މިރެއިން ފެށިގެން ރޭގަނޑު 10:30 ގެ ފަހުން ސިޔާސީ އެއްވެސް ހަރަކާތެއް ނުވަތަ އެއްވުމެއް ބޭއްވުމުގެ ފުރުސަތު އެއްވެސް ބަޔަކަށް ނުދޭނެ ކަމަށް ފުލުހުން ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެއްވުމަށް އިސްކަންދަރު ކޮށީގައި މިއަދު ބޭއްވި ބައްދަލުވުމެއްގައި ސްޕްރިޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ މާލޭގައި މިހާރު ހިންގަމުން ގެންދާ މުޒާހަރާތަކާއި އެއްވުންތަކުގައި އެކިކަހަލަ އަމަލުތައް ހިންގަމުންދާތީ އާންމުންގެ ޝަކުވާތައް ކެނޑިނޭޅި ކޮންމެ ރެއަކުވެސް ފުލުހުންނަށް ހުށަހަޅަމުންދާ ކަމަށެވެ.
ޝިފާން ވިދާޅުވީ މިހާރު ކުރިއަށްދާ މުޒާހަރާތަކުގައި ނުރައްކާތެރި އެތަކެއް ކަމެއްވެސް ހިންގަމުންދާކަން ފާހަގަވެފައިވާ ކަމަށެވެ.
އޭގެތެރޭގައި ސާލާމަތީ ޚިދުމަތްދޭ ފަރާތްތަކަށް ހަމަލާދޭން މަސައްކަތް ކުރުމާއި، އެކަމަށް ހިތްވަރުދިނުމާއި، ކާކުކަން ނޭނގޭގޮތަށް މާސްކުފަދަ ތަކެތި އަޅައިގެން (މޫނުފޮރުވައިގެން) ތިބެވެސް ނުރައްކާތެރި އަމަލު ހިންގުމަށް މަސައްކަތް ކުރުން ހިމެނޭ ކަމަށް އޭނާ ވިދާޅުވިއެވެ.
ރޭގަނޑު މާލޭގެ މަގުތަކަށް ނުކުމެ ހިންގާ ހަރަކާތްތަކީ ޣައިރުގާނޫނީ ކަމެއް ކަމަށާއި، އެފަދަ ކަންކަމުގެ ސަބަބުން މާލެ އަމާންތަނަކަށް ހެދުމަށް ފުލުހުން ކުރަމުންދާ މަސައްކަތަކަށް ހުރަސްއެޅޭ ކަމަށްވެސް އޭނާ ވިދާޅުވިއެވެ. "އެހެންވީމާ މިއަދުން ފެށިގެން ރޭގަނޑު ދިހަގަޑިބައިގެ ފަހުން ސިޔާސީ އެއްވެސް ހަރަކާތެއް ނުހިންގުމަށް ނުވަތަ ހިންގުމަށް ފުރުސަތު ނުދިނުމަށް ފުލުހުން ނިންމައިފައިވާކަން އަޅުގަނޑު އިއުލާންކޮށް އެކަން ހުރިހާ ފަރާތްތަކަށް އަންގަން،" ޝިފާން ވިދާޅުވިއެވެ.
ޝިފާން ވިދާޅުވީ ފުލުހުން މިގޮތަށް ނިންމެވީ މާޒީގައި ހިނގައިފައިވާ މިފަދަ ކަންކަމުގެ ނަތީޖާއަށް ބެއްލެވުމަށްފަހު ކަމަށެވެ.
މިފަދަ ހަރަކާތްތަކުގެ ތެރެއިން މާޒީގައި ވަނީ ފުލުހުންނާއި، ސިފައިންނަށް ހަމަލާދީ، އެމީހުންގެ މުދަލަށާއި އާންމުންގެ މުދަލަށާއި ގެދޮރަށް ބޮޑެތި ގެއްލުންތައް ދީފައި ކަމަށް އޭނާ ވިދާޅުވިއެވެ.
ފުލުހުންގެ މުއައްސަސާއަކީ ރާއްޖޭގެ އެތެރޭގެ ހަމަޖެހުން ގާއިމް ކުރުމަށް ގާނޫނުއަސާސީން މަތިކޮށްފައިވާ މުއައްސަސާއެއް ކަމަށްވާތީ ދެން އެފަދަ އަމަލުތައް ހިންގުމުގެ ފުރުސަތު އެއްވެސް ބަޔަކަށް ނުދެއްވާނޭ ކަމަށް އޭނާ ވިދާޅުވިއެވެ.
