ސިޔާސީ މަޤާމުތަކާއި، ސަރުކާރުގެ ކުންފުނިތަކުގެ ބޯޑުތަކަށް އައްޔަނު ކުރައްވާ ބޭފުޅުންނަށް ފޯމެއް ތަޢާރަފްކޮށް އެފޯމު ފުރިހަމަކުރައްވާ ގޮތަށް ރައީސުލްޖުމްހޫރިއްޔާ ހަމަޖައްސަވައިފިއެވެ.
މި ފޯމުގައި ހިމެނޭ މަޢުލޫމާތުތަކުގެ ތެރޭގައި، އެ މަޤާމަކަށް އައްޔަނުކުރެވޭ ބޭފުޅެއްގެ ޢާންމު މަޢުލޫމާތާއި، އެބޭފުޅެއްގެ ތަޢުލީމީ ފެންވަރާއި، ތަމްރީނާއި ތަޖުރިބާއާއި، އެބޭފުޅަކަށް ލިބިވަޑައިގަންނަވާ އާމްދަނީއާއި، އެބޭފުޅެއްގެ މުދަލާއި، ފައިސާއާއި، ދަރަނި ހިމެނެއެވެ.
ސިޔާސީ މަޤާމްތަކާއި ކުންފުނިތަކުގެ ބޯޑުތަކަށް އައްޔަން ކުރައްވާ ބޭފުޅުންނަށް އެ މަޤާމުތައް ދެއްވާނީ މިފޯމުގައި ހިމެނޭ އިޤްރާރު، އެބޭފުޅަކު ފުރިހަމަކުރެއްވުމުން، އޭގައިވާ މަޢުލޫމާތުތަކަށް ބެއްލެވުމަށްފަހު ކަމަށް ވެސް ރައީސް އޮފީހުން ވިދާޅުވެފައިވެއެވެ.
މަޢުލޫމާތު ލިބިފައިވާ ގޮތުގައި ރައީސް އިބްރާހީމް މުޙައްމަދު ޞާލިޙު މިގޮތަށް ހަމަޖެއްސެވީ އައްޔަން ކުރެވޭ ބޭފުޅުންގެ ނަޒާޙަތްތެރިކަން ހިފެހެއްޓެވުމުގެ ގޮތުންނެވެ.
