އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) އަށް ކުރިން ނުކުރެވުނުކަމެއް ފަހުންވެސް ކުރެއްވޭނެ ކަމަށް ގަބޫލެއް ނުކުރައްވާ ކަމަށް ޕީޕީއެމްގެ ނާއިބު ރައީސް އަދި ފޮނަދޫ ދާއިރާގެ މަޖިލީސް މެންބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އޭނާ މިހެން ވިދާޅުވީ ށ. މިލަންދޫ ނަރުދަމާގެ ނިޒާމް ނިންމައި ޚިދުމަތް ފަށްޓަވައި ދެއްވުމަށް މިއަދު އެރަށުގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އަދުރޭ ވިދާޅުވީ އިބްރާހީމް ނާސިރު އިންޓަރނޭޝަނަލް އެއާޕޯޓު ޖީއެމްއާރަށް ރައީސް ނަޝީދު ސަރުކާރުން ދެއްވިއިރު އޭއާބެހޭ އެގްރީމެޓް ރައްޔިތުންގެ މަޖިލިހަށް ހުށަހަޅަން އެދުނުކަމަށާއި އެކަމަކު އެއާޕޯޓު ދެއްވީ އެއްބަސްވުން މަޖިލީހަށް ހުށަހެޅުމެއްނެތި ކަމަށެވެ. އަދި އެކަމާގުޅިގެން މާލިއްޔަތުގެ ގާނޫނަށް ހުށަހެޅި އިސްލާހު ތަސްދީގު ކުރެއްވުމަށް ރައީސަށް ފޮނުއްވާފައި އޮއްވައި އެއަށް އެއްވެސް ވަރަކަށް ބެއްލެވުމެއްނެތި ޖީއެމްއާރަށް އޭއާޕޯޓު ދެއްވި ކަމަށް ވެސް ވިދާޅުވިއެވެ.
އޭރުވެސް ހިންނަވަރު ދާއިރާގެ މެންބަރުގެ ހައިސިއްޔަތުން އެމްޑީޕީގެ ޕީޖީލީޑަރަކަށް ހުންނެވީ އިބޫ ކަމަށް އޭނާ ވިދާޅުވިއެވެ. އެ މަގާމުގައި ހުންނަވައިގެން ވެސް އިބޫއަށް އެއްވެސް ކަމެއް ނުކުރެވުނު ކަމަށް އޭނާ ވިދާޅުވިއެވެ. އޭގެ އިތުރަށް ރައީސް ޔާމީން ސަރުކާރުގެ އެއްވެސް ރިޔާސީ ބަޔާނަކަށް އިދިކޮޅު ޕާޓީން ޖަވާބުދާރީ ވެފައި ނުވާކަމަށް ވެސް އޭނާ ވިދާޅުވިއެވެ. އޭރުވެސް އެމްޑީޕީގެ ޕާލަމެންޓްރީ ގްރޫޕުގެ ލީޑަރަކަށް ހުންނެވީ އިބޫއެވެ.
"މިރާއްޖޭގައި މިހާރު ހިނގާ އެންމެބޮޑު މަޝްރޫއަކީ ވެލާނާ އިންޓަރނޭޝަނަލް އެއާޕޯޓު ބޮޑުކުރުމުގެ މަސައްކަތް. އެއީކުރީގައި މާލޭ އިންޓަރނޭޝަނަލް އެއާޕޯޓު. އެ އެއާޕޯޓު އަވަށްޓެރި ގައުމެއް (އިންޑިއާ) ގެ ވިޔަފާރި ކުންފުންޏަކަށް ދޫކޮށްލިއިރު ޑިމޮކްރަސީގެ ކޮން އުސޫލަކަށްތޯއޭ ތަބާވެ ވަޑައިގެންފައި އޮތީ މިއަދު އަޅުގަނޑު އެބޭފުޅުންނަށް (އޭރުގެ ސަރުކާރުގެ ބޭފުޅުން) ދަންނަވާލަން ބޭނުން. މިއަދު އިދިކޮޅު ފަރާތްތަކުން އެއްކެންޑިޑޭޓަކު ނެރުމުގެ ބޭނުމުގައި ނެރެފައިވާ އިބޫ އޭރު އެމްޑީޕީގެ ޕާލަމެންޓްރީ ގްރޫޕުގެ ލީޑަރަކަށް ހުންނެވި ބޭފުޅަކަށް އޭރުގައި ނުކުރެވުނު ކަމެއް ނުވަތަ އޭރު ރައްޔިތުންނަށް ނުދެއްކުނު ގާބިލްކަމެއް ނުވަތަ އޭރު ޑިމޮކްރަސީގެ އުސާލާ އެއްގޮތަށް ނުކުރެވުނުކަމެއް ވަކި އެހެން މަގާމަކަށް ވަޑައިގަތަސް ނުކުރެވޭނެ،" އަދުރޭ ވިދާޅުވިއެވެ.
