ކުރީގެ ޕޮލިސް ކޮމިޝަނަރު ޙުސައިން ވަޙީދުގެ ބެއްލެވުމުގެ ދަށުން ގޭންގްތަކަށް ނިސްބަތްވާ 45 މީހަކު މަގުމައްޗަށް ނެރުއްވައިފި ކަމަށް ވިދާޅުވެ ކުރީގެ ރައީސް މުޙައްމަދު ނަޝީދު ކުރެއްވި ޓުވީޓަށް ޙުސައިން ވަޙީދު ރައްދު ދެއްވައިފިއެވެ.
ވަޙީދުގެ ޓުވީޓުގައި ލިޔުއްވައިފައި ވެއެވެ.
"ސަަރ. މޮޔަފުޅުވީތޯ؟ އަޅުގަނޑު ނުޖެހޭނެ ބަޔަކު ނެރޭކަށް. ދިވެހި ސިފައިންނާއި ފުލުހުންގެ ކިބައިގަ މަގުތައް އަމާން ކުރުމުގެ ގާބިލުކަން ހުންނާނެ. އެ ބޭފުޅުން އެ ކަންކަން ކުރައްވާނެ."
ރައީސް ނަޝީދު މިރޭ ކުރެއްވި އެހެން ޓުވީޓެއްގައި ވިދާޅު ވެފައި ވަނީ ފުލުހުންނާއި ސިފައިން ތިބީ ރައްޔިތުންނާ އެކުގައި ކަމުގައެވެ. އަދި ވީހައިވެސް ގިނަ ބަޔަކު ޖުމްހޫރީ މައިދާނަށް އެއްވާންވެސް އެ މަނިކުފާނު ވަނީ އެދިވަޑައިގެންފައެވެ.
ފުލުހުންނާއި، ސިފައިން ވަނީ އެ ސަރަހައްދު ބަންދުކޮށް ފޯރި މަރަން ފަށައިފައެވެ. މި ވަގުތު އެ ސަރަހައްދަކު މުޒާހަރާ ކުރާ ބަޔަކު ނެތް ކަމަށް އެ ސަރަހައްދުގައި ހުރި މީހަކު އާފަތިހަށް މައުލޫމާތު ދީފައި ވެއެވެ.
އެ ސަރަހައްދަށް އެއް ވެވޭތޯ އެކި ފަހަރު މަތީން ބަޔަކު ވަނީ މަސައްކަތް ކޮށްފައެވެ. ފުލުހުންނާއި ސިފައިން ވަނީ އެ މީހުން ފަހަތަށް ޖައްސަމުން ގޮސް މާލޭގެ މަސް މާރުކޭޓު ސަރަހައްދާ ހަމައަށް ގެންގޮސްފައެވެ. އެތަނުން އަނެއްކާވެސް އެ މީހުން ކުރިއަށް ދާން މަސައްކަތް ކުރީމާ އެތަނަށް ކަރުނަ ގޭސް ވަނީ ޖަހައިފައެވެ.
ކުރީ ރޭރެޔާ ޚިލާފަށް މިރޭ މަގުމަތީން ފެނުނު މީހުންގެ އަދަދު ގިނަ ކަމަށް ވަނީ ފާހަގަ ކުރެވިފައެވެ.
