ހެލްތު މިނިސްޓްރީއާއި އައިޖީއެމްއެޗު ގުޅިގެން ޚާއްސަ މެޑިކަލް ކޭންޕެއް ބާއްވަން ތައްޔާރުވާން ފަށައިފިއެވެ.
މި ކެންޕު އޮންނާނީ ޖުލައި 8 އިން 12 އަށެވެ. ކޭންޕު ނިންމުން އޮންނާނީ 13 ވަނަ ދުވަހުއެވެ. "ހަތްވަނަ ދުވަހު އޮންނާނީ އޯޕަނިން. ކޭންޕު ކުރިއަށްދާނީ އަށަކުން ބާރައަށް. ތޭރަވަނަ ދުވަހު އޮންނާނީ ނިންމުމުގެ ރަސްމއްޔާތު،" އައިޖީއެމްޗުގެ މީޑިއާ ކޯޑިނޭޓަރ މުހައްމަދު މުފީދު ވިދާޅުވިއެވެ.
މުފީދު ވިދާޅުވީ މިކޭންޕުގައި ބައިވެރުވުމަށް ނަންނޯޓު ކުރުމުގެ ފުރުސަތުވަނީ ޖޫން 28 އިން ޖުލައި 10 އަށް ހުޅުވާފައި ކަމަށެވެ. އެ މުއްދަތުގައި ނަންނޯޓު ކުރާ އެންމެންނަށް ޚިދުމަތްދޭނެ ކަމަށްވެސް އޭނާ ވިދާޅުވިއެވެ.
"އައިޖީއެމްޗުގެ ފަރާތުން މި ޕްރޮގްރާމް ކުރިއަށްގެންދާނީ ސާޖިކަލް ޑިޕާޓުމެންޓުން،" އޭނާ ވިދާޅުވިއެވެ.
މި ކޭންޕުގައި ޚިދުމަތްދޭނީ ރާއްޖެއަށް ޒިޔާރަތްކުރާ ޕާކިސްތާނުގެ ސްޕެޝަލިސްޓް ޑޮކްޓަރުންނެވެ. މި ކޭންޕުގައި ޔޫރޮލޮޖިސްޓުންނާއި، ނިޔުރޮލޮޖިސްޓުންނާއި، ބްރަސްޓް ސާޖަނުންނާއި، ނިޔުރޯ ސާޖަނުންނާއި، އީއެންޓީ ސްޕެޝަލިސްޓުންނާއި، ކާޑިއޯ ތޮރައިސިކް ސާޖަނުން ހިމެނެއެވެ. އޭނާ ބޮޑަށް މަސައްކަތްކުރާނީ ކުޑަކުދިންނަށް ފަރުވާދިނުމަށް ކަމަށް މުފީދު ވިދާޅުވިއެވެ.
މިކޭންޕުގައި ބޮޑަށް ފަރުވާދެނީ ރާއްޖޭގައި ސްޕޭޝަލިސްޓު ޑޮކްޓަރުން ނެތް ދާއިރާ ތަކުން ކަމަށްވެސް މުފީދު ވިދާޅުވިއެވެ.