"އޭރު މާލިއްޔަތު ގާނޫނު އޮންނަ ގޮތުން އެފަދަ އެގްރީމެންޓެއްގައި ސޮއިކުރެވޭނީ ރައްޔިތުންގެ މަޖިލީހަށް ފޮނުވައިގެން ރައްޔިތުންގެ މަޖިލީހުން އެކަމަށް ބަހެއް ބުނެގެން އެއަށް އޭގެ އަލީގައި. އަޅުގަނޑުމެން އޭރުތިބީ އިދިކޮޅުގައި. އަޅުގަނޑުމެން ރައްޔިތުންގެ މަޖިލީހުން ނިންމީ އެ އެގްރީމެންޓް ރައްޔިތުންގެ މަޖިލީހަށް ގެންނަން. ރައްޔިތުންގެ މަޖިލީހުން ބަލާފަ ނޫނިއްޔާ އެކަން ކޮށްގެން ނުވާނެޔޭ. އެގޮތަށް އެކަން ނުކުރީމައި އަޅުގަނޑުމެން ރައްޔިތުންގެ މަޖިލީހުން މާލިއްޔަތުގެ ގާނޫނަށް އިސްލާހެއް ގެނައިން. އެއިސްލާހު ގެނެސް ރައީސުލްޖުމްހޫރިއްޔާގެ އަރިހަށް ތަސްދީގު ކުރަން ފޮނުވާފައި އޮއްވައި އެއަށް ބަލާލުމެއްނެތި ނުއަގުގައި ވެލާނާ އިންޓަރނޭޝަނަލް އެއާޕޯޓު އޭރު މާލޭ އިންޓަރނޭޝަނަލް އެއާޕޯޓު ޖީއެމްއާރަށް ވިއްކާލީ.،" އޭނާ ވިދާޅުވިއެވެ.
ނަތީޖާއަކަށް ވެގެންދިޔައީ އަލުން އަނބުރައި އެއާޕޯޓު ހޯދުމަށް 320 މިލިއަނެއްހާ ޑޮލަރު ޚަރަދު ކުރަންޖެހުމެވެ. އެއީ ރައްޔިތުންގެ ތަރައްގީއާއި މަންފާއަށް ޚަރަދުކުރަން ޖެހޭ ފައިސާ ކަމަށްވެސް އަދުރޭ ވިދާޅުވިއެވެ. އެފައިސާ ޚަރަދު ކުރަން ނެޖެހުނުނަމަ ރައްޔިތުން ބޭނުންވާ އެތައްކަމެއް އެކި ރަށްރަށުގައި ހުންނާނީ ކުރެވިފައި ނުވަތަ ދާނީ ކުރެވެމުން ކަމަށްވެސް އޭނާ ވިދާޅުވިއެވެ.
ފެބުރުއަރީ އެއްކެއްގެ އަމުރާއެކު ރާއްޖޭގެ ގާނޫނީ ވެރިކަން ވައްޓާލުމަށް ހިންގި ހަރަކާތްތަކުގައި ޒިންމާ ނަގަން ތިބި މީހުން އޭރު އެކަމާ ދެކޮޅަށް ބަސް ނުބުނެ މާދަމާ ރައްޔިތުންގެ މައްޗަށް ބަސްބުނަން ނުކުމެ ނެންގެވޭނީ ކޮން ޒިންމާއެއްތޯ ރައްޔިތުން ވިސްނާލަންޖެހޭ ކަމަށް ވެސް އަދުރޭ ވިދާޅުވިއެވެ.
"ރައީސުލްޖުމްހޫރިއްޔާ ކުރިއަށްއޮންނަ އަހަރަށް ހުށަހަޅާ ރިޔާސީ ބަޔާނަށް ޖަވާބުދާރީ ވުމަކީ އިދިކޮޅު ޕާޓީގެ ޕާލިމެންޓްރީ ގްރޫޕުގައި ހުންނަވާ ލީޑަރަކު އަދާކުރައްވަންޖެހޭ ވާޖިބެއް. ވޭތުވެދިޔަ ހަތަރު އަހަރު އެމަގާމުގައި ހުންނެވީ މިއަދު އެމްޑީޕީގެ ރިޔާސީ ކެންޑީޑޭޓް އިބްރާހީމް މުހައްމަދު ސާލިހު. އެހެންނަމަވެސް ހަތަރު އަހަރު ދުވަހު އެމަނިކުފާނު ވަނީ ރައްޔިތުންގެ ހައްގުގައި އެޒިންމާ އަދާނުކުރައްވައި އެމަނިކުފާނާ ރައްޔިތުންގެ މަޖިލީހުގެ ގަވާއިދަކުން ހަވާލު ކުރައްވާފައިވާ މަސްއޫލިއްޔަތަކަށް އިހުމާލު ވެވަޑައިގެންފައި. މިވަރުގެ ކަންކަން ނުކުރެވޭ ބޭފުޅުން މުޅި މިގައުމުގެ މައްޗަށް ވެރިކަން ހިންގަންޖެހުނީމައި ދެން އުފުލޭނީ ކޮން ޒިންމާއެއްތޯ ރައްޔިތުން އެބަޖެހޭ ވަރަށް ބޮޑަށް ވިސްނަވަން،" އަދުރޭ ވިދާޅުވިއެވެ.
