ރާއްޖޭގެ ކުރީގެ ރައީސުލްޖުމްހޫރިއްޔާ އަދި ޕީޕީއެމްގެ ރައީސް ޢަބްދުﷲ ޔާމީން ޢަބްދުލްޤައްޔޫމް ޖަލުން މިނިވަން ވުމަކީ ލިބުނު ވަރަށްބޮޑު ހިތްވަރަކާއި އުފަލެއް ކަމަށް ޕީޕީއެމުން ވިދާޅުވެއްޖެއެވެ.
އެޕާޓީގެ ޕާލިމެންޓްރީ ގްރޫޕުގެ ލީޑަރު އަޙުމަދު ނިހާން ޙުސައިންމަނިކު ވިދާޅުވީ ރައީސް ޔާމީން ޖަލަށް ލެއްވުމަކީ ޕްރޮގްރެސިވް ކޯލިޝަންގެ ވަރަށްގިނަ ކެންޑިޑޭޓުންގެ ޙައްގުތަކަށް ހުރަސް އެޅުނުކަމެއް ކަމަށެވެ.
"ރައީސް ޔާމީން މިނިވަންވުމަކީ ލިބުނު ވަރަށްބޮޑު އުފަލެއް. އެއީ ވަރަށްގިނަ ކެންޑިޑޭޓުންގެ ޙައްގުތަކަށް ހުރަސްއެޅިފައި އޮތުމަށްފަހު ލިބުނު ހިތްވަރެއް،" ނިހާން ވިދާޅުވިއެވެ.
ރައީސް ޔާމީނާ ދެކޮޅަށް އުފުލައިފައިވާ މަނީ ލޯންޑްރިންގެ މައްސަލަ ނިމެންދެން އެމަނިކުފާނު ބަންދުގައި ބެހެއްޓުމަށް ކްރިމިނަލް ކޯޓުން ޙުކުމް ކުރައްވައިފައިވަނީ ފެބުރުއަރީ 18 ވަނަ ދުވަހުއެވެ. އެ މައްސަލަ އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފް ކުރެއްވުމުން އެ ކޯޓުން އެމަނިކުފާނު މިނިވަން ކުރެއްވީ އިއްޔެވެ.
ހައިކޯޓުން ރައީސް ޔާމީން މިނިވަން ކުރެއްވިއިރު މާރިޗު 13 ވަނަ ދުވަހުން ފެށިގެން އެމަނިކުފާނު ހުންނެވީ ގޭބަންދުގައެވެ. އެމަނިކުފާނު ގޭބަންދަށް ބަދަލު ކުރެއްވީ ސިއްޙީ ސަބަބުތަކަށްޓަކައެވެ.
މަޢުލޫމާތު ލިބިފައިވާ ގޮތުގައި ރައީސް ޔާމީންގެ ސިއްޙީ ޙާލަތު ރަނގަޅު ކަމަށްވާނަމަ ކެންޑިޑޭޓުންގެ ކެމްޕޭން ޙަރަކާތްތަކުގައި އެމަނިކުފާނު ބައިވެރިވެ ވަޑައިގަންނަވާނެއެވެ.
