ފެބުރުއަރީ ފުރަތަމަ ދުވަހުގެރޭ ސްޕްރީމް ކޯޓުން ނެރުނު އަމުރަކީ ރޭވިގެންއައި ނުބައި ބަޣާވާތެއް ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ "މަގޭ ދީނާ، މަގޭ ގައުމާ" މި ނަމުގައި ޕީޕީއެމުން މިރޭ ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުންނެވެ. "ފުލުހުންގެ ތަހުގީގުތަކުން އެބަހާމަވޭ މިރޭވުނީ ނުބައި ބަޣާވާތެއްކަން. އަދި މިކަމުގައި ވަރަށް އިއްޒަތްތެރި ބޭފުޅުންކޮޅެއް ޝާމިލްވޭ،" ރައީސް ވިދާޅުވިއެވެ. އޭގެ ތެރޭގައި ކުރީގެ ރައީސް މައުމޫން އަބްދުލްގައްޔޫމާއި، އުއްތަމަ ފަނޑިޔާރު އަބްދުﷲ ސައީދާއި، ސްޕްރީމް ކޯޓުގެ ފަނޑިޔާރު، އަލީ ހަމީދާއި، ޖުޑިޝަލް އެޑުމިނިސްޓްރޭޝަންގެ ވެރިޔާ ހަސަން ސައީދު ހިމެނި ވަޑައިގަންނަވާ ކަމަށްވަނީ ތުހުމަތު ކުރެވިފައެވެ. މިބޭފުޅުން މިހާރުވަނީ ބަންދުގައެވެ.
ރައީސް ވިދާޅުވީ ދައުލަތުން މިހާރު ގެންދަވަނީ އެ މައްސަލަ ބައްލަވަމުން ކަމަށެވެ. އެ މައްސަލަ ބައްލަވައި ނިމޭއިރު ދައުލަތުގެ ފަރާތުން ވިދާޅުވާންއޮތީ ކިހާވަރުގަދަ ވާހަކައެއްކަން އެނގިގެންދާނެ ކަމަށެވެ. "އަޅުގަނޑުމެން މިވާހަކަ ކިޔައިދިނީމާ އިދިކޮޅު މީހުންނަށްވެސް އަދި ބޭރު މީހުންނަށްވެސް ދެނެއް ޖަދަލެއް ނުކުރެވޭނެ،" ރައީސް ވިދާޅުވިއެވެ. އެމަނިކުފާނު ވިދާޅުވީ ބަޔަކު ކިތަންމެ ނުބައި ރޭވުމެއް ރޭވިޔަސް ﷲގެ ތަގުދީރު މާފުރިހަމަ ކަމަށެވެ.
"ފިތުރަތުން އައި ހަނދުކޭތައަށްވުރެބޮޑު ހަނދުކޭތައެއް އަޅުގަނޑުމެންނާ ކުރިމަތިލީ. ސުނާމީއެއް ވެއްޖެއްޔާ ސުނާމީއެއް. ޒަލްޒަލާއެއް ވެއްޖެއްޔާ ޒަލްޒަލާއެއް. ޝައްކެއްވެސްނެތް ގޮތުގައި ނުބައިނުލަފާ ރޭވުމެއްމިއީ. އެރޭވުން ﷲ ނެތިކޮށްލެއްވީ،" ރައީސް ވިދާޅުވިއެވެ.
ރާއްޖޭގައި މިހާރު ހިނގަމުންދާ ކަންކަން ހައްލުކުރުމަށް ބޭރުގެ އަސްކަރިއްޔާގެ އެހީއަށްއެދި ބައެއް ފަރާތްތަކުން ގޮވައިލެއްވުމުން އެކަމަށްވެސް ރައީސްވަނީ މިރޭ ރައްދު ދެއްވައިފައެވެ. އެމަނިކުފާނު ވިދާޅުވީ ދިވެހިންގެ ގޮތުގައިތިބެ އެފަދަ ދައުވަތެއް ދިވެއްސަކަށް ނުދެވޭނެ ކަމަށެވެ. "ދިވެހިންގެ ކަންތައްތައް ހައްލުކުރާކަށް ބޭރުގެ އަސްކަރިއްޔާއަށް އަންނާކަށް ދައުވަތެއް ނުދެވޭނެ ދިވެހިރައްޔިތަކަށް. އެއީ ގާނޫނީކުށެއް. އެހެންނަމަވެސް ޑިމޮކްރަސީގައި މިހުންނަ ރީތި ސިފަތަކުގައި ޚިޔާލުފާޅުކުރުމުގެ މިނިވަންކަން އޮވެޔޭ ކިޔާފައި ޚިޔާލު ފާޅުކުރަންޏާ މިހަކަލަ ވާހަކަ ދެއްކިދާނެ،" ރައީސް ވިދާޅުވިއެވެ.
އެމަނިކުފާނު ވިދާޅުވީ ޚިޔާލުފާޅު ކުރުމުގެ ތެރޭގައި މުޅިދައުލަތުގެ ހައްގަށާއި، ގައުމުގެ ހައްގަށް އިހާނެތިކަންކަން ރައްދުވާ ޒާތުގެ ވާހަކަ ނުބުނެވޭނެ ކަމަށެވެ.
"އަޅުގަނޑުމެން ދިވެހިރާއްޖޭގައި ދިވެހިރާއްޖޭގެ ކަންކަން ހައްލުކުރާކަށް ބޭރުގެ އަސްކަރިއްޔާއެއް ނުގެނެވޭނެ. ކުލީ ސިފައިންނެއް ނުގެނެވޭނެ. އެއީ ކުރަން ހެޔޮވާވަރު ކަމެއްނޫން،" އެމަނިކުފާނު ވިދާޅުވިއެވެ.
