މާލޭ ސިޓީގައި ދިރިއުޅޭ މީހުން ޗުއްޓީގައި ދަތުރު ދިއުމަށް މާލެއާ ކައިރިން ޚާއްޞަ ކުރައްވާފައިވާ ރަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިއަދު އިއުލާނު ކޮށްދެއްވައި، ރަށުގެ ކޮންސެޕްޓް އިފްތިތާހު ކޮށްދެއްވައިފިއެވެ.
ނޭޝަނަލް އާޓުގެލެރީގައި މިއަދު މެންދުރުފަހު ބޭއްވި ރަސްމިއްޔާތުގައި ރައީސް އިޢުލާން ކުރެއްވި ރަށަކީ މާލެއިން ފުރައިގެން 15 މިނިޓުން ދެވޭހާ ކައިރީގައިވާ އެނބޫދޫ ފަޅުގައި ތަރައްޤީ ކުރާ ރަށެކެވެ. އެ ރަށަކީ ތައިލެންޑްގެ ކުންފުންޏެއް ކަމަށްވާ ސިންގހާ އެސްޓޭޓުން އެބޫދޫ ފަޅުގައި ތަރައްޤީކުރާ ކްރޮސް ރޯޑްސް ޕްރޮޖެކްޓްގައި ހިމެނޭ ބައެއް ކަމަށް ރައީސް އޮފީހުން ވިދާޅުވިއެވެ. ސަރުކާރާ ގުޅިގެން ސިންގހާ އެސްޓޭޓުން މި "ޕިކްނިކް އައިލެންޑް" ތަރައްޤީ ކުރާނީ، ކުޅިވަރު ކުޅުމަށާއި، މުނިފޫހިފިލުވުމުގެ ހަރަކާތްތަކަށާއި، އަދި ކުޑަކުދީންނަށް ޚާއްޞަކުރެވިފައިވާ މި ޒަމާނުގެ ހުރިހާ ލުއިފަސޭހަތަކާއި ޚިދުމަތްތައް ހިމެނޭ ގޮތަށް ކަމަށް ވެސް ރައީސް އޮފީހުން ވަނީ ވިދާޅުވެފައެވެ.
ި ސަރުކާރުގެ ފުރަތަމަ ދުވަހުން ފެށިގެންވެސް މާލެ ސަރަޙައްދުގައި ދިރިއުޅޭ މީހުންނަށް ހިތްފަސޭހަ ދިރިއުޅުމެއް ހޯދައިދެއްވުމަށް މުހިންމު މަސައްކަތްތަކެއް ސަރުކާރުން ކުރައްވާފައިވާކަމަށް ރައީސް މިއަދު ވިދާޅުވިއެވެ. އެގޮތުން މާލޭގެ ވަކި މަގުތަކެއް ހުކުރު ދުވަހުގެ ހެނދުނު ބަންދުކޮށް، ޢާއިލާ އާއި ކުޑަކުދީންނަށް ޖަޒީރާ ދިރިއުޅުމެއްގެ ފުރުސަތު ފަހި ކޮށްދެއްވުމަކީ ސަރުކާރުން އެޅުއްވި މުހިންމު ފިޔަވަޅެއް ކަމުގައި އެމަނިކުފާނު ވިދާޅުވިއެވެ. އަދި، ސަރުކާރުގެ މި ސިޔާސަތުގެ ދަށުން، މާލޭގައި ހުސް ޖާގަ އިތުރުކޮށް، އާންމުންގެ ބޭނުމަށް ބިންކޮޅެއް ހަމަޖެއްސެން އޮތްނަމަ، އެތަންތަން ޕާކްތަކަށް ބަދަލުކުރައްވަމުން ގެންދަވާ ކަމުގައިވެސް އެމަނިކުފާނު ވިދާޅުވިއެވެ.
މާލޭގައި ދިރިއުޅޭ ރައްޔިތުން ރަށު ބަންދުން ވީއްލި، ހިތްއުފާކޮށްލަން ދާނެ ތަނެއް ހަމަޖައްސައިދެއްވުމަށްޓަކައި ސަރުކާރުން ކުރެއްވި މަސައްކަތްތަކުގެ ނަތީޖާއެއްގެ ގޮތުން، އެނބޫދޫ ފަޅުގައި ތަރައްޤީކުރާ ރަށްތަކުގެ ތެރެއިން، ދަތުރު ދިޔުމަށްޓަކައި ވަކި ތަނެއް ހަމަޖެއްސުމަށް ސިންގހާ އެސްޓޭޓްއާއެކު ސަރުކާރުން އެއްބަސްވެފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މި އަހަރު ނިމެންވާއިރަށް، އެ ރަށަށް ދަތުރު ދިއުމުގެ ފުރުސަތު ހުޅުވައިލެއްވޭތޯ ސަރުކާރުން މަސައްކަތްކުރައްވަމުން ގެންދަވާ ކަމުގައި ވިދާޅުވިއެވެ. އަދި، މިކަމުގެ ސަބަބުން، މާލޭގައި ދިރިއުޅޭ ރައްޔިތުންނަށް މިހާރު އެކި ގޮތްގޮތުން ކުރިމަތިވެފައިވާ މައްސަލަތަކަށް ވަރަށް ބޮޑު ލުޔެއް ލިބިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މާލޭ ސިޓީގެ ރައްޔިތުން ދަތުރު ދިއުމަށް މާލެއާ ކައިރިން ރަށެއް ޚާއްޞަ ކޮށްދެއްވުމަކީ، ރާއްޖޭގައި އިޖުތިމާއީ ހަމަޖެހުން ކަށަވަރުކުރުމަށްޓަކައި، ސަރުކާރުގެ ފުރަތަމަ 100 ދުވަހުގެ ތެރޭގައި ފުއްދުމަށް ކަނޑައަޅާފައިވާ މުހިންމު ވައުދެކެވެ.
