މިމަހުގެ 23 ވަނަ ދުވަހު ރާއްޖޭގައި އޮންނަ ރިޔާސީ އިންތިޚާބުގައި ކެންޑިޑޭޓް ނަންބަރު އެކެއްގައި ޖަހާ ފާހަގައަކީ ގައުމީ ޖިހާދެއް ކަމަށް ހައުސިންގ މިނިސްޓަރ ޑރ މުޙަންމަދު މުއިއްޒު މިއަދު ވިދާޅުވެއްޖެއެވެ.
ރައީސް އަބްދުﷲ ޔާމީން ކެމްޕޭން ދަތުރުފުޅެއްގައި މިއަދު އައްޑޫ ސިޓީއަށް ވަޑައިގެން ފޭދޫގައި ދާދިދެންމެއަކު ބޭއްވި ޖަލްސާގައި ވާހަކަ ދައްކަވަމުން ޑރ މުއިއްޒު ވިދާޅުވީ ހިތުގައި ގައުމީ ލޯބި ހުރި އެއްވެސް މީހަކު މިމަހުގެ 23 ވަނަ ދުވަހު އޮންނަ ރިޔާސީ އިންތިޚާބުގައި ރައީސް އަބްދުﷲ ޔާމީނަށް ވޯޓު ދެއްވުމުގައި ދެވަނަ ވިސްނުމަކަށް ގޮސްގެން ނުވާނެ ކަމަށެވެ.
މުއިއްޒު ވިދާޅުވީ ގައުމުގެ މުސްތަގުބަލަށްޓަކައި، އަދި އިސްލާމް ދީން ޙިމާޔަތް ކުރުމަށާއި، ރާއްޖޭގެ ސިޔާދަތު ދެމެހެއްޓުމަށްޓަކައިވެސް 23 ވަނަ ދުވަހު ނަގާ ވޯޓުގައި ރައީސް ޔާމީނަށް ހެޔޮފާހަގަ ޖެހުމަކީ ގައުމީ ވާޖިބެކެވެ. އަދި ރައްޔިތުން ތަރައްގީއާއެކު ކުރިޔަށްދާން ބޭނުންނަމަ ރައީސް ޔާމީނަށް ދެވަނަ ދައުރެއް ދެއްވަންޖެހޭ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ހުރިހާ ރައްޔިތުންވެސް އަޒުމް ވަރުގަދަކޮށް ދެވަނަ ދައުރަކަށް ރައީސް ޔާމީން ހޮވުމަށްޓަކައި އެއް އަމާޒެއްގައި މަސައްކަތް ކުރެއްވުމަކީ ގައުމަށްޓަކައި ކޮށްދޭން ޖެހިފައިވާ ކަމެކެވެ. އަދި އައްޑޫ ސިޓީގެ ރައްޔިތުންވެސް ކުރިޔަށްދާން ބޭނުންނަމަ 23 ވަނަ ދުވަހު ނަގާ ވޯޓުގައި ރައީސް ޔާމީނަށް ފުރުޞަތު ދެއްވުމަށް މުއިއްޒު އެދިވަޑައިގަތެވެ.
