މިހާރު ޖަލުގައި ތިއްބެވި ހުރިހާ ސިޔާސީ ބޭފުޅުންނާ ވަރަށް އަވަހަށް ބައްދަލުވެ އަމަލީ ގޮތުން އެބޭފުޅުންނާއެކު މަސައްކަތް ކުރެވޭނެ އުފާވެރި ދުވަސް ވަރަށްގާތް ވެއްޖެ ކަމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އައްޑޫސިޓީ ހިތަދޫ ބަނދަރު ސަރަހައްދުގައި ގުޅިފައިވާ ޕާޓީތަކުން ބޭއްވި ޖަލްސާގައި ވާހަކަފުޅު ދައްކަވަމުންނެވެ. އިރާދަކުރެއްވިއްޔާ ހުރިހާ ސިޔާސީ ބޭފުޅުން އަޅުގަނޑުމެންނާ ބައްދަލުވެ އަމަލީގޮތުން މަސައްކަތް ކުރައްވާނެ ދުވަސް ވަރަށް ގާތްވެއްޖެ" އިބޫ ވިދާޅުވިއެވެ.
އެބޭފުޅުންގެ ތެރޭގައި ރައީސް މައުމޫން، ރައީސް ނަޝީދު، ކުރީގެ އުއްތަމަ ފަނޑިޔާރު އަބްދުﷲ ސަޢީދު، ސްޕްރީމް ކޯޓުގެ ފަނޑިޔާރު އަލީ ހަމީދު، އެމްޕީ ޝިނާން، އެމްޕީ އަބްދުﷲ ރިޔާޒު، ކާނަލް ނާޒިމާއި، ފާރިސް ފަދަ ބޭފުޅުން ހިމެނެއެވެ. އިބޫ ވިދާޅުވީ ރައީސް މައުމޫނާއި، ރައީސް ނަޝީދާއި ގާސިމް އިބްރާހީމް ބަންދުކޮށްފައިވަނީ ކުށެއް ކުރައްވައިގެން ނޫންކަމަށެވެ. އެމަނިކުފާނުގެ ވެރިކަމުގައި މިއެންމެން މިނިވަންކުރައްވާނެ ކަމަށްވެސް ވިދާޅުވިއެވެ.
