(20 މެއި 2019 ގައި ޝާއިއުކުރި ބަޔާ ގުޅޭ)
އެ ދެ މީހުން ފިޔަވަޅެއް ކުރިއަށް އަޅައިފައި ހުއްޓުނެވެ. ދެން އެނބުރިފައި ޓެރަހާއި ދިމާއަށް ބަލައިލިއެވެ. ޝަންކަރު ޓެރަހުގައި ހުންނާނެކަން ހިންމަތު ރާއޯއަށް ކުރިއްސުރެ ވެސް އެނގެއެވެ. އެނބުރިފައި ބަލައިލުމުން ރޫޕުވަތީގެ މޫނު ދުރުމީގެ ލޮލުން ފާޅުކޮށް ހިނިތުންވާން ފެށިއެވެ. އޭނާ ހުރީ ވަރަށް ބޮޑަށް އުފަލުން ފޮޅިފައެވެ. ގިޔާމަތް ބަލިކޮށްލުމަށް ފަހު މިހާރު ވެސް އާ ދުނިޔޭގެ ބިމުން ބައެއް އޭނާގެ ނަމުގައި ލިޔުއްވައިފައި ވާ ކަހަލައެވެ.
ޝަންކަރުގެ އަތުން ދުރުމި ދޫވެގެން ކަރުގައި އެލުނެވވެ. އޭނާގެ ސިކުނޑީގައި އެޅުނު އެތިފަހަރުގެ ވަރުގަދަކަމުން ކުރިމަތިން ފެންނަ ހުރިހައި އެއްޗެއް އެނބުރެންފެށިއެވެ. އެ ދެ މީހުން ފުރަންވެގެން އޭނާއާ ދިމާއަށް އަތްހޫރަނީއެވެ. ހޫރަމުން ދާ އަތް ހީވަނީ މޫނުމަތީގައި ތަފާލެއް އަޅަންވެގެން ހޫރާ އަތެއް ހެންނެވެ. ބައެއް ހަގީގަތަކީ މޫނުމަތީގައި ތަފާ އަޅާ އެއްޗެކެވެ. އެހެންނަމަވެސް ދެންވެސް ޔަގީންކުރާކަށް ހިތެއް އެއްބަހެއް ނުވެއެވެ. އޭނާގެ ސިކުނޑިއަށް ގުޑުން އެރިއެވެ. ހިތް ކުދިކުދިވަނީއެވެ. އެހެންނަމަވެސް އޭނާ އެތެރެއިން ހަޅޭއްލަވަނީއެވެ. އޭނާގެ ހުޅުވިފައި ހުރި ދެ ލޮލުގެ ކުރިމަތީގައި ވަނީ ހެއްވާ ހުވަފެނެއްކަމަށެވެ. އެ ދެ މީހުން ލޯމަތިން ގެއްލުނީ ކޮން އިރަކު ކަމެއް ނޭނގެއެވެ. އަދި ބޯޓަށް އަރައި އިށީނީ ކޮން އިރަކު ކަމެއް ވެސް ނޭނގެއެވެ. އެ މީހުން ލޯމަތިން ގެއްލުމުން ޝަންކަރުގެ ލޮލުން ކަރުނައައެވެ. "ބައްޕާއެވެ! ބައްޕާއެވެ! ބައްޕަ ކުޅޭ އެއްޗެހި ބައްލަވައިގަންނަވައިގެން އަޅުގަނޑަށް ގެނެސްދެއްވަމުއެވެ. މިއަދު އަޅުގަނޑު އަތުން އަތުލައްވައިގެން ތިޔަ ދުރުވަނީ ކީއްވެގެންތޯއެވެ؟ ބައްޕާއެވެ! އަޅުގަނޑު ބައްޕައަށް ބައްޕާއޭ ކިޔާނީ ކިހިނެއް ހެއްޔެވެ؟"
މަތިންދާބޯޓު ދުއްވައިލައިފިއެވެ. ބޯޓު ބިމުން މައްޗަށް އުފުލެން ފެށީ ހިތުގައި ވޭން އުފުލެން ފެށި ހެންނެވެ. ރޫޕުވަތީއާއި ހިންމަތު ރާއޯ އުދުހެނީ ވަރަށް މަތިންނެވެ. ޝަންކަރު ހުރީ ބިންމަތީގައެވެ. ކަރުނައިން ފުރިފައިވާ ލޮލަށް ބޯޓު ގެއްލެން ފެށުމުން އޭނާ އުޑާ ދިމާއަށް ދެ އަތް އުފުލައިފައި ޖޯޑުކޮށްލިއެވެ. ދެން މަޑުމަޑުން ބުންޏެވެ.
