އޮކްޓޯބަރ 29 ވަނަ ދުވަހުގެރޭ އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) އިން ގެއްލިފައިވާ ލެޕްޓޮޕްތަކާއި ބައެއް އިލެކްޓްރޯނިކް ސާމާނު ހޯދައިފި ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވެފައިވަނީ އެތަކެތި ގެއްލިފައިވަނީ އޭރޭ 7:45 އެހައިކަންހާއިރު ކަމަށެވެ. އެތަކެތިނަގައިފައިވަނީ އެތަނުގެ 4 ވަނަ ފަނގިފިލާއިންނެވެ.
އައިޔޫއެމްގެ "ހަތަރުވަނަ ފަންގިފިލާގައި ހުރި ލެޕްޓޮޕްތަކެއް ވަގަށް ގެންގޮސްފައި ކަމަށް ބުނެ ހުށަހެޅި މައްސަލައާ ގުޅިގެން ޖެނެރަލް އިންވެސްޓިގޭޝަން ޑިޕާރޓްމަންޓާއި ފުލުހުންގެ އިންޓެލިޖެންސާ ގުޅިގެން ހިންގި އޮޕަރޭޝަނެއްގައި ވަގަށް ނަގާފައިވާ ލެޕްޓޮޕްތަކާއި ބައެއް އިލެކްޓްރޯނިކް ސާމާނު ވަނީ ހޯދާފައި،" ފުލުހުން ވިދާޅުވެފައިވެއެވެ.
މި މައްސަލައާ ގުޅިގެން ދިވެހި 3 ފިރިހެނަކާއި 5 ބިދޭސީއެއް ވަނީ ހައްޔަރުކޮށްފައި ކަމަށް ވެސް ފުލުހުން ވިދާޅުވިއެވެ. ހައްޔަރު ކުރި 3 ދިވެހި ފިރިހެނުންނަށް ވަނީ 10 ދުވަހުގެ ބަންދުގެ މުއްދަތެއް ކޯޓުން ޖައިދީފައެވެ.
"މި މައްސަލާގައި ހައްޔަރު ކުރި 5 ބިދޭސީންނަކީ ދިވެހިރާއްޖޭގެ އިމިގްރޭޝަން ޤާނޫނާއި ދިވެހިރާއްޖޭގައި ހެދިފައިވާ ޤާނޫނުތަކާ ޚިލާފަށް އުޅެމުންދާ ބަޔަކަށްވާތީ އެ މީހުން އިމިގްރޭޝަނާ ޙަވާލުކުރުމަށް ވަނީ ނިންމާފައި،" ފުލުހުން ވިދާޅުވެފައިވެއެވެ.
އައިޔޫއެމްއިން ވަގަށްނަގައުފައިވަނީ އެތަނުގެ އެކެޑަމިކް މުވައްޒަފުން ބޭނުންކުރާ ލެޕްޓްޕްތަކެވެ. އެތަކެތި ފެނުނުތަނެއް ފުލުހުން ހާމަކުރައްވައިފައެއް ނުވެއެވެ.
