ރާއްޖޭގައި އިއްޔެ ބޭއްވި ރިޔާސީ އިންތިޚާބު އިދިކޮޅު ރިޔާސީ ކެންޑިޑޭޓް ކާމިޔާބު ކުރައްވައިފި ކަމަށާއި ސަރުކާރުގެ ބާރުތައް ބަދަލު ކުރުމުގެ މަސައްކަތް ކުރިއަށް ގެންދަވާނެ ކަމުގެ ޔަގީންކަން ސަރުކާރުން ދެއްވައިފިއެވެ.
ފޮރިން މިނިސްޓްރީން ނެރުނު ބަޔާނެއްގައި ވިދާޅުވެފައިވަނީ ބޮޑު ތަފާތަކުން ރައީސް ޔާމީންގެ މައްޗަށް އިދިކޮޅު ކެންޑިޑޭޓް (ރައީސް މުންތަޚަބު) އިބްރާހީމް މުހައްމަދު ސާލިހު ކުރި ހޯއްދަވައިފި ކަމަށެވެ. އެހެން ކަމުން ގާނޫނީ ހަމަތަކުގެމަތިން ސަރުކާރުގެ ބާރުތައް އައު ސަރުކާރަށް ބަދަލުކުރުމުގެ އެންމެހާ ކަންކަން ކުރިއަށް ގެންދާނެ ކަމުގެ ޔަގީންކަން ދެއްވާ ކަމަށް އެބަޔާނުގައިވެއެވެ.
އެބަޔާނުގައި ވިދާޅުވެފައިވަނީ އިއްޔެ ބޭއްވި އެއްވެސް ނުފޫޒެއްނެތި މިނިވަންކަމާއެކު ބޭއްވި އިންތިޚާބެއް ކަމަށެވެ. މިއީ ސަރުކާރުން ބަލި ގަބޫލުކުރެއްވިކަން ހާމަކުރެއްވި ފުރަތަމަ ފަހަރެވެ.
އިލެކްޝަންސް ކޮމިޝަން (އީސީ) ރޭ އާންމުކުރި ރަސްމީ ވަގުތީ ނަތީޖާ ދައްކާގޮތުން އިބްރާހީމް މުހައްމަދު ސާލިހުއަށް 134،616 ވޯޓު (58.4 ޕަސެންޓުން) ލިބިވަޑައިގެންފައި ވެއެވެ. ރައީސް ޔާމީނަށް ލިބިވަޑައިގެންނެވީ 96،123 ވޯޓެވެ. އެއީ (41.6 ޕަސެންޓް) އެވެ.