"އާ މަންމަ އަށް ސަލާމް..."
ދުންތަރި ބިމާ ދިމާއަށް އަންނަ ޔަގީން އައުން އާންމުންނަށް ވަނީ ވަންހަނާކޮށްފައެވެ. ލޯބިވެރިއަކު ހުއްދަ ނޫން ބައްދަލުވުމަކަށް އަންނަ އައުން ވަންހަނާކުރާ ފަދައިންނެވެ. އެކަމަކު މި ގޮތަށް އަންނަ އައުމުގައި ގިނަ ފަހަރަށް ކަންތައް ވާ ގޮތަކީ އޭނާ އަންނާނީ ސިއްރުސިއްރުންނެވެ. މަޑުމަޑުން ފިޔަވަޅުއަޅާ އިރު ފައިގެ ގިގުނީގެ އަޑު އިވޭނީ މަޑުމަޑުންނެވެ. މި ގޮތުން ވާހަކަ މަޑުމަޑުން ދެކެވެމުން ކުރިއަށް ދެއެވެ.
ފަހަރެއްގައި ވެސް ގަސްދުގައި ސިއްރު ދުލުން ބޭރެއް ނުކުރެއެވެ. މަޖުބޫރުވެފައިވާ ހާލަތްތަކުގައި ވާ ގޮތަކީ ބައެއް މީހުން ލޯބިން މަޖުބޫރުވެގެން ތިމާގެ ލޯބިވެރިޔާ ގާތު ބުނަނީއެވެ. އެހެން މީހެއް ގާތު ނުބުނާން ކަމަށް ލޯބިވެރިޔާ ހުވާކުރާނެއެވެ. އެކަމަކު ތިމާގެ ބޮލުން ބަރު ލުއިކޮށްލުމަށް ފާރު ގާތު ބުނަނީއެވެ. އެ އަޑު ފާރުގެ އަނެއް ފަރާތުން އަވައްޓެރިޔާ އަހަނީއެވެ. ދެން އޭނާ އޭނާގެ އަވައްޓެރިޔާ ގާތު ބުނަނީ އެވެ. ފިރިހެނުންގެ ހިތުގައި ހުންނަ ދުނިޔޭގެ މުހިންމު ސިއްރުތައް މި ގޮތަށް އަންހެނުންގެ ދުލަށް އައިސް ހާމަވަމުން ދެއެވެ. އެ ސިއްރު އަންހެނުންގެ ދުލަށް ފޮރުވައިދެނީ ފިރިހެނުންނެވެ.
ކޮންމެއަކަސް އެއް މަސް ދުވަހުގެ ތެރޭގައި މަގުތަކާއި ބާޒާރުތަކާއި ޖައްވު ސިއްރު ވާހަކަތަކުން ފުރުނެވެ. މީހުން ދައްކަނީ އެހެން ވާހަކައެކެވެ. އަޑުއަހަނީ އެހެން ވާހަކައެކެވެ. ދޭހަވަނީ އެހެން ވާހަކައެކެވެ. އެކަމަކު ދޭހަވާ ވާހަކަ ކަށަވަރެއް ނުވެއެވެ. މައުލޫމާތުގެ ޒަރީއާތައް ނެތުނު ކަހަލައެވެ. މިހައިތަނުން އަނެއްކާ، ނޫހާއި ރޭޑިއޯއާއި ޓީވީއާއި މައުލޫމާތުފެތުރުމުގެ މުހިންމު ހުރިހައި އިދާރާއެއްގައި ސެންސަރު ފޯރިމަރަމުންދާ ގޮތާ މެދު ސުވާލުއެފެދުނެވެ.
