އަފްޣާނިސްތާނުގައި އިރުމަތީގައި އިއްޔެ މީހަކު އަމިއްލައަށް ގޮއްވާލައިގެން ދިން ހަމަލާއެއްގައި 21 މީހުން މަރުވެ 41 މީހުން ޒަަޚަމުވެެއްޖެއެވެ. މަރުވި މީހުންގެ ތެރޭގައި ގިނައީ ފިޠުރު އީދާ ދިމާކޮށް އިއުލާންކޮށްފައިވާ 3 ދުވަހުގެ ސުލްހަ ފާހަގަކުރަން ތިބި ޠާލިބާން މީހުންކަމަށް ޚަބަރު ލިބެއެވެ.
ނަންގާރްހާރު ޕްރޮވިންސުގެ ފުލުހުންގެ ވެރިޔާ ޣުލާމް ސަނާޔީ ސްތާނިކްޒާއީ ވިދާޅުވި ގޮތުގައި ބޮޑެތި ގެއްލުންތަކެއް ދިން އެ ބޮން ގޮެއްވާލީ މީގެ ކުރިން ފެނިފައިނުވާ ފަަދަ އުވާވެރި މާހައުލެއްގެ ތެރޭގައެވެ. ޠާލިބާން ހަނގުރާމަވެރިންނާއި އަފްޣާން ސަލާމަތީ ބާރުތަކުން އެއްބަޔަކު އަނެއް ބަޔަކަށް ކޮނޑާ ކޮނޑު ޖައްސައި އީދުގެ ސަލާންކުރަމުން ދަނިކޮށެވެ. ހަނގުރާމައިގެ ސަބަބުން ސުންނާފަތިވެފައިވާ އެ ގައުމުގެ ގިނަ ރަށްތަކެއްގައި އިއްޔެ ވަނީ އެ އުފާވެރި މަންޒަރު ފެނިގެން ގޮސްފައެވެ.
ބޮން ގޮއްވާލިތާ ގިނަ އިރުތަކެއް ނުވަނީސް އަފްޣާނިސްތާނުގެ ރައީސު އަޝްރަފު ޣަނީ ވަނީ އާދީއްތަ ދުވަހު ހަމަވާން އޮތް 9 ދުވަހުގެ ސުލްހައިގެ މުއްދަތު އިތުރުކުރައްވާނެކަން ހާމަކުރައްވާފައެވެ. ކުރިން އޮތީ އީދު ފާހަގަކޮށް ނިމުމާއެކު ސުލްހަ ނިމޭގޮތަށެވެ.
ސަރުކާރުން 9 ނުވަހުގެ ސުލްހަ އިއުލާންކޮށްފައި އޮތް ނަމަވެސް ޠާލިބާނުންގެ ވެރިޔާ ހައިބަތުﷲ އަޚުންޒާދާ ސުލްހަ އިއުލާންކުރީ ވަކިންނެވެ. އޭނާ އިއުލާންކުރީ އީދުގެ މުނާސަބަތުގައި ބުރާސްފަތި ދުވަހުން ފެށިގެން 3 ދުވަހަށް ދެމިގެންދާ ސުލްހައެކެވެ.
ރައީސު އަޝްރަފު ޣަނީ ވަނި ސުލްހައިގެ ވާހަކަތަކުގެ މޭޒުމައްޗަށް ހުރިހާ މައްސަލައެއް ގެންނަވައި ބަހުސުކުރައްވަން ތައްޔާރަށް ހުންނެވިކަމަށް އޭނާ ކުރިން ވިދާޅުވެފައިވާ ވާހަކަފުޅު ތަކުރާރުކުރައްވާފައެވެ. އަނެއްކޮޅުން ޠާލިބާނުންގެ ވެރިޔާ އަޚުންޒާދާ ބުނީ އަފްޣާން ސަރުކާރާ އެކު ސުލްހައިގެ ވާހަކަތަކަށް ދިއުމުގެ ކުރިން އޭނާ ބޭނުންވަނީ ސީދާ އެމެރިކާއާއެކު ވާހަކަދައްކަން ކަމުގައެވެ.
އިއްޔެ އަފްޣާނިސްތާނުގައި ފިޠުރު ޢީދު ފާހަގަކޮށްފައި ވަނީ ސުލްހަވެރި އުފާވެރި ޖައްވެއްގައެވެ. ހުރިހާ ސަރަހައްދުތަކެއްގައި ހަނގުރާމަވެރިންނާއި، އާއްމުންނާއި، ސަލާމަތީ ބާރުތަކުގެ މީހުން އެއްބަަޔަކު އަނެއް ބަޔަކަށް އީދުގެ ސަލާންކޮށް ތަހުނިޔާ ބަދަލުކޮށްފައި ވެއެވެ. ސުލްހަވެރި މި ޖައްވު ކިލަނބުކޮށްލި ބޮން އަމިއްލައަށް މަރުވެގެން ގޮއްވާލީ ކޮން ޖަމާއަތަކަށް ނިސްބަތްވާ މީހަކު ކަން ނޭނގުނަސް، ބައެއް އަފްޣާން މަސްއޫލުވެރިން ލަފާކުރަނީ އެއީ އިސްލާމިކް ސްޓޭޓްގެ އަމަލެއް ކަމުގައެވެ.
