ޑރ. މުހައްމަދު ޝަހީމް އަލީ ސައީދު ޕީޕީއެމްގެ ރިޔާސީ ކެންޑިޑޭޓުގެ ރަނިންމޭޓަކަށް ހަމަޖެއްސެވުމުން އަދާލަތު ޕާޓީއަށް ނިސްބަތްވާ ގިނަ އަދަދެއްގެ ދީނީ އިލްމުވެރިން ޕީޕީއެމާ ގުޅިފައިވާ ކަމަށް ގެމަނަފުށީ ދާއިރާގެ މެންބަރު ޖަމީލް އުސްމާން (ޖޭޔޫ) ވިދާޅުވެއްޖެއެވެ.
އާފަތިހަށް މައުލޫމާތު ދެއްވަމުން އޭނާ ވިދާޅުވީ "ޑރ. ޝަހީމް ރަނިންމޭޓަށް ހަމަޖެއްސެވުމުން އަދާލަތުޕާޓީގައި ތިއްބެވި ގިނަ އަދަދެއްގެ ދީނީ އިލްމުވެރިން ޑރ. ޝަހީމަށް ތާއިދު ކުރެއްވުމުގެ ގޮތުން މިހާރުވަނީ ޕީޕީއެމާ އެއްކޮށް ނުކުމެފައި. އަދި އެޕާޓީއަށް ތާއިދު ކުރަމުން އައި އާންމު މެންބަރުންގެ ތެރެއިން ވެސް ގިނަބަޔަކުވަނީ ޕީޕީއެމާ ގުޅިފައި. އޭގެ ސަބަބުން އާދަލަތުޕާޓީވަނީ އުވުމަކާ ކައިރިވެފައި،" ޖަމީލް ވިދާޅުވިއެވެ.
ޖަމީލް ވިދާޅުވީ މިކަން މިހެންވުމުން އިދިކޮޅު ކޯލިޝަނުގައި އޮތް އަދާލަތު ޕާޓީގެ ރޯލުވެސް ވަނީ ވަރަށް ބޮޑަށް ކުޑަވެފައި ކަމަށެވެ.
އޭނާ ވިދާޅުވީ ޑރ. ޝަހީމް ފަދަ އިލްމުވެރިއަކު ރައީސް ޔާމީންގެ ރަނިންމޭޓަކަށް ވަޑައިގެންނެވުމުން އެއިން ދޭހަކޮށްދެނީ ރައީސް ޔާމީންގެ ދީނީސިޔާސަތު ރަނގަޅު ކަމާއި ހަރުދަނާކަން ކަމަށެވެ. އަދި ނިމިގެން މިދާދައުރުގައި ތަންފީޒު ކުރަމުންދާ ދީނީ ސިޔާސަތު އެގޮތުގައި ދެންއަންނަ ދައުރުގައިވެސް ކުރިއަށް ގެންދިޔުމަށް ރައީސަށް ފަސޭހަފުޅުވާނެ ކަމަށް ޖަމީލް ވިދާޅުވިއެވެ.
މިކަމާ ގުޅިގެން އަދާލަތުޕާޓީގެ ނާއިބު ރައީސް އަލީ ޒާހިރު ވިދާޅުވީ އެވާހަކަތަކަކީ އެއްވެސް ހަގީގަތެއްނެތް ވާހަކަތަކެއް ކަމަށެވެ. އާދާލަތު ޕާޓީގެ އެއްވެސް ބަޔަކު ނުވަތަ އެޕާޓީއަށް ނިސްބަވާ އިލްމުވެރިއަކު ޑރ. ޝަހީމާއެކު ޕީޕީއެމަށް ނުދާ ކަމަށް ވެސް އަލީ ޒާހިރު ވިދާޅުވިއެވެ. "އެބޭފުޅުންނާ (ޕީޕީއެމް) ގުޅުނީ ކުރިން ވެސް އެބޭފުޅުންގެ ތެރޭގައި ތިއްބެވި ބޭފުޅުން އެއީ އަޅުގަނޑުމެންގެ ޕާޓީގެ ބައެއްނޫން،" އަލީ ޒާހިރު ވިދާޅުވިއެވެ.
