ރާއްޖޭގެ ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ދެ މިނިސްޓަރަކު ޖުމްހޫރީޕާޓީ (ޖޭޕީ) އަށް މިރޭ ސޮއިކުރައްވައިފިއެވެ.
މި ބޭފުޅުން ޖޭޕީއަށް ސޮއިކުރެއްވީ ޖަރުމަނުވިލާތުގެ ފްރެންކްފާޓްގައެވެ.
ޑރ. ޖަމީލުގެ އިތުރަށް ޖޭޕީއަށް މިރޭ ސޮއިކުރެއްވީ ރައީސް އޮފީހުގެ ކުރީގެ މިނިސްޓަރ އަބްދުﷲ އަމީނާއި، ކުރީގެ ޔޫތު މިނިސްޓަރު މުހައްމަދު މަލީހު ޖަމާލެވެ.އެބޭފުޅުންގެ އިތުރަށް މިނިސްޓްރީ އޮފް ޑިފެންސްގެ ކުރީގެ ސްޓޭޓް މިނިސްޓަރ މުހައްމަދު އަހްމަދު މަނިކާއި، އެމްއެންޑީއެފްގެ ކުރީގެ މެޑިކަން ޑޮކްޓަރ ޑރ. ޝާހު މާހިރުވެސް ވަނީ އެޕާޓީއަށް ސޮއިކުރައްވައިފިއެވެ.
އެމަނިކުފާނު ވިދާޅުވީ ރައީސް ޔާމީންގެ މިސަރުކާރަކީ އެމަނިކުފާނުވެސް ވަރަށް ބޮޑަށް މަސައްކަތް ކުރައްވައިގެން ގެންނެވި ސަރުކާރެއް ކަމަށެވެ. އެހެންމަމަވެސް ސަރުކާރު އިނތިޚާބުވެ މާގިނަދުވަހެއް ނުވަނީސް ކަންކަން ބަދަލުވާން ފެށިކަމަށެވެ. އެގޮތުން އިންސާފުގެ ބަދަލުގައި ނާއިންސާފާ ދިމާއަށް ކަންކަން ދާންފެށި ކަމަށްވެސް ވިދާޅުވިއެވެ.
އެމަނިކުފާނު ވިދާޅުވީ ރައީސް ޔާމީން ވެރިކަމަށް ވަޑައިގެންނެވީ ރައްޔިތުންނަށް ބޮޑެތި ވައުދތަކެއް ކުރައްވަމުން ކަމަށެވެ. އެގޮތުން ރައްޔިތުންނަށް އިންސާފުން ބީހިޔާވަހިކަން ފޯރުކޮށްދެއްވާނެ ކަމުގެ ވައުދު ހިމެނެއެވެ. އެހެންނަމަވެސް އެކަން އެގޮތަށްވަމުންދާތަނެއް ނުފެންނަ ކަމަށް ޖަމީލް ވިދާޅުވިއެވެ.
ރައްޔިތުން މިހާރު ބޭނުންވަނީ ރީތިކޮށް އޮމާން، އަމާންކަމާއެކު ވެރިކަން ކުރައްވާނެ އިންސާފުވެރި ވެރިއެއް ކަމަށްވެސް އެމަނިކުފާނު ވިދާޅުވިއެވެ. އޭގެ ބަދަލުގައި މިހާރު ރައީސް ޔަމީންވަނީ އެމަނުކުފާނަށް ވެރިކަން ހޯއްދަވައި ދެއްވުމަށް މަސައްކަތް ކުރެއްވީ ބޭފުޅުންނާއި އާއިލީ ބޭފުޅުންވެސް އެއްފަރާތްކޮށްފައި ކަމަށް ޑރ.ޖަމީލް ވިދާޅުވިއެވެ. އޭގެ ތެރޭގައި ޖޭޕީގެ ލީޑަރު ގާސިމް އިބްރާހީމްވެސް ހިމެނިވަޑައިގަންނަވާ ކަމަށް ޖަމީލް ވިދާޅުވިއެވެ. 2013 ވަނަ އަހަރު ބޭއްވި ރިޔާސީ އިންތިޚާބުގެ ދެވަނަބުރުގައި ރައީސް ޔާމީން ކުރިހޯއްދަވައިގެން ވެރިކަމަށް ވަޑައިގެންނެވީ ގާސިމް އިބްރާހީމް އެމަނިކުފާނާ ބައްޔަތު ހިއްޕެވުމުން ކަމަށްވެސް ޑރ. ޖަމީލް ވިދާޅުވިއެވެ. ގާސިމް އެދުވަހުވެސް އެދިވަޑައިގެންނެވީ ރައްޔިތުންނަށް އަދުލުވެރި ހެޔޮވެރިކަމެއް ކޮށްދެއްވަން ކަމަށް ޑރ. ޖަމީލް ވިދާޅުވިއެވެ. އެގޮތަށްވެސް އެއްބަސްވެ ޑައިގެންނެވީ ރައީސް ޔާމީނާއި، މައުމޫނާއި ޚުދު ޖަމީލްވެސް ގާސިމަށް އާދޭސް ދެންނެވުމުން ކަމަށް އެމަނިކުފާނު ވިދާޅުވިއެވެ.
ޑރ. ޖަމީލް ވިދާޅުވީ ގާސިމް އިބާރާހީމަކީ އެންމެހާ ރައްޔިތުން ގޮވައިގެން އިންސާނިއްޔަތުކަން އިސްކުރައްވައިގެން އަދުލަށް ވެރިކަން ކޮށްދެއްވާނެ ބޭފުޅެއް ކަމަށް ގަބޫލުކުރައްވާ ކަމަށެވެ. އެމަނިކުފާނު އެހެން ވިދާޅުވިޔަސް މިހާރު ގާނޫނު އަސާސީ އޮތްގޮތުން ގާސިމަށް ވެރިކަމަށް ކުރިމަތިވެސް ނުލެއްވޭނެއެވެ.
