ތުރުކީގައި ހައްޔަރުކޮށްފައިވާ އެމެރިކާގެ ފާދިރީ އެންޑްރޫ ބަރަންސަން ދޫކޮށްނުލައިގެން ތުރުކީގެ ދެ ވަޒީރަކާ ދެކޮަޅަށް އެމެރިކާއިން ފިޔަވަޅު އަޅައިފިއެވެ. ސިޔާސީ ބައެއް ޖަމާއަތްތަކާ ގުުޅުން ބޭއްވުމުގެ ތުުހުމަތުގައި އޭނާ ތުރުކީގައި ބަންދުކޮށްފައި ހުންނަތާ ދެ އަހަރު ވެއްޖެއެވެ.
އެމެރިކާގެ ޓްރެޜަރީ ޑިޕާޓްމަންޓުން ފިޔަވަޅު އަޅާފައި ވަނީ ތުރުކީގެ އިންޓީރިއާ މިނިސްޓަރު ސުލައިމާން ސޮއިލޫއާއި، ޖަސްޓިސް މިނިސްޓަރު އަބްދުލްހަމީދު ގުލްއާ ދެކޮޅަށެވެ. މި ފިޔަވަޅުގެ ދަށުން އެ ދެބޭފުޅުންގެ އެއްވެސް މުދަލެއް އެމެރިކާގެ ގާނޫނު ހިނގާ ސަރަަހައްދެއްގައި ވާނަމަ އެމުދާ ހިފެހެއްޓޭނެއެވެ. އަދި އެމެރިކާގެ ކުންފުނިތަކާއި، ރައްޔިތުންނަށް އެ ދެބޭފުޅުންނާއި މުއާމަލާތްކުރުން މަނާކުރެވޭނެއެވެ.
ފިޔަވަޅު އެޅިކަން އިއުލާންކުރުމަށްފަހު ޓްރެޜަރީ ޑިޕާޓްމަންޓުން ބުނެފައިވަނީ ތުރުކީގެ އިންޓީރިއާ މިނިސްޓަރު ސޮއިލޫއާއި، ޖަސްްޓިސް މިނިސްޓަރު ގުލްއަކީ "ތުރުކީން އިންސާނީ ހައްގުތަކަށް އަރަައިގަތުމުގެ އަމަލުތައް ތަންފީޒުކުރާ އިދާރާތައް ހިންގާ ވެރިން" ކަމުގައެވެ.
މި ފިޔަވަޅާ ގުޅިގެން ޖަސްޓިސް މިނިސްޓަރު ގުލް ވިދާޅުވެފައި ވަނީ އޭނާގެ އެންމެ ލާރިއެއްވެސް ތުރުކީން ބޭރުގައި ނުވާނެކަމަށާއި، އެމެރިކާއިން އެޅި ފިޔަވަޅާމެދު އޭނާގެ އެެއްވެސް ފަރުވާލެއް ނެތްކަމަށެވެ.
އެމެރިކާގެ ރައީސު ޓްރަމްޕް ވަނީ އަދިވެސް ފާދިރީ ދޫކޮށްނުލައިފިނަމަ، އިތުރު ފިޔަވަޅު އަޅާނެ ކަމުގެ އިންޒާރުދެއްވާފައެވެ.
އެހެންނަމަވެސް ތުރުކީން ބުނެފައި ވަނީ އެމެރިކާގެ ފިޔަވަޅުތަކަށް ރައްދު ނުދީ ދޫކޮށްނުލާނެ ކަމަށެެވެ. ތުރުކީގެ ޚާރިޖީ ވަޒީރު މައުލޫދު ޖާވީޝް އޮގްލޫ ވިދާޅުވީ "އަހަރުމެންގެ ދެ ވަޒީރުންނާ ދެކޮޅަށް ފިޔަވަޅު އަޅަން އެމެރިކާއިން ކުރާ މަސައްކަަތަށް ރައްދު ނުދީ ދޫކޮށްނުލާނެ" ކަމަށެެވެ. އޭނާ މިހެން ވިދާޅުވީ އެނާގެ ރަސްމީ ޓުވިޓާ އެކައުންޓުގައި ކުރެއްވި ޓުވީޓެއްގައެވެ. އޭނާ އިތުރަށް ވިދާޅުވެފައިވާ ގޮތުގައި "އެމެރިކާގެ ޣައިރު ގާނޫނީ އެދުންތައް މި ވަސީލަތުން (ފިޔަވަޅު އަޅައިގެން) ހާސިލުނުކުރެވޭނެކަން އެމެރިކާއަށް ނޭނގެނީސް އަހަރުމެންގެ ދެމެދުގައި ހުރި މައްސަލަތަކަށް ހައްލެއް ނުގެނެވޭނެއެވެ."
ފާދިރީ ބްރަންސަންއާ ދެކޮޅަށް އިޒްމީރުގެ އެޓާނީ ޖެނެެރަލް އުުފުލާފައިވާ ދައުވާތަކުގެ ތެރޭގައި، އަރުވާލެވިގެެން އެމެެރިކާގައި ދިރިއުޅެމުންދާ އަބްދުﷲ ގޫލަންގެ ޖަމާއަތާ، ކުރުުދީ ޖަމާއަތެއް ކަމަށްވާ ޕީކޭކޭއާ ގުުޅުން ބޭއްވުން ހިމެނެއެވެ. އަދި 15 ޖުލައި 2016 ގައި ތުރުކީގައި ގެންނަން އުޅުނު އިންގިލާބު ނާކާމިޔާބުވުމުން އެކަމާ ދެރަވާކަމަށް ބުނެ އެމެރިކާގެ އަސްކަރީ އިސް އޮފިސަރަކަށް ބަރަންސަން ފޮނުވާފައިވާ ސިޓީއެއްގެ މައްސަލައިގައިވެސް އޭނާގެ މައްޗަދް ދައުވާކުރެއެވެ.