ފެންނަ ގޮތުގައި ހަގީގަތް ފޮރުވެއެވެ. އެކަމަކު ނޫސްވެރީންގެ އިޝާރާތްތަކާ މެދު ވިސްނުމަށް އާންމުންނަށް ވަނީ ވަރަށް ބޮޑަށް މަޖުބޫރުވެފައެވެ. މަޑުމަޑުން ގޮސް ދެ މަސް ފަހުން ސިޔާސަތުގެ ޖައްވު ބަދަލުވިއެވެ. ހުރިހައި ގައުމެއްގެ ޚާރިޖީ ޕޮލިސީއަށް ހައިރާން ވާ ފަދަ ބަދަލުތަކެއް އަންނަން ފެށިއެވެ. ހުރިހައި ބޮޑެތި ބާރުތައް، ދުޝްމަންކަން ދޫކޮށްލައިފައި އެކުވެރިކަމުގެ އެއްބަސްވުންތަކުގައި ސޮއިކުރަނީ އެވެ. އެހެންނަމަވެސް ގިޔާމަތް ކައިރިވެފައި ވާ ކަމެއް އާންމުންނަކަށް ނުވިސްނެއެވެ. ހަމަ އެހެންމެ ބޮޑެތި ގައުމުތައް އެއް ގައުމު އަނެއް ގައުމަށް ތިން ވަނަ ބޮޑުހަނގުރާމެއްގެ ބިރު ނުދައްކައި ތިބޭނީ ހަމައެކަނި ދެ މަހާއި ހަތާވީސް ދުވަސް ވަންދެން ކަމެއް ވެސް ނުވިސްނެއެވެ. މިހާރު އެ ގައުމުތައް އެކުވެގެން ރޭވޭނީ ގުލޯބު އާކުގެ ރޭވުމެވެ.
ކުދި ގައުމުތަކާއި ތަރައްގީވަމުން އަންނަ ގައުމުތަކުގެ ހިތްހަމަޖައްސައިދިނުމަށް އެބައިމީހުންގެ ތަރައްގީއަށް ބޮޑެތި ގައުމުތަކުން ދީލަތިކަން ބަހައްޓަނީއެވެ. އެއްބަސްވުންތަކުގައި ސޮއިކުރެވެނީއެވެ. ކުދި ގައުމުތަކުގެ ދަނޑުވެރިކަމާއި މަސައްކަތްތެރިކަން ކުރިއަށްގެންދިއުމަށް ސޫދެއް ނެތި ލޯނުދޭނެކަމަށް އެ އެއްބަސްވުންތަކުގައި ވެއެވެ. ލޯނުދޫކުރާ ތާރީޚަކީ 28 ޑިސެންބަރެވެ. މި ކަހަލަ ވާހަކަތަކަށް ޅެންވެރީން ކިޔާނީ ގިޔާމަތުގެ ވައުދެވެ.
އުފެއްދުންތެރިކަމުގެ ފަންނު ލިބިފައި ތިބި އިންޖިނޭރުންނާއި މަސައްކަތުމީހުން ބަހާމާ ޖަޒީރާގައި ތޮއްޖެހިފައި ވެއެވެ. ޖަޒީރާގެ ދެކުނު ފަރާތު ފަޅުގައި ގުލޯބު އާކު ނުހަނު ފުރިހަމަކަމާ އެކު ފުރިހަމަވުމުގެ މަރުހަލާތައް ކަޑައްތުކުރަމުން ދެއެވެ. މީހުން ރެއާއި ދުވާލު ތިބެނީ މަސައްކަތުގައި މަޝްޣޫލުވެގެންނެވެ. އެ ރަށުގައި ރޭގަނޑު ވެސް ދުވާލެކޭ އެއްފަދައެވެ. އެތަކެއް ހާސް އުއްބައްތީގެ ބާރުގެ ބޮޑެތި ބޮކިތައް ދިއްލައިފައި ހުރެއެވެ. މަސައްކަތްކުރާ މީހުންނަށް ކާކޮޓަރިއާއި ރާކޮޓަރި އަބަދު މެ ހުންނަނީ ހުޅުވިފައެވެ. އެ މީހުން ކަނީ ހިލެއެވެ. މަސައްކަތްކުރަނީ ބޮޑުމުސާރައަށެވެ. އެ މީހުންގެ މަސައްކަތަކީ ވަރަށް މުހިންމު ނިންމުމެއް ފުރިހަމަކުރުމެވެ.
