އަމީތާބް އަކީ ބޮލީވުޑް ގެ ފަންނާނުންގެ ތެރެއިން ސޯޝަލްމީޑިއާގައި އެންމެ ހަރަކާތްތެރި ފަންނާނެވެ. އޭނާ އަކީ ޓްވިޓަރ ގައި އޭނާ ފޮލޯ ކުރާ މީހުންނާ ވެސް ވާހަކަ ދައްކާ ފަންނާނެކެވެ. އަދި ޅެމާއި ފިލްމު ތަކުގެ ފޮޓޯ އާއި އަމިއްލަ ފޮޓޯވެސް ވަރަށް ގިނައިން ޓްވިޓާރ ގައި ޝެއަރ ކުރެއެވެ.
މީގެ ދުވަސްކޮޅެއް ކުރީން އޭނާގެ ފޮލޯވަރުން މަދުވާކަން ފާހަގަ ކުރެވުމުން ފޮލޯވަރުން މަދުކުރަނީ ތޯ ސުވާލުކޮށް ޓްވިޓަރ އިން ވަކިވާންވީ ވަގުތު ޖެހުނީ ކަމަށް ބުނެ ޓްވީޓު ކުރިއެވެ. އެ ޓްވީޓާ ގުޅިގެން ޓްވިޓަރ ގެ ޓީމެއް އަމީތާބް އާ ބައްދަލުކޮށް ޓްވިޓަރ މަސައްކަތް ކުރާ ގޮތް އޮޅުން ފިލުވައި ދިން ކަމަށް ބުނެ މީގެ ހަފްތާ އެއްހައި ދުވަސް ކުރީން އެ ޓީމާ އެކު ނަގާފައިވާ ފޮޓޯއެއް ޓްވީޓް ކުރިއެވެ.
އެހެން ނަމަވެސް އިއްޔެ އެކަނި އަމީތާބް ގެ 200،000 ފޮލޯވަރުން ގެއްލުމުން އޭނާ ވަނީ ޓްވިޓަރ އަށް އެޑްރެސްކޮށް ޅެމެއް ޕޯސްޓް ކޮށްފައެވެ. އޭނާގެ ޅެން އެޑްރެސް ކޮށްފައިވަނީ ލޯބިވާ ބޭބެ ނުވަތަ ލޯބިވާ ދައްތަ އަށެވެ. މިގޮތަށް އެޑްރެސް ކުރަން ޖެހުނީ ޓްވިޓަރ އަކީ އަންހެނެއް ކަން ނުވަތަ ފިރިހެނެއްކަން ވެސް އޭނާ އަށް ނޭނގޭތީ ކަމަށް ބުނެފައިވެއެވެ. އޭނާ އެ ޅެމުގައި ފާހަގަ ކޮށްފައިވެއެވެ. " އަހަރެން މިއުޅެނީ އެއްޗެއް ޝާއިއު ކުރަން. އެކަމަކު އެކަން ވިޔަ ނުދޭން ތިއުޅެނީ. އެންމެ ދުވަހަކުން އަހަރެންގެ 200،000 ފޮލޯވަރުން އުނިކޮށްފި. އެހެން ނުހަދާ. އެހާ އަނިޔާވެރި ނުވޭ."
ބޮލީވުޑްގެ ތަރީންގެ ތެރެއިން ކުރިން އެންމެ ގިނަ ފޮލޯވަރުން ތިބީ އަމީތާބްގެ އެވެ. ނަމަވެސް އިއްޔެގެ ހާދިސާ އާއި ގުޅިގެން މިހާރު އެންމެ ފޮލޯވަރުން ގިނަ ތަރި އަކީ ޝާހް ރުކް ޚާން އެވެ. އޭނާ ގެ ފޮލޯވަރުންގެ އަދަދަކީ 3،29،41،837 އެވެ. އަމީތާބް ގެ ފޮލޯވަރުންގެ އަދަދަކީ 3،29،02،320 އެވެ.
