އިދިކޮޅު އިއްތިހާދުގެ ހަރަކާތްތައް ބާރަށް ކުރިއަށްދާނެ ކަމަށް އެމްޑީޕީގެ ނާއިބު ރައީސް މުހައްމަދު ޝިފާޒު ވިދާޅުވެއްޖެއެވެ.
ޝިފާޒު ވިދާޅުވީ އިދިކޮޅު އިއްތިހާދުގެ ހަރަކާތްތައް ހުއްޓުވުމަށް ސަރުކާރުން މަސައްކަތް ކުރެއްވުމަކީ އައުކަމެއް ނޫންކަމަށެވެ. އެހެންވީމާ ސަރުކާރުން ކިތަންމެ ވަރަކަށް ފިއްތިޔަސް އެފިއްތުން ތަކުގެތެރެއިން އެ ހަރަކާތްތައް ކުރިއަށްދާނެ ކަމަށް އޭނާ ވިދާޅުވިއެވެ. "ހަރަކާތްތައް މަޑު ނުޖެހޭނެ. ބާރަށް ކުރިއަށް ގެންދާނަން،" ޝިފާޒު ވިދާޅުވިއެވެ.
އެއްވެ އުޅުމުގެ މިނިވަންކަމުގެ ތެރެއިން އިދިކޮޅުން ބާއްވާ އެއްވުންތައް ރޫޅާލައި މީހުން ހިފެހެއްޓައި އެ އެއްވުންތަކަށް ސަރުކާރުން އުދަގޫ ކުރަމުންދާ ވަރަކަށް ރައްޔިތުންގެ އަޑުއަންނަނީ ބާރުވަމުން ކަމަށްވެސް އޭނާ ވިދާޅުވިއެވެ. "ސަރުކާރުން ފިއްތާވަރަކަށް ރައްޔިތުންގެ އަޑުވީގަދަ. މިކަމާ މާބޮޑަށް މީހުން މިހާރު އުޅެގެންފި. އެހެންވީމާ އެއްވުންތައް އާންމު އުސޫލުން ކުރިއަށްދާނެ،" ޝިފާޒު ވިދާޅުވިއެވެ.
އޭނާ ވިދާޅުވީ ކުއްލި ނުރައްކަލުގެ ހާލަތު އިއުލާން ކުރެއްވުމަށްފަހުވެސް އެއްވުންތައް ބޭއްވެންވާނީ ހަމައެކަނި ޕީޕީއެމްއަށް ނޫންކަމަށެވެ. އެ ޕާޓީއާ އެއްގޮތަށް އެހެން މީހުންނަށްވެސް އެފުރުސަތު އޮންނަންވާނެ ކަމަށް އޭނާ ވިދާޅުވިއެވެ.
ރައީސް ޔާމީން ކުއްލި ނުރައްކަލުގެ ހާލަތު އިއުލާން ކުރެއްވީ ސިޔާސީ ގޮތުން އެމަނިކުފާނު ބޭނުންފުޅުވާ ބައެއްކަންކަން ކުރެއްވުމަށް ކަމަށްވެސް ޝިފާޒު ވިދާޅުވިއެވެ. ކުއްލި ނުރައްކަލުގެ ހާލަތު އިއުލާން ކުރެއްވީ ގާނޫނާ ޚިލާފަށް ސަރުކާރު ކުރައްވާ ކަންކަމުގައި "ރައްޔިތުންގެ ނުރުހުން ނުދެކެން،" ކަމަށްވެސް އޭނާ ވިދާޅުވިއެވެ.
