ސޫދާނުގައި ވެރިކަންކުރާ އަސްކަރީ މަޖިލީހާ ދެކޮޅަށް ކުރިއަށް ދިޔަ އިހުތިޖާޖު ރޫޅާލަން ހޯމަ ދުވަހު އާދަޔާއި ޚިލާފަށް ބާރުގެ ބޭނުންކޮށް އާއްމުންގެ ގިނަ ބަޔަކު މަރާލި މައްސަލައާމެދު ބަހުސުކުރުމަށް އިއްޔެ އދ.ގެ ސަލާމަތީ މަޖިލީހުގެ ކުއްލި ބައްދަލުވުމެއް ބާއްވައިފިއެވެ.
މަދަނީ ބަޔަކާ ވެރިކަން ހަވާލުކުރުމަށް ފާއިތުވި އެޕްރީލް މަހުއްސުރެ ސިފައިންގެ މައިމަރުކަޒުގެ ކުރިމަތީގައި ތިބެ އިހުތިޖާޖުކުރަމުން ދިޔަ މީހުންގެ ގަޔަށް ސިފައިން ބަޑިޖެހުމުގެ ސަބަބުން މަރުވި މީހުން އަދަދު މިހާރު ވަނީ 60 އަށް އަރާފައެވެ. ސޫދާނުގެ ޑޮކްޓަރުންގެ ޖަމްއިއްޔާއިން ބުނި ގޮތުގައި އާއްމުންނަށް ހަމަލާދީފައި ވަނީ އިންތިގާލީ އަސްކަރީ ކައުންސިލް ނާއިބު ރައީސު ޖެނެރަލް މުޙައްމަދު ޙަމްދާން ދަޤްލޫ (ޙަމީދަތީ) ކޮމާންޑުކުރައްވާ ރެޕިޑް ސަޕޯޓް ފޯސަސް (އާރއެސްއެފް) އިންނެވެ.
އިނގިރޭސިވިލާތާއި ޖަރުމަނުގެ އެދުމުގެ މަތިން ބޭއްވި މި ބައްދަލުވުން ވަނީ ގަރާރެއް ފާސްނުކުރެވި ނިމިފައެވެ. ގަރާރަކާ ދެކޮޅު ހެދީ ރަޝިޔާއާއި ޗައިނާއިންނެވެ.
"ވީހާ އަވަހަކަށް މަޝްވަރާގެ މޭޒަށް އެނބުރި އަންނަންޖެހޭ." ސަލާމަތީ މަޖިލީހުގެ ބައްދަލުވުމުން ފެށުމުގެ ކުރިން ވާހަކަފުޅު ދައްކަވަމުން ޖަރުމަނުން އދ.އަށް ކަނޑައަޅާފައި ހުންނަވާ ސަފީރު ކްރިސްޓޯފް ހިއުސްޖެން ވިދާޅުވިއެވެ. "ބާޑިގެ ބާރުން ގާނޫނީ ވެރިކަމެއް ނުގެނެވޭނެ." އޭނާ ވިދާޅުވިއެވެ.
ނުވަ މަސްދުވަހުގެ ތެރޭގައި އާއްމު އިންތިޚާބެއް ބާއްވާނެކަމަށް އަސްކަރީ މަޖިލީހުން ބުނާ ބުނުން ބަލައިނުގަނެވޭނެކަން ހާމަކުރައްވަމުން ޖަރުމަނުގެ ސަފީރު ވިދާޅުވީ ގައުމު މިހާރު އޮތީ އާއްމު އިންތިޚާބެއް ބޭއްވޭ ހާލަތެއްގައި ނޫންކަމުގައެވެ.
ސޫދާނުގެ އަސްކަރިއްޔާއިން ހިންގި 'ގަތުލު އާއްމު' ދުނިޔޭގެ ގިނަ ގައުމުތަކުން ދަނީ ކުށްވެރިކުރަމުންނެވެ.
ބަޑިޖަހައި އެތައް ބަޔަކު މަރާލުމަށްފަހުވެސް، ސޫދާނުގެ އަސްކަރިއްޔާގެ ލާއިންސާނީ އަމަލުތައް ދަނީ ކުރިއަށެވެ. ޚުރުޠޫމުގައި ހުންނަ ރޮޔަލް ކެއާ ހޮސްޕިޓަލުގެ ފަރާތުން ވާހަކަދެއްކި މީހަކު ބުނިގޮތުގައި ޒަޚަމްވެފައިވާ އެތައް ސަތޭކަ ބަޔަކު އެ ހޮސްޕިޓަލުން ފަރުވާ ހޯދަމުން ދަނިކޮށް އާރއެސްއެފްގެ ސިފައިން ވަނީ ލޮރީތަކުގައި އެތަނަށް އައިސް ޒަޚަމްވެފައިވާ މީހުން ގަދަކަމުން ހޮސްޕިޓަލުން ބޭރުކުރަން ފަށާފައެވެ.
"އެމީހުންގެ (އާރްއެސްއެފް) ގެ އިސް އޮފިސަރަކު ހޮސްޕިޓަލަށް އައިސް އަންގާފައިވަނީ ޒަޚްމްވެފައިވާ އެންމެން ހޮސްޕިޓަލުން ބޭރުކުރާށޭ." ހޮސްޕިޓަލުން ވާހަކަދެއްކި މީހަކު ބުންޏެވެ. "އެމީހުން ބޭނުމެއް ނުވޭ ބަލިމީހުން މިތާނގައި ތިބޭކަށް." އޭނާ ބުނި ގޮތުގައި ހޮސްޕިޓަލުގައި ތިބި ގިނަ ބަޔަކު މިހާރު ވަނި އެތަނުން ބޭރުކޮށްފައެވެ. މިހާރު ތިބީ ވޯޑުތުކުގައި އެޑްމިޓްކޮށްފައި ތިބި މީހުން އެކަންޏެވެ.
ފާއިތުވި އެޕްރީލް މަހުގެ 11 ވަނަ ދުވަހު ގެނައި އިންގިލާބެއްގައި ރައީސު ޢުމަރު ޙަސަން އަލްބަޝީރު މަގާމުން ދުރުކުރުމަށް ފަހު ސޫދާނުގައި ވެރިކަން ކުރަމުން އަންނަނީ އިންތިގާލީ އަސްކަރީ ކައުންސިލަކުންނެވެ. އަލްބަޝީރުގެ އިސްތިއުފާދިނުމަށް ގޮވާލައި ޑިސެންބަރު މަހުއްސުރެ ކުރިއަށް ދިޔަ އިހުތިޖާޖު އަސްކަރީ އިންގިލާބަށް ފަހު ވަނީ މަދަނީ ބަޔަކާ ވެރިކަން ހަވާލުކުރުމަށް ގޮވާލާ އިހުތިޖާޖަކަށް ބަދަލުވެފައެވެ.
ހޯމަ ދުވަހު ލާއިންސާނީ ގޮތަކަށް އެ އިހުތިޖާޖު ރޫލާލުމާއެކު މިހާރު ސޫދާނުގައި ވަނީ މަދަނީ ބަސްނޭހުމެއް ފަށާފައެވެ.
