ރިޔާސީ އިންޠިޚާބަށް ރައީސް ޢަބްދުﷲ ޔާމީން ޢަބްދުލްޤައްޔޫމަށް ވަނީ ވަކި އެކައުންޓެއް ހަމަޖައްސަވާފައި ކަމަށް ރައީސް އޮފީހުގެ ތަރުޖަމާނު އިބްރާހީމް މުއާޒް އަލީ ވިދާޅުވެއްޖެއެވެ. މުޢާޒު މިއަދުދ ކުރެއްވި ޓުވީޓެއްގައި ވިދާޅުވީ ރައީސަށް ވަކި އެކައުންޓެއް ހަމަޖައްސަވައި އެކައުންޓަށް ޤަވައިދުން ފައިސާ ލައްވަމުން ގެންދެވިކަމަށް މުޢާޒް ވަނީ ވިދާޅުވެފައެވެ. އެކަމުގައި ޤާނޫނާ ޚިލާފު އެއްވެސް ކަމެއް ނޫޅޭނެ ކަމުގެ ފުރިހަމަ ޔަގީން ކަން ރައްޔިތުންނަށް އަރުވާ ކަމަށް މުޢާޒް ވަނީ ވިދާޅުވެފައެވެ.
"Riyaasee inthikhaabu ge campaign ah Raees ge vaki account eh vany hamajessifa. Adhi gawaaidhun faisaa ves lavvamun gendhevi. Qaanoonaa khilaafu evves kameh ekamugai noolheyne kamuge furihama yageenkan emmehai dhivehi lobuvethi rayyithinnah aruvan!" -im
— ɪʙʀᴀʜɪᴍ ᴍᴜᴀᴢ ᴀʟɪ (@SpokespersonMV) October 2, 2018
މުޢާޒު މިއަދު ޓުވީޓު ކުރައްވާފައި މިވަނީ ވޯޓުގެ ކުރީން ނަޤުދު ފައިސާގެ ގޮތުގައި ރައީސް ޔާމީނަށް 1.5 މިލިއަން ޑޮލަރު ލިބިލެއްވި ކަމަށް ބުނެ އަލް ޖަޒީރާ އިން ރިޕޯޓުކޮށްފައިވަނިކޮށެވެ. އަލް ޖަޒީރާ އިން ރިޕޯޓުކޮށްފައިވާ ގޮތުގައި ރައިސް ޔާމީނަށް މި ފައިސާ ލިބިފައިވަނީ ދެ އިންސްޓޯލްމެންޓުގެ ގޮތުގައި މޯލްޑިވްސް އިސްލާމިކް ބޭންކް މެދުވެރިކޮށެވެ. އަދި އަދި މަރުކަޒީ ބޭންކުގެ ފައިނޭންޝަލް އިންޓެލިޖެންސް ޔުނިޓުން 13 ސެޕްޓެންބަރު 2018 ވަނަ ދުވަހު އެކްޓިން ޕޮލިސް ކޮމިޝަނަރަށް ސިޓީ އަކުން އެކަން އަންގަވާފައިވާ ކަމަށްވެސް އަލް ޖަޒީރާ އިން ރިޕޯޓުކޮށްފައިވެއެވެ. މި ސިޓީ އާ ހަވާލާދީ އަލް ޖަޒީރާ އިން ރިޕޯޓުކޮށްފައިވާ ގޮތުގައި ސެޕްޓެންބަރު މަހުގެ 5ވަނަ ދުވަހު 648508 އެމެރިކާ ޑޮލަރު ޖަމާކޮށްފައިވާ ކަމަށާއި ސެޕްޓެންބަރު މަހުގެ 10ވަނަ ދުވަހު 810635 އެމެރިކާ ޑޮލަރު ޖަމާކޮށްފައިވާ ކަމަށް ވެސް އަލް ޖަޒީރާ އިން ރިޕޯޓު ކުރެއެވެ. އަދި މި ފައިސާ ބެންކުން ނަގާފައިވާ ކަމަށް އަލް ޖަޒީރާ އިން ވަނީ ރިޕޯޓު ކޮށްފައެވެ.
އެ ފައިސާ އަކީ ކޮންފަރާތަކުން އަދި ކޮން ބޭނުމަކު ޖަމާ ކުރާ ފައިސާތަކެއްތޯ ބެންކުން ސުވާލުކުރުމުން އެއީ 2018 ވަނަ އަހަރުގެ ރިޔާސީ އިންޠިޚާބަށް އަމިއްލަ ކުންފުނިތަކާއި އެހެނިހެން ފަރާތްތަކުން ދީފައިވާ ޑޮނޭޝަން އެއް ކަމަށް އެ ސިޓީ އާ ހަވާލާ ދީ އަލް ޖަޒީރާ އިން ވަނީ ރިޕޯޓުކޮށްފައެވެ. އަލްޖަޒީރާ އިން ވަނީ ފައިނޭންޝަލް އިންޓެލިޖެންސުން އެކްޓިން ޕޮލިސް ކޮމިޝަނަރަށް ފޮނުވި ސިޓީ އެފަރާތަށް ފެނިފައިވާ ކަމަށް ރިޕޯޓުކޮށްފައެވެ. ނަމަވެސް އެ ސިޓީގެ ޞައްހަ ކަމާ މެދު ފުލުހުންގެ ތަރުޖަމާނާ ސުވާލުކުރުމުން ކޮމެންޓު ކޮށްފައިނުވާ ކަމަށްވެސް މި ނޫހުން ރިޕޯޓުކޮށްފައިވެއެވެ.
