އިސްލާމްދީން ވަނީ ދުނިޔެ އެތައް ގަރުނަކަށް ފަހަތަށް ޖައްސާފައި ކަމަށް އިނގިރޭސިވިލާތުގެ ބޮޑުވަޒީރަކަށް ދެން ވެވަޑައިގަންނަވާނެކަމަށް ބެލެވޭ ބޮރިސް ޖޯންސަން ވިދާޅުވެއްޖެއެވެ. އޭނާ މިހެން ވިދާޅުވުމާ ގުޅިގެން އެތައް ބައެއްގެ ފާޑުކިޔުން އޭނާއަށް ވަނީ އަމާޒުވެފައެވެ.
"ދުނިޔޭގެ ކަންކޮޅުތަކުގައި ތަރައްގީއަށް ހުރަސް އެޅި ކޮންމެވެސް ކަމެއް އިސްލާމްދީނުގައި ވެއެވެ. އޭގެ ނަތީޖާއެއްގެ ގޮތުން މުސްލިމުންނާ ގުޅޭ ކަންބޮޑުވުންތައް ވެފައި އޮތީ ކޮންމެ ހަމަނުޖެހުމެއްގެ ވެސް ބަޔަކަށް ވެފައެވެ." 2006 ވަނަ އަހަރު އޭނާ ލިއުއްވި ފޮތް، The Dream of Rome (ރޯމްގެ ހުވަފެން) ގެ އައު ޗާޕަށް އިތުރުކުރި ބައިގައި ދީނާ ބެހޭ ގޮތުން ލިއުއްވަމުން އޭނާ ވިދާޅުވެފައި ވެއެވެ.
އިނގިރޭސިވިލާތުގެ ކުރީގެ ޚާރިޖީ ވަޒީރު އަދި ލަންޑަނުގެ ކުރީގެ މޭޔަރު ބޮރިސް ޖޯންސަންގެ މި ވާހަކަފުޅުތަކާ ގުޅިގެން، އިސްލާމްދީނާމެދު ނަފްރަތު އުފެދޭ ގޮތަށް އިނގިރޭސިވިލާތުގައި ދެކެވޭ ވާހަކަތައް މޮނިޓާކުރާ 'ޓެލް މާމާ' ޕްރޮޖެކްޓުން ވަނީ ޖޯންސަންގެ ވާހަކަފުޅުތަކަކީ ހަމަނުޖެހުމަށް މަގުފަހިކުރާ، މައްސަލަތައް އުފައްދާ ވާހަކަފުޅުތަކެއް ކަމުގައި ސިފަކޮށްފައެވެ. އަދި މިކަމުން ދޭހަވަނި އިސްލާމްދީނާމެދު އޭނާއަށް އެނގިވަޑަގަންނަވާ މިންވަރު ކުޑަކަން ކަމުގައި ބުނެފައެވެ.
މުސްލިމް ކައުންސިލް އޮފް ބްރިޓަން (އެމްސީބީ) އިން ބުނީ، އިނގިރޭސިވިލާތުގެ ބޮޑުވަޒީކަށް ވެވަޑައިގަންނަވާނެކަމަށް އެންމެ ބޮޑަށް ބެލެވޭ ބޭފުޅާ ގަބޫލުފުޅުކުރައްވަނީ "އިސްލާމްދީނަކީ ތަރައްގީއާއި މިނިވަންކަމުގެ މަގަށް ހުރަސްއަޅާ ދީނެއް" ކަމުގައިތޯ ބަލަން ގިނަ ބަޔަކު ބޭނުވާ ކަމުގައެވެ.
ބޮރިސް ޖޯންސަން ފާހަގަކުރެވިފައި ވަނީ އިސްލާމްދީނަށް ނަފުރަތު ކުރައްވާ، އެ ދީނާ ދެކޮޅު ވާހަކަފުޅުތައް ދައްކަވާ ބޭފުޅެއްގެ ގޮތުގައެވެ. ފާއިތުވި އަހަރި ޑެއިލީ ޓެލެގްރާފް ނޫހުގައި ލިއުއްވި މަޒުމޫނެއްގައި އޭނާ ވަނީ މޫނު ބުރުގާ އަޅާ އަންހެނުންނަކީ "ލެޓަރ ބޮކްސް" ތަކެއް އަދި "ބޭންކު ލޫޓުވާ" ބައެއް ކަމުގައި ސިފަކުރައްވާފައެވެ.
2007 ވަނަ އަހަރު And Then Came Muslims (އަދި އެއަށް ފަހު އައީ މުސްލިމުން) ގެ ނަމުގައި ލިއުއްވި މަޒުމޫނެއްގައި ވިދާޅުވެފައިވާ ގޮތުގައި ބީޒަންޠީން ރޯމަނުންގެ ދަށުގައި ޤުސްޠަންޠީނިޔާ (މިހާރުގެ އިސްތަންބޫލް) އެތައް ގަރުނަކަށް ތަރައްގީވެ ކުރިއަރާފައި ވަނިކޮށް އުސްމާނީ ވެރިކަން ގާއިމުވުމާއެކު އެރަށް ވަނީ އެތައް ގަރުނަކަށް ފަހަތަށް ޖެހިފައެވެ.
ކޮންޒާވެޓިވް މުސްލިމް ފޯރަމްގެ ކުރީގެ ރައީސު މުޙައްމަދު އަމީން ވިދާޅުވި ގޮތުގައި ޖޯންސަންގެ ވާހަކަފުޅުތަކުގެ ސަބަބުން އިސްލާމްދީނާ މެދު ނަފުރަތު އުފެދުން ނޫން ކަމެއް ނުވާނެއެވެ.
ފާއިތުވި ހަފުތާގައި ބޮރިސް ޖޯންސަން ވަނީ އޭނާއަކީ "ކަށީގެ މަދާ ހަމައަށް ޞަހްޔޫނީއެއް" (ޒަޔަނިސްޓެއް) ކަމުގައި ވިދާޅުވެފައެވެ. އަދި އޭނާ ވިދާޅުވީ "އިސްރާއީލަކީ އަހަރެން ލޯބިވާ މަތިވެރި ގައުމު" ކަމުގައެވެ.
ބޮރިސް ޖޯންސަން އިނގިރޭސި ބޮޑުވަޒީރުކަމަށް ވަޑައިގަތުމާއެކު ފަލަސްޠީނުގެ މައްސަލައިގައި އެމެރިކާގެ ރައީސު ޓްރަމްޕް ގެންގުޅުއްވާފަދަ، ފާޅުގައި އިސްރާއީލަށް ތާއީދުކުރާ ސިޔާސަތެއް ގެންގުޅުއްވަފާނެކަމަށް ބެލެވެއެވެ.
