މީގެ 65 އަހަރު ކުރިއްސުރެ އިންޑިޔާގެ ގާނޫނު އަސާސީގައި ކަޝްމީރުގެ އިންޑިޔާ ފަޅިއަށް ދީފައިވާ ޚާއްސަ ހައްގުތައް އުވާލުމަށް އިންޑިޔާގައި މިހާރު ވެރިކަންކުރާ ޕާޓިން ވައުދުވެއްޖެއެވެ.
އިންޑިޔާގައި މި އޭޕްރީލް މަހުގެ 11 ވަނަ ދުވަހު ފެށޭ އާއްމު އިންތިޚާބަށް ބޮޑުވަޒީރު ނަރެންދްރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އިން ނެރުނު މެނިފެސްޓޯގައި ވައުދުވެފައި ވަނީ އިންޑިޔާގެ ގާނޫނު އަސާސީގެ މާއްދާ 35A އުވާލުމަށެވެ.
1954 ވަނަ އަހަރު، އޭރު އިންޑިޔާގައި އޮތް ޖަވާހަރްލާން ނެހްރޫގެ ސަރުކާރުގެ ލަފާގެމަތިން، ރައީސު ރާޖެންދްރަ ޕްރަސާދުގެ ރިޔާސީ އަމުރަކުން ގާނޫނު އަސާސީއަށް އިތުރުކުރި މައްދާ 35A ގައި ވާގޮތުން އަންނަވި ހައްގުތަކަކީ ހަމަ އެކަނީ ޖައްމޫ އެންޑް ކަޝްމީރު (ކަޝްމީރުގެ އިންޑިޔާ ފަޅި) ގެ ރަށްވެހިންނަށް ޚާއްސާވެންގެންވާ ކަންކަމެވެ.
- ކަޝްމީރުގައި ނުއުފުލޭ މުދާ މިލްކުކުރުން
- ކަޝްމީރު ސަރުކާރުގެ ވަޒީފާއެއް އަދާކުރުން
- ކަޝްމީރު ސަރުކާރުން ހިންގާ ނުވަތަ ސަރުކާރުން ޚަރަދުކޮށްގެން އަމިއްލަ ފަރާތްތަކުން ހިންގާ ޕްރޮފެޝަނަލް ކޮލެޖެއްގައި ކިޔެވުން.
ބީޖޭޕީގެ މެނިފެސްޓޯގައި ވާގޮތުން "މާއްދާ 35A އަކީ އެ ސްޓޭޓްގެ ތަރައްގީއަށް އޮތް ހުރަހެކެވެ."
މިއަދު ދިއްލީގައި ނެރުނު މެނިފެސްޓޯއަކީ ހިންދޫ ވަޠަނީންނަށާއި ދަނޑުވެރިންނަށް އަމާޒުކޮށްފައިވާ މެނިފެސްޓޯއެކެވެ. ކަޝްމީރަށް ދީފައިވާ ޚާއްސަ ހައްގުތައް ނިގުޅައިގަންނަ ވާހަކަދައްކަނީވެސް ހިންދޫ ވަޠަނީން ރުއްސުމަށެވެ.
"އަހަރުމެންގެ ހިތްވަރަކީ ވަޠަނިއްޔަތު" ކުލަގަދަ ރަސްމިއްޔާތެއްގައި ބީޖޭޕީގެ މެނިފެސްޓޯ ނެރުއްވުމަށް ފަހު މޯދީ ވިދާޅުވިއެވެ.
އިންޑިޔާއަކީ ވަކިދީނަކަށް ހިތްވަރު ނުދޭ ޢަލްމާނީ (ސެކިއުލާ) ދައުލަތެއްކަން 1976 ވަނަ އަހަރު ގާނޫނު އަސާސީއަށް ގެނައި 42 ވަނަ އިސްލާހުން ކަށަވަރުކޮށްދީފައި ވިޔަސް ކަނާތު ފިޔައިގެ ހިންދޫ ވަޠަނީ ޚިޔާލުގެ މައްޗަށް އުފެދިފައިވާ ބީޖޭޕީން މަސައްކަތްކުރަނީ ހިންދޫ ވަޠަނިއްޔަތު ކުރިއެރުވުމަށެވެ. މިފަހަރު މެނިފެސްޓޯގައި ވެފައިވާ 75 ވައުދުގެ ތެރޭގައި މިފަދަ ބައެއް ވައުދު ވާކަން ފާހަގަކުރެވެއެވެ.
މެނިފެސްޓޯގައިވާ މިފަދަ އެއް ވައުދަކީ "ވީހާވެސް އަވަހަކަށް ސުލްހަވެރި ގޮތެއްގައި" ހިންދޫ ކަލާނގެ ރާމާއަށް ނިސްބަތްވާ ބޮޑު ފައްޅިއެއް އެޅުމުގެ ވައުދެވެ. އަނެއް ވައުދަކީ އަވަށްޓެރި ގައުމުތަކުގެ ހިންދޫންނަށް އިންޑިޔާގެ ރަށްވެހިންނަށް ވެވޭގޮތަށް ރަށްވެހިވުމާ ބޭހޭ ގާނޫނު އިސްލާހުކުރުމެވެ.
އިދިކޮޅު ކޮންގްރެސް ޕާޓީން ބުނީ އެ ޕާޓީއަށް ވެރިކަން ލިބިއްޖެއްޔާ މާއްދާ 35A ހިމާޔަތްކުރާނެ ކަމުގައެވެ.
އިންޑިޔާގެ ގާނޫނު ހަދާ މަޖިލީހުގެ ތިރީގެ، ލޯކްސަބާއަށް 543 މެންބަރުން ހޮވުމަށް ބުދަ ދުވަހު ފަށާ އާއްމު އިންތިޚާބުގައި 900 މިލިއަން ވޯޓުލާނެއެވެ.
