހެން ޕާޓީތަކަށް ވުރެ ޕީޕީއެމް ވަރުގަދަވެ ނަމޫނާ ޕާޓީއަކަށް ވަނީ ވެސް އެހެންވެގެން. " ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ޚިޔާލުފާޅުކުރުމުގެ މިނިވަންކަމާއި، ޑިމޮކްރަސީގެ އުސޫލުތައް މިއަދު ހިނގަމުންދާއިރު، ރާއްޖޭގެ ޒުވާނުން އަދި ރައްޔިތުން ތިބީ އޭގެތެރޭގައިކަމަށެވެ. އެހެންކަމުން އެކިކަންކަން ހިނގާއިރު އެމީހަކަށް ފެންނަ ގޮތް ބުނެވެން ޖެހޭނެ ކަމަށާ، ރައްޔިތުންގެ މަޖިލީހުގައި ވެސް ހިތްހަމަ ނުޖެހޭ ކަމެއް ދިމާވުމުން މަޖިލިސް ދޫކޮށްފައި މެމްބަރުން ވަޑައިގަންނަވާނެކަމަށެވެ. އަދި އެހެން ޖަލްސާތަކާއި ބައްދަލުވުންތަކުގައިވެސް އެފަދަކަންކަން ހިނގާނެކަމަށް ރައީސް ވިދާޅުވިއެވެ.
މިފަދަ ކަންކަމުގެސަބަބުން ޕާޓީ ހިންގުން ހުއްޓުމަކަށްއައިސް މައްސަލަތައް އުފެދުމަކީ ޒިންމާދާރު ކަމެއްނޫންކަމަށް ދޭހަވާ މޭރުމަކުން މިރޭ ރައީސް ވަނީ ވާހަކަފުޅުދައްކަވާފައެވެ.