އެ ހިސާބުން މޭލެއްގެ ދުރުމިނުގައި ވަރަށް ގިނަ ކޮޓެޖު ހަދައިފައި ހުއްޓެވެ. އެއް ކޮޓެޖުގެ ތިން ކޮޓަރީގައި ހާތޯރާއާއި މެޑަމް ފުލެޗަރާއި ޚޫރުޝީދު ބަލްގުރާމީ ތިބީ ބަންދުކޮށްފައެވެ. ދިރިއުޅުމުގެ ހުރިހައި ފަސޭހައެއް އެ ތަނުން އެ މީހުންނަށް ލިބެއެވެ. ކޮޓެޖުގެ ތަނަވަސް ބަގީޗާގައި ހިނގުމުގެ ހުއްދަ ވެސް އޮވެއެވެ. އެކަމަކު އެއަށް ވުރެން ދުރަކަށް ނުދެވޭނެއެވެ. އަދި އިންޖިނޭރަކާ ނުވަތަ މަސައްކަތުމީހަކާ ވާހަކައެއް ނުދެއްކޭނެއެވެ. ގުލޯބު އާކު ބަންނަމުން ގެންދަނީ ކޮން މަގުސަދެއްގައި ކަމެއް މަސައްކަތުމީހުންނަކަށް ނޭނގެއެވެ. ކޮޓެޖު ވަށައިގެން ހަތިޔާރުއެޅި ސިފައިން ފޯރިއަށް ތިބެއެވެ.
ހާތޯރާގެ ފައިގެ ފާރުގަނޑު ރަނގަޅުވެއްޖެއެވެ. އޭނާ މިހާރު ހިނގަނީ ކުޑަކޮށް ކޮރުޖަހަމުންނެވެ. މެޑަމް އެ ތަނަށް ގެންދިޔައީއްސުރެން އުޅެނީ ބަލިވެއެވެ. އެނދަކުން ނުތެދުވެއެވެ. އޭނާއަށް ގަވާއިދުން ފަރުވާކުރެވެމުން ދެއެވެ. ބޭސް ކާންދެއެވެ. އެކަމަކު ހިތުގެ ފާރުގަނޑު ފަސޭހައެއް ނުވެއެވެ. އޭނާ އެނދުގައި އޮވެގެން އިރުއިރުކޮޅުން ކުޑަދޮރުން ބޭރު ބަލައިލައެވެ. ދުރުން ވަރަށް ދުރުން ނުހަނު އުސްކޮށް ގުލޯބު އާކު ފެންނަން ހުއްޓެވެ. އެ ގުލޯބު އާކު މެޑަމަށް ބިރު ދައްކަނީއެވެ. ގުލޯބު އާކުގެ މުށުތެރެއަށް ލައިގެން އޭނާގެ މާމަދަރި ލޯރާއާ ދުރަށް ގެންދާނެ ކަމަށެވެ. ޚޫރުޝީދު ބަލްގުރާމީ އޭނާ ހިތްހަމަޖައްސައިދެއެވެ.
"މެޑަމް! ތިޔަ ފިކުރުތަކާއި ހާސްވުމަކަށް މެޑަމުގެ ދަރިފުޅާއި ޅީދަރިއާއި މާމަދަރި ގާތަކަށް މެޑަމެއް ގެންގޮހެއް ނުދެވޭނެ. މި ތާނގައި އިންސާނުން ވަރަށް ގިނަ އެއްޗެހި ވިސްނާ. ވަރަށް ގިނަ ކަންތައް ކުރޭ. އެކަމަކު ކަންތައް ވާނީ ﷲގެ އިރާދައިގައި ހުރި ގޮތަކަށް. ﷲ އިރާދަކުރެއްވިއްޔާ މެޑަމަށް މެޑަމުގެ ގޭގެ ސުވަރުގެއަށް ދުރުވެވޭނެ."
ބައެއް މީހުން އެހެން މީހުންނަށް ހިތްވަރުދިނުމަށް އާދަވެއެވެ. ޚޫރުޝީދު ބަލްގުރާމީ ވެސް އޭނާގެ އާދައިގެ މަތިން މެޑަމަށް އެއްފަހަރު ހިތްވަރުދިނެވެ. ދެން އޭނާގެ ހިތަށް އެރިއެވެ. މެޑަމަކީ އާދައިގެ އަންހެނެއް ނޫނެވެ. ހިތްވަރުދިނުމަކުން އޭނާ ހިތްހަމައެއް ނުޖެހޭނެއެވެ. އެ ދައިތަގެ އަތްތިލައިގެ ލޯގަނޑުން އެ ދައިތަގެ މުސްތަގުބަލު މިހާރު އޮންނާނީ ބަލައިފައިކަން ނޭނގެއެވެ. އެ ބައެއްގެ ކުރިމަތީގައި މުސްތަގުބަލުގެ އުފާވެރި ޚަބަރު އޮންނަ މީހުންނަށް އެހެން މީހުންނަކަށް ހިތްވަރެއް ނުދެވޭނެއެވެ.
