ސިފައިންގެ ފަސްދޮޅަސް ހަތަރު ވަނަ އަސާސީ ތަމްރީނު ކޯހުގެ ދަރިވަރުން ސިފައިންގެ ހުވާ ކުރުމާއި ބަޑި ހަވާލުކުރުމުގެ ރަސްމިއްޔާތު ބާއްވައިފިއެވެ.
ކަޅުތުއްކަލާކޮށި ހެވިކަމުގެ މައިދާނުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވީ ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުޙައްމަދު ޞާލިހެވެ.
މި ރަސްމިއްޔާތުގައި ހުވަޔަކީ ކޮބައިކަމާއި، ހުވައިގެ މުހިންމު ކަމާ، ބެހޭގޮތުން ވާހަކަފުޅު ދައްކަވައި، ދަރިވަރުންނަށް ހުވައި ލައިދެއްވީ ސްޕްރީމް ކޯޓުގެ ފަނޑިޔާރު، އަލްއުސްތާޛު އާދަމް މުޙައްމަދު ޢަބްދުﷲ އެވެ.
މި ރަސްމިއްޔާތުގައި ސިފައިންނަށް ޢަޒުމު ޢަޒުމް ލައިދެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް ޢަބްދުﷲ ޝަމާލެވެ. އޭގެ އިތުރުން، ސިފައިންގެ މީހުންނަށް ބަޑި ހަވާލުކުރާއިރު އަންގާ އެންގުން އިއްވައިދެއްވީ އެމްއެންޑީއެފް ކޮލެޖު އޮފް ޑިފެންސް އެންޑް ސެކިޔުރިޓީ ސްޓަޑީޒްގެ ކޮމާންޑިންގ އޮފިސަރ، ބްރިގޭޑިއަރ ޖެނެރަލް ވައިސް ވަޙީދެވެ.
މި ރަސްމިއްޔާތުގެ ޝަރަފުވެރި މެހެމާނު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވަނީ އަސާސީ ތަމްރީނު ކޯހުގެ ދަރިވަރުންނާ މުޚާޠަބުކުރައްވައި ވާހަކަފުޅު ދައްކަވާފައެވެ. ސިފައިންގެ ހުވަޔާ ބެހޭގޮތުން އެ މަނިކުފާނު ދެއްކެވި ވާހަކަފުޅުގައި މާތް ﷲ ގަންދީ ކުރެއްވި ހުވަޔަކީ، ހަމައެކަނި ވަޒީފާގެ މުއްދަތަށް ދެމިއޮންނަ ހުވަޔެއް ނޫންނަކަމަށާއި ސިފައިންގެ ހުވަޔަކީ، ޤައުމީ ޖިހާދަށް ނުކުތުމުގެ ފުރަތަމަ ފިޔަވަޅު ކަމަށެވެ.
އަދި ޙަޔާތުގެ ކިތަންމެ ކުޑަ ހިނދުކޮޅަކަށްވިޔަސް، ސިފައިންގެ މީހަކަށް ވެވިއްޖެ މީހަކީ، މުޅި ޙަޔާތުގައިވެސް ސިފައިންގެ މީހެއްކަން ހަނދާނުގައި ބަހައްޓަވަންވާނެ ކަމަށް ވިދާޅުވިއެވެ. ވަޒީފާ ބަދަލުވިޔަސް، ރިޓަޔަރ ކުރިޔަސް، އެ ހުވާ ނެތިގެނެއް ނުދާނެ ކަމަށް ވެސް ރައީސް ވިދާޅުވިއެވެ. އެމަނިކުފާނު ވިދާޅުވީ ސިފައިންގެ ހުވާގެ ސަބަބުން، ސިފައިންނާ މަތިކުރެވޭ ޒިންމާތަކާއި މަސްއޫލިއްޔަތު، ދުވަހަކުވެސް ސިފައިންނާއި ވަތްކެއް ނުވާނެ ކަމަށާއި އެއީ، ދާއިމީ ގޮތެއްގައި އެއަށް ޙުރުމަތްތެރިކޮށްހިތައި ވަފާތެރިވާންޖެހޭނެ ވަޢުދެއް ކަމަށެވެ.
މި ރަސްމިއްޔާތުގައި އެމްއެންޑީއެފް ޑްރިލް ސްކޮޑުން ތައްޔާރުކޮށްފައިވާ ޑްރިލް ޑިސްޕްލޭއެއް ވަނީ ހުށަހަޅައިދީފައެވެ.
މިރަސްމިއްޔާތުގައި މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއާއި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާ އާއި ވައިސް ޗީފް އޮފް ޑިފެންސް ފޯސް ބައިވެރިވެލެއްވިއެވެ.
