އައްޑޫސިޓީ ހިތަދޫގައި އިމާރާތް ކުރަމުންދާ ޕޮލިސް ޓްރެއިނިން ސްކޫލާ ދިމާ ލިންކް ރޯޑުގައި މިއަދު ހެނދުނު ހިނގި އެކްސިޑެންޓުގައި އަނިޔާވި ދެމީހުންގެ ތެރެއިން އެކަކަށް ފަރުވާ ދިނުމަށްފަހު ހޮސްޕިޓަލުން ދޫކޮށްލައިފިއެވެ.
ހިތަދޫ ރީޖަނަލް ހޮސްޕިޓަލް ހިންގެވުމާ ހަވާލުވެ ހުންނެވި ސީނިއާ ކޮމިޔުނިޓީ ހެލްތު އޮފިސަރު މުހައްމަދު ނަޖީބު ވިދާޅުވީ ދޫކޮށްލި މީހާއަށް މާބޮޑު އަނިޔާއެއް ނުވާކަމަށެވެ. އެހެންނަމަވެސް އޭނާގެ ގައިގެ ބައެއް ތަންތަނުން މަށައިގެން ގޮސްފައިވާ ކަމަށެވެ. ދޫކޮށްލައިފައިވާ މީހާގެ ނަމެއްވެސް ރަށެއްވެސް އަދި އެފަދަ އެހެން މައުލޫމާތެއްވެސް ލިބޭ ގޮތެއް ނުވިއެވެ. ހޮސްޕިޓަލުން ވިދާޅުވީ އެފަދަ މައުލޫމާތު ހާމަ ނުކުރައްވާ ކަމަށެވެ.
އެކްސިޑެންޓުގައި ބޯފަޅައިގެންދިޔަ މީހާ އެޑުމިޓްކޮށްގެން މިހާރުވެސް ފަރުވާދެމުން ގެންދާ ކަމަށް ނަޖީބު ވިދާޅުވިއެވެ. އެމީހާގެ ހާލު ސީރިއަސް ނޫން ކަމަށްވެސް އޭނާ ވިދާޅުވިއެވެ. އެހެންނަމަވެސް ފަރުވާއަށްފަހު އޭނާ ދޫކޮށްލާނެ އިރެއް އަދި ބުނަން ނޭނގޭ ކަމަށް ނަޖީބު ވިދާޅުވިއެވެ.
ހޮސްޕިޓަލުގައި ބާއްވައިގެން ފަރުވާދެމުން ގެންދަނީ އުމުރުން 44 އަހަރުގެ ފިރިހެނަކަށް ކަމަށް މައުލޫމާތުވަނީ ލިބިފައެވެ. އޭނާއަކީ މަރަދޫ، ކުއްޅަވަށްގޭ މީހެއް ކަމަށްވެސް އެނގިފައިވެއެވެ.
މިއެކްސިޑެންޓް ހިނގާފައިވަނީ ސައިކަލަކާއި ބައިސްކަލެއް ޖެހިގެންނެވެ. މި މައްސަލަ ބަލަމުންދާ ކަމަށް ފުލުހުންވަނީ ވިދާޅުވެފައެވެ.