މެޑަމާއި ޚޫރުޝީދު ބަލްގުރާމީއަކަށް ޣައިބުގެ ޚަބަރެއް ނޭނގެއެވެ. އެހެނީ ޣައިބުގައި ވާ ކަންތައް ދެނެވޮޑިގަންނަވާނީ ހަމައެކަނި ﷲއެވެ. އެކަމަކު އެބައިމީހުންގެ ޢިލްމު، އެބައިމީހުންގެ ކުރިމަތީގައި މުސްތަގުބަލުގެ އޮނިގަނޑެއް ކުރަހައިލެވޭ މިންވަރަށް އެބައިމީހުންނަށް މުސްތަގުބަލުގެ އިޝާރާތްކުރެއެވެ. މި ކަންކަން ނޭނގެނީ ހަމައެކަނި ހާތޯރާއަށެވެ. އޭނާ އެ ނުޖޫމީންނަށް އަތް ދައްކަން ވެސް ޖެހިލުންވެއެވެ. އޭނާގެ ސޯމުނާ އޭނާއަކަށް ނުލިބޭނެއޭ އެ މީހުން ފަހަރެއްގައި ބުނެފާނެތީއެވެ.
އިތުރު ދެ މަސް ފާއިތުވެއްޖެއެވެ. ޑިސެންބަރު 15ގައި ގުލޯބު އާކު ބަނދެ ނިމިއްޖެއެވެ. މަސައްކަތްކުރި މީހުން ހަމަ އެ ރެއިން ފެށިގެން އަނބުރައި ފޮނުވަން ފެށިއެވެ. ބޭނުން ނެތް މީހުން ރަށުން ބޭރުކުރަމުން ދަނީއެވެ. ކޮންމެހެން ބޭނުންވާ މީހުން ހެލިކޮޕުޓަރުގައި އެ ރަށަށް އަންނަނީއެވެ. ދެ ގަޑިން ދެ ގަޑިން ފަސިންޖަރުން އުފުލާ ހެލިކޮޕުޓަރަކާއި މުދާ އުފުލާ ހެލިކޮޕުޓަރެއް އެ ރަށަށް އާދެއެވެ. އެ މުހިންމު މީހުންގެ ތެރޭގައި ހިންމަތު ރާއޯއާއި ރޫޕުވަތީ ވެސް ހިމެނެއެވެ. މުހިންމު ހުރިހައި މީހުންނަށް ވަކިވަކިން ކޮޓެޖު ޚާއްޞަކުރެވުނެވެ. މި މީހުން އައުމުން އެ ރަށަށް ބަހާރު އައި ކަހަލައެވެ. އެ ގޮތަކީ އެ މީހުންގެ ތެރޭގައި ދުނިޔޭގައި ތިބި އެންމެ ރީތި އަންހެނުން ހިމެނެއެވެ.
ހިންމަތު ރާއޯ ހެލިކޮޕުޓަރުން ފައިބައިގެން ރޫޕުވަތީއާ އެކު އޭނާގެ ކޮޓެޖާ ދިމާއަށް ދިޔައެވެ. އެއް ނަންބަރު ކޮޓެޖު ކައިރިން ދިޔަ ވަގުތު ރޫޕުވަތީ ކުޑަކޮށް ހުއްޓިލިއެވެ. ކޮޓެޖު ވަށައިގެން، ހަތިޔާރު އެޅި ސިފައިން ތިއްބެވެ. ޚޫރުޝީދު ބަލްގުރާމީއާއި ހާތޯރާ ބަގީޗާގައި ވާހަކަދައްކަން ތިއްބެވެ. ރޫޕުވަތީ ސުވާލުކުރިއެވެ.
"އެއީ ކޮން ބައެއް؟"
(ނުނިމޭ)
