އެމަނިކުފާނަކީ ސިޔާސީ ބޭފުޅެއް ނޫން ކަމަށާއި، ދިވެހިރާއްޖޭގެ ރައީސުލްޖުމްހޫރިއްޔާކަން ލިބިވަޑައިގަތީ ހާލަތު ނިޔާކުރި ގޮތަކުން ކަމަށާއި، ދެވަނަ ފަހަރަށް ރައީސް ކަމަށް ވަޑައިގަންނަވާން ބޭނުންފުޅު ނުވާ ކަމަށާއި، އެހެން ނަމަވެސް އެމަނިކުފާނުގެ ދަރިކަނބަލުންނަށް އަނިޔާ ކުރާ މަންޒަރު ބައްލަވަން ބޭނުންފުޅު ނުވާ ކަމަށް ދިވެހިރާއްޖޭގެ ކުރީގެ ރައީސް މުޙައްމަދު ނަޝީދު (އަންނި) ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ މިއަދު ހެނދުނު އިންޑިއާގެ ބެންގަލޯރުގައި ފެށުނު ދަ ހިންދޫ ނޫހުން ބޭއްވި "ހަޑްލް" ގައި ވާހަކަފުޅު ދައްކަވަމުންނެވެ. މި ވާހަކަފުޅުން އެމަނިކުފާނު އިޝާރާތް ކުރައްވަނީ ސީދާ އެ މަނިކުފާނުގެ ދަރިކަނބަލުންނަށް ކަމެއް ނުވަތަ ދިވެހިރާއްޖޭގެ އަންހެން ދަރިންނަށް ކަމަށް މުޅިއަކުން ސާފެއް ނޫނެވެ.
ހަޑްލްގައި ވާހަކަފުޅު ދައްކަވަމުން ނަޝީދު ވިދާޅުވިއެވެ. "އަޅުގަނޑު 2004 ވަނަ އަހަރު ގައުމު ދޫކޮށް އަމިއްލައަށް އަރުވައިލެވިގެން ހުރީ ކޮޅުނބުގައެވެ. އެތާނގައި ހުރެގެން ސިޔާސީ ޕާޓީއެއް ހެދީމެވެ. އެކަމަކު އަޅުގަނޑަށް ބަޔަކު ދިން ހަމަލާއަކާ ގުޅިގެން އެތަން ދޫކޮށް ދާން މަޖުބޫރު ވީއެވެ. ދެން ދިޔައީ އިނގިރޭސި ވިލާތަށެވެ. އެތާނގައި ހުރެގެން ދިވެހިރާއްޖޭގެ ގާނޫނު އަސާސީ އިސްލާހު ކުރީއެވެ. އޭގެ ފަހުން އެނބުރި ރާއްޖެ އައީއެވެ. ރާއްޖެ އައީމާ އަޅުގަނޑު އަނެއްކާވެސް ހައްޔަރު ކުރިއެވެ. އެކަމަކު އޭރު އަޅުގަނޑުމެންގެ މީހުން ގިނަވެ، ހަރަކާތަކަށް ބަދަލު ވެއްޖެއެވެ. ދެން އައީ އިންތިޚާބެވެ. އެޔާއެކު ދިވެހިރާއްޖޭގެ ފުރަތަމަ ޑިމޮކްރެޓިކް ސަރުކާރު އުފެދުނީއެވެ. އެ ސަރުކާރު ދެމި އޮތީ ދެ އަހަރާ ބައިވާން ދެނެވެ. ބަޣާވާތެއް ގެނައީމާ އަޅުގަނޑު ހިމާޔަތް ހޯދީ އިންޑިއަން ހައި ކޮމިޝަނުންނެވެ." ރާއްޖޭގެ މައްސަލަ ހައްލު ކުރުމުގައި އިންޑިއާގެ ދައުރާ ބެހޭ ގޮތުން ނަޝީދު ވިދާޅުވެފައި ވަނީ އެމަނިކުފާނު އިންޑިއާ ދެކެވަޑައިގަންނަވަނީ "ތަންްތަނަށް އަރައި ހިފާ" ބައެއްގެ ގޮތުގައެއް ނޫނެވެ. އަދި ކީއްތޯއެވެ؟ އެ މަަނިކުފާނު ދެކެވަޑައިގަންނަވަނީ އިންޑިއާ އަކީ "މިނިވަންކުރާ" ބައެއްގެ ގޮތުގައެވެ.
