ކިރުއިލޮށި - 45

(22 އޭޕްރީލް 2023 ގައި ޝާއިއުކުރި ބަޔާ ގުޅޭ)

އެހެންކަމުން ، އަޝްހަރު އޭނާގެ މަންމަގާތު ކޮންމެ ވާހަކައެއް ދެއްކިނަމަވެސް އެއީ ޚައިރާދުގެ މައްސަލައެއް ނޫނެވެ. އަޝްހަރުގެ މަންމަގެ ނުބައި ނުލަފާކަމުގެ ވާހަކަ ދައްކާކަށް ޚައިރާދު ބޭނުމެއް ނުވެއެވެ. އެއީ އަޝްހަރަށް ޤަބޫލުކުރެވޭނެ ކަމެއްނޫނެވެ. އަޝްހަރަށް ތެދު ޤަބޫލުކޮށް ޙަޤީޤަތް އެނގޭވަރަށްވުރެ ބޮޑަށް ފަރީދާވަނީ ، އަޝްހަރުގެ ސިކުނޑިއާ ކުޅެލާފައެވެ.

ގިނަދުވަސްވަމުންދާވަރަކަށް ، އަޝްހަރާއި ޚައިރާދާ ދެމެދު އުފެދެމުންދާ ނުރުހުމާއި ނަފުރަތު ދިޔައީ އިތުރުވަމުންނެވެ. އެއްގެޔެއްގައި އުޅެން ޖެހުނުނަމަވެސް ، އެއީ އަދި ، ދެމަފިރިންކަމުގައިވިޔަސް އެދެމީޙުންގެ މެދުގައި އުފެދޭ މައްސަލަތަކުގެ އަސަރު ހަރީމަކަށް ނާންގައެވެ. ދެމީހުންވެސް ބަލަނީ އެންމެ އިސްކަމެއްދޭނީ ހަރީމުގެ ޞިއްޙަތަށް ކަމުގައެވެ. އެކަމަށްޓަކައި ވާންޖެހުނު ކޮންމެ ޤުރުބާނީއެއްވެސް ދެމީހުންވެސް ވާނެއެވެ.

އަޝްހަރު އޮފީހުގައި އުޅެނިކޮށް ، ހަރީމް ފޯނުކޮށްފައި ބޭރަށް ، ދުއްވާލަން ދާންބޭނުންވާހަކަ ބުންޏެވެ. އެއިރު އަޝްހަރާއި ސާރާ އަދި އޮފީހުގެ އެހެން މުއައްޒަފަކާއެކު ،ތައްޔާރުވަމުން އެގެންދަނީ ޕްރެޒެންޓޭޝަނެއް ދިނުމަށެވެ. ހަރީމްގެ ފޯނުއައީ ، އެބައްދަލުވުމަށް ތިންމީހުންވެސް ވަންނަން ކުޑަވަގުތުކޮޅަކަށްވެފައި އޮއްވައެވެ. ހަރީމްގާތު ބައްޕަ މިއަންނަނީއޭ ބުނެ ސަރާމެން ޕްރެޒެންޓޭޝަން ހުށަހަޅާށޭ ތިމަންނަ ކުއްލިގޮތަކަށް ދާޏްޖެހިއްޖޭބުނެ އަޝްހަރު ގެޔަށް ނައްޓައިލިއެވެ.

ގެޔަށް އައިއިރު ، ބޭސްބޯންދޭން އުޅޭތީ ޚައިރާދުދެކެ ރުޅިއަރައިގެންފައި ހަރީމް އިނެވެ. ޚައިރާދުވީ ކޮޓަރި ތެރޭގައެވެ. ހަރީމްގެ މޫނުމަތިން ނުތަނަވަސްކަން ފެނުމުން އަޝްހަރު ކަންބޮޑުވިއެވެ. އެވާނީ ޚައިރާދު އަނެއްކާވެސް ހަރީމާދިމާއަށް އެއްޗެހިގޮވައިގަތީ ކަމަށެވެ. އެކަމަކު އެވާހަކަ ދައްކައިގެން ބޭރަށްދާންއޮތް ޕްލޭނަށް އަސަރު ކޮށްފާނެއެވެ. ޚައިރާދު އެމީހުންނާއެކު ބޭރަށްދާން ދެކޮޅު ހަދައިފާނެއެވެ.

