ދ.ވޮއްމުލި ރިސޯޓުގައި އަލިފާނުގެ ހާދިސާއެއް ހިނގައިގެން އެމްއެންޑީއެފް ސެންޓްރަލް އޭރިއާ ކުޑަހުވަދޫ ފަޔަރ ސްޓޭޝަންގެ ސިފައިން ހަރަކާތްތެރިވެއްޖެއެވެ.
މި ހާދިސާގެ މަޢުލޫމާތު މިއަދު 09:06 ހާއިރު އެމްއެންޑީއެފް ފަޔަރ އެންޑް ރެސްކިއު ސަރވިސްއަށް ލިބުމާއެކު ސިފައިން ވަނީ އަލިފާން ނިވުމުގެ މަސައްކަތް ކޮށްފައެވެ. މި މަސައްކަތުގައި އެ ރިސޯޓުގެ ފަޔަރ ޓީމްވެސް ވަނީ ބައިވެރިވެފައި ކަމަށް އެމްއެންޑީއެފުން ވިދާޅުވެފައިވެއެވެ.
މި ހާދިސާގައި އަލިފާން ރޯވެފައިވަނީ ވޮއްމުލި ރިސޯޓުގެ ޕްރައިވެޓް ސްޕާ އޭރިއާގައި ހުރި ސްޕާ ޓްރީޓްމަންޓް ރޫމެއްގައެވެ. ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.
މި އަލިފާނުގެ ހާދިސާގައި ސްޕާ ޓްރީޓްމަންޓް ރޫމަށް ވަނީ ބޮޑެތި ގެއްލުންތަކެއް ލިބިފައެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި އެމްއެންޑީއެފް ފަޔަރ އެންޑް ރެސްކިއު ސަރވިސްއިން ދަނީ މަސައްކަތް ކުރަމުންނެވެ.
