އެމަނިކުފާނުގެ މިސްރާބު ބަދަލު ކޮށްލެވޭތޯ ބަޔަކު ވަރަށް ބޮޑަށް މަސައްކަތް ކޮށްފި ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގަތްޔޫމް ވިދާޅުވެއްޖެއެވެ.
މާލެ އަތޮޅުގެ ތިން ރަށަކަށް މިއަދު ރައީސް ކުރައްވަމުން ގެންދަވާ ދަތުރުފުޅުގައި ތުލުސްދޫ ރައްޔިތުންނާ މުޚާތަބު ކުރައްވައި ރައީސް ވިދާޅުވީ އެމަނިކުފާނުގެ މިސްރާބު ބަދަލު ކޮށްލަން ސިޔާސީ އިދިކޮޅު ފަރާތްތަކުން މަސައްކަތް ކޮށްފައިވާތީ އެކަންކަމަކީ ކުރިޔަށް އޮތް ރިޔާސީ އިންތިޚާބާ ކުރިމަތިލާއިރު ވަރަށް ބޮޑަށް ވިސްނަންޖެހޭ ކަމެއް ކަމަށެވެ.
ރައީސް ވިދާޅުވީ ގައުމުގެ ކަންކަން ރައްޔިތުން ނިންމާނީ ބަޔެއްގެ ނުފޫޒުގައި ޖެހިގެން ނޫން ކަމަށާއި އެކަން ރައްޔިތުން ނިންމާނީ ވޯޓުން ކަމަށެވެ. އަދި ރާއްޖެއަށް އައި ސިޔާސީ ކަޅުފޮއި މޫސުމަށް ފަހު މިހާރު އަލިވިލިފައިވާ ކަމަށް ރައީސް ވިދާޅުވިއެވެ.
ރައީސް ޔާމީން ތަފާތު އެކިފަހަރު މަތިން ވިދާޅުވެފައި ވަނީ އެމަނިކުފާނު ވެރިކަމަށް ވަޑައިގަތީއްސުރެ ހޭދަކުރައްވަމުން ގެންދަވަނީ ފަސޭހަފުޅު ދުވަސްތަކެއް ނޫން ކަމަށެވެ. ނަމަވެސް ރައީސް ވިދާޅުވީ ގައުމުގެ ތަރައްގީއަށް އެމަނިކުފާނު ފައްޓަވާފައިވާ މަސައްކަތްޕުޅުތަކަށް ހުއްޓުމެއް އަޔަނުދެއްވާނެ ކަމަށެވެ.