ބައްޕަޔަށް ފޯނުކުރަން ފެށީމަ މަންމަ ފޯނުއަތުލާފަ ބައްޕަޔަށް އުނދަގޫ ނުކުރަން ބުނެ އަޑުލީ ވާހަކަ ހަރީމް ބުންޏެވެ. މަންމަ ފާޚާއަށް ވަތްތަނުން ، އޭނާ ޚައިރާދަށް ނާންގާ އަޝްހަރާ ގުޅިކަމެއް ޚައިރާދަކަށް ނޭނގޭނެއެވެ. ހަރީމް ކަންބޮޑުވެފައި އިނީ ބައްޕަ ގެޔަށް އައީ އޭނާ ފޯނުކޮށްގެންކަން އެނގިއްޖިއްޔާ ޚައިރާދު ރުޅިއަންނާނެކަން ހަރީމަށް އެނގެއެވެ. އެކަމަކު އެކަން ހަމަޖައްސާނީ ކިހިނެއްކަމެއް އެ ތުއްތު ހަރީމަކަށް ނޭނގެއެވެ. އެކަމުގައި ހަރީމް ކުށްވެރިނުވެ . މަންމަ ހައްލާލައިގެން ބޭރަށްގެންދަން ހަރީމް ބޭނުންވިއެވެ. އެންމެފަހުން ،  އަޝްހަރު އެކަމުގެ ޙައްލު ހޯދައިދީފިއެވެ. އެއީ ކުޑަދޮގެއް ހެދުމެވެ. ބައްޕަޔަށް ފޯނުކުރީ ހަރީމް ނޫންކަމަށާއި ހަރީމަށް ފޯނުކުރީބައްޕަ ކަމުގައި މަންމަގާތު ބުނާށެވެ ! އަޝްހަރު ހަރީމްގާތު ބުންޏެވެ.

ހަރީމް ، ވަގުތުން ނޫނެކޭ ބުންޏެވެ. އަދި ދޮގުހަދަން ފުރަތަމަ ފަހަރު ފަސޭހަވިޔަސް އެދޮގު ފޫބައްދަން އެތައް ދޮގެއް ހަދަންޖެހޭނެ ކަމުގައި ހަރީމް ބުންޏެވެ. އެހެންވީމާ އޭނާ ދުވަހަކުވެސް ދޮގެއް ނުހަދާނެއެވެ. އެކަމާ އަޝްހަރު ވަރަށް އުފާކުރިއެވެ. އެއީ ހަރީމްގެ ހުރި ރަނގަޅު މާތް އާދައެއްކަމުގައި ބުންޏެވެ. އަދި ، ކޮން ޓީޗަރަކު ދަސްކޮށްދިން ކަމެއްތޯ އަޝްހަރު ސުއާލު ކުރިއެވެ.

އެއީ މަންމަ ދަސްކޮށްދިން ކަމެއްކަމުގައި ހަރީމް ބުންޏެވެ. ހަރީމްގެ ވާހަކައިން އަޝްހަރުގެ ޙަރަކާތަށް ހުއްޓުމެއް އައެވެ. ތެދު ހެދުމާބެހޭގޮތުން ، ޚައިރާދުގެ ބައްޕަ ބުނިކަމަށް ކިޔައިދީފައިވާ ވާހަކަތައް އަޝްހަރުގެ ހަނދާނަށް އައެވެ.

ޚާއިރާދު ކޮޓަރިން ނުކުތުމާއެކު ، ހަރީން ، އަޝްހަރާދިމާއަށް ބަލައިލިއެވެ. މަންމަ ފާޚާނާއަށް ވަނީމަ ، ބައްޕަޔަށް ފޯނުކޮށްގެން ގެޔަށް ގެނެވުނުވާހަކަ ބުންޏެވެ. އެކަމަކު ، މަންމަވެސް އެމީހުންނާއެކު ދުއްވާލަން ބޭރަށްދާން ވާނެވާހަކަ ހަރީމް ބުންޏެވެ. ޚައިރާދު ހިތްހަމަނުޖެހިގެން ، ހަރީމަކީ ގޯސްކުއްޖެއްކަމުގައި ބުންޏެވެ. އަދި އޭނާ ބޭރަށް ނުދާނެކަމަށާއި އަޝްހަރާއި ހަރީމް ، ދާތާކަށް ދާށޭ ބުނެފައި އެނބުރި ކޮޓަރިޔަށް ވަނެވެ. ޚައިރާދު ކޮޓަރިޔަށް ވަނުމުގެ ކުރިން ޢަޝްހަރު ، ހަރީމާ ވާހަކަ ދައްކައިލިއެވެ. ހަރީމަކީ ގޯސްކުއްޖެއްނޫންކަމަށާއި ، ބޮޑެތި މީހުންބުނާބަސް އަހާނެކަމަށް އަޝްހަރު ބުންޏެވެ. ހަރީމްވެސް އެކަމަށް އެއްބަސްވެ ، އެމީހުންނާއެކު ، ބޭރަށްދާން އެއްބަސްވުމަށް ޚައިރާދުގެ ކިބައިން އެދުނެވެ.

ހަރީމް ބަސްއަހަންޏާ މަންމަވެސް ހަރީމްބުނާގޮތެއްހަދާނެކަމަށް ޚައިރާދު ބުންޏެވެ. އަދި އެދެބަފައިންނާއެކު ބޭރަށް ދާން އެއްބަސްވިއެވެ.

ދުއްވާލަމުންގޮސް މެންދުރުކާން ތަނަކަށް މަޑުކުރުމަށް އަޝްހަރު ނިންމިއެވެ. އަދި ، މެންދުރު ކާންބޭނުންވަނީ ކޮން އެއްޗެއްތޯ ހަރީމްކުރެން އަހައި ، ރެސްޓޯރެންޓަކަށް ވަދެ ތިންމީހުން ޖައްސައިލިއެވެ.

ސާރާ އެނބުރެމުން ސެނބުރެމުން އައިސް އޭނާގެ ކަޅި އަޝްހަރުގެ ގައިގާ އަޅައިގަތެވެ. ލިބުނު ޙައިރާންކަމުގައި ސާރާގެ އަނގަ ތަންމިނަށް ހުޅުވުމެވެ. އަޝްހަރާއެކު އެއިނީ ޚައިރާދު ފިޔަވައި އެހެންމީހެއްނޫނެވެ. އެދެމީހުންނާއެކު 4 ވަރަކަށް އަހަރުގެ އަންހެންކުއްޖަކުވެސް އިނެވެ. ސާރާއަށް ހަދާނެގޮތް ބޮޑުވިއެވެ. ދެލޯ ދެފަހަރަކަށް ފުހެލުމަށްފަހު ބަލައިލީމަވެސް ސާރާއަށް ފެނުނީ ހަމަ ކުރިން ފެނުނު މަންޒަރެވެ. އަޝްހަރާއި ޚައިރާދާ އަދި އެ ކުޑަ އަންހެންކުއްޖާއެވެ. އެތަނަށް ދާނީބާވައެވެ. ނުވަތަ އަޅައިނުލާ ނުފެންނަކަމަށް ހަދާނީ ބާވައެވެ. ސާރާގެ ހިތަށް އެރިއެވެ. އެންމެފަހުން ، ސާރާއަކަށް ކެތެއް ނުކުރެވުނެވެ. އޭނާގެ ކެހިވެރިހިތް އެދިމާއަށް އޭނާ ގެންދިޔައެވެ. ފަހަތުންގޮސް ، އަޝްހަރަށް ގޮވައިލިއެވެ.

އަޝްހަރަށްވެސް ލިބުނީ ޙައިރާންކަމެކެވެ. ސާރާ އެރެސްޓޯރެންޓުން ފެންނާނެކަމަކަށް އަޝްހަރު ހިތަކަށް ނާރައެވެ. ބުނާނެ އެއްޗެއްނޭނގި އަޝްހަރު އިރުކޮޅަކު އިނެވެ. ޚައިރާދުވެސް ލަދުވެތިކަމާއެކު އިސްދަށަށް ޖަހާލައިގެން އިނެވެ. ވާހަކަ ދައްކަންފެށީ ސާރާއެވެ. އަޝްހަރު އޮފީހުން ނުކުތީ ، މަސައްކަތު ބައްދަލުވުމަކަށް ދާނަމޭ ކިޔާފައެވެ. އޭނާ އޮފީހުން ނުކުތީ އެތަނަށްދާންކަމަށް އަޝްހަރު ބުންޏެވެ. އެތަނަށް ދެވޭގޮތްނުވީކަމުގައި އަޝްހަރު ބުންޏެވެ.

ދާން އެނުކުތް ތަނަކަށް ނުދެވުމުގެ ސަބަބު އޭނާގެ ކުރިމަތިން އެބަފެނެއޭ ސާރާ ބުންޏެވެ. އޭނާގެ ރާގުގައިވަނީ މަލާމާތެވެ.

" ކަރާޗީއަށް އެނބުރި އައީ ހެއްޔެވެ ؟ ކިހިނެއް ހެއްޔެވެ ؟ ތި ޢާއިލާ އަލުން ގުޅުނީ ކޮންއިރަކު ހެއްޔެވެ ؟ އެންމެ އަޖަބުކަމަކީ ތިހާބޮޑުކަމެއް އަހަރެންނަށް އެނގުމަކައިވެސް ނުލާ ހިނގައި ދިއުމެވެ. މީދަ ފެންނަ ކުއްޖަކީ ޚައިރާދުގެ ދަރިފުޅުދޯއެވެ ؟ " ޚައިރާދާ ދިމާއަށް ލޯއަޅައިގެންހުރެ ސާރާ ވާހަކަ ދައްކަމުން ގެންދިޔައެވެ.

އެއީ އޭނާގެ ކުއްޖެއްކަމަށް ޚައިރާދު ބުންޏެވެ. ހަމައެއާއެކު ، ފަހަރެއްގައި އަޝްހަރުގެވެސް ދަރިފުޅުކަމަށް ވެދާނެއެވެ. އަޝްހަރާ ދިމާއަށް ބަލައިލަމުން ސާރާ ބުންޏެވެ. އެކަމާބެހޭގޮތުން ، ފަހުން ވާހަކަ ދައްކާނީކަމަށް އަޝްހަރު ބުންޏެވެ.

" އަޝްހަރެވެ. ތިޔައީ ވަރަށް ނަޞީބުގަދަ ފިރިހެނެކެވެ. ތިންހަތަރު އަހަރުފަހުން އަނބިމީހާ ފެނިއްޖެއެވެ. އަނބިމީހާ އަތުޖެހުނުއިރު ޖާދޫއެއްފަދައިން ދަރިޔަކުވެސް ލިބިއްޖެއެވެ. " ސާރާ ބުންޏެވެ.

ސާރާގެ މަލާމާތުގެ ވާހަކަތައް އަޑުއަހާކަށް އަޝްހަރަކަށް ކެތެއް ނުކުރެވުނެވެ. ރުޅިއައިސް ރަތްވެފައި ފުންމައިގެން ތެދުވިއެވެ. އަދި ބުނެވޭ އެއްޗަކަށް ވިސްނައިގެން ވާހަކަ ދައްކާށޭބުނެ ސާރާއާ ދިމާއަށް ހަޅޭއްލަވައިގަތެވެ. ސާރާގެ ވާހަކަ ހައްދުން އެބަނައްޓާކަމަށާއި އޭނާގާތަށް ރުޅި އައިއްސިއްޔާ ބުނެވޭއެއްޗެއް ނޭނގޭނެކަމަށް އަޝްހަރު ބުންޏެވެ. އެކަމާ އަޝްހަރު ކަންބޮޑުނުވުމަށް ސާރާ ބުންޏެވެ. އޭނާ އެތަނުން ހިނގައިދާނެކަމަށާއި ، އެ ޢާއިލާގެ ގުޅުން ފެނިފައި ސަލާމް ކޮށްލުމަށް އާދެވުނީކަމުގައި ސާރާ ބުންޏެވެ. އަދި ހަރީމަށް ގޮވާލާފައި އަޝްހަރާދިމާއަށް ކަޅިއަޅަމުން އެތަނުން ނުކުމެގެން ދިޔައެވެ.

ސާރާ ގެޔަށްގޮސް ނޯކަރަށް ގޮވީމަ އަޑުނީވެގެން ، ހުރިހާމީހުން ކޮންތާކަށްހޭ ދިޔައީ ގޮވަމުން ސިޑިން އަރައިގެންގޮސް ކޮޓަރިޔަށް ވަދެ ތަޅުލިއެވެ. ދަރިފުޅާއޭ ކިހިނެއްހޭވީ އަހަމުން ، ޒަރީނާވެސް ސާރާޣެ ފަހަތުން ދުވަމުން ސިޑިން އެރިއެވެ. އެކަމަކު ސާރާ ކޮޓަރިޔަށްވަދެ ދޮރުލެއްޕުމުގެކުރިން ޒަރީނާއަކަށް ނާދެވުނެވެ. ސާރާއަށް ގޮވަމުން ، ޒަރީނާ ދޮރުގައި ތަޅަމުންގެންދިޔައެވެ. އެންމެފަހުން ޒަރީނާ ދޮރުގައި ތަޅާވަރުން ނުހުރެވިގެން ސާރާގޮސް ދޮރުހުޅުވިއެވެ. ކިހިނެއްތޯވީ އަހައި ، ކަންބޮޑުވެފައިހުރި ޒަރީނާ ސާރާއާ ދިމާއަށް ހަޅޭއްލަވައިގަތެވެ. އޭނާއަށް އެއްވެސްކަމެއް ނުވާކަމަށާއި ، އޭނާ އަމިއްލަޔަށް މަރުނުވާނެކަމަށް ސާރާ ބުންޏެވެ. ކުޑައިރުކޮޅަކު އޭނާ އެކަނިވެލަން ބޭނުންކަމަށާއި އޭނާއަށް އުނދަގޫ ނުކުރަން ބުނަމުން ސާރާ އަނެއްކާވެސް ދޮރުލައްޕައި ތަޅުލިއެވެ.

ސާރާ ރޮމުން ރޮމުން ފޯނުނަގައި ފަރީދާއާ ގުޅިއެވެ. އަދި ރޮއިގަތެވެ. ޚައިރާދު އެނބުރި އަތުވެއްޖެކަމުގައި ރޮމުން ރޮމުން ބުންޏެވެ. ސާރާއެދައްކަނީ ކޮންކަހަލަ ވާހަކައެއްކަމެއް ފަރީދާއަކަށް ނުވިސްނުނެވެ. އެއީ ކިހިނެއްވާނެ ކަމެއް ހެއްޔެވެ ؟ ސާރާ ތިދައްކަނީ ކޮންކަހަލަ ވާހަކައެއްތޯ އަނެއްކާވެސް ފަރީދާ ބުންޏެވެ. އަޝްހަރުގެ ދިރިއުޅުމަށް ޚައިރާދު އެނބުރި އަތުވެއްޖެކަމަށް އަނެއްކާވެސް ސާރާ ބުންޏެވެ. ސާރާގާތު އެވާހަކަ ބުނީ ކާކުތޯ އާއި އެއީ ވާނެކަމެއްނޫންކަމަށް ފަރީދާ ބުންޏެވެ. މީގެ ބައިގަޑިއިރެއްހާއިރު ކުރިން  ސާރާ އެއައީ އޭނާގެ އަމިއްލަ ލޮލުން ، އަޝްހަރާއި ޚައިރާދު އަދި ޚައިރާދުގެ ދަރިފުޅު ، ރެސްޓޯރެންޓެއްގައި ތިއްބާ ދެކެފައިކަމުގައި ބުންޏެވެ. ލޯބި ޢާއިލާއެއްގެ ތަޞައްވުރުގައި އެތިންމީހުން އޭނާއަށް ފެނުނުކަމަށް ބުންޏެވެ. ސާރާގެ ރުއިން ހުއްޓައިނުލައި ރޮމުން ރޮމުން ހުރިހާ ވާހަކައެއް ދައްކަމުން ގެންދިޔައެވެ. އެއީ ކިހިނެއްވާނެކަމެއްތޯ ފަރީދާ ސުއާލުކުރިއެވެ. ޚާއިރާދުގެ ނަންވެސް އަޑުއަހަން އަޝްހަރު ބޭނުންނުވާނެކަމަށް ފަރީދާ ބުންޏެވެ. އެމީހުން އެންމެންގެ ލޮލުގައި އަނދުން އަޅުވާފައި އަޝްހަރު އޭނާގެ އަންހެނުން ގޮވައިގެން މުޅިރަށުގައި ދުއްވަނީކަމުގައި ސާރާ ބުންޏެވެ. އެއްވެސް މީހަކަށް އަންގައިނުލާ އެންމެންނަށް ވަގަށެވެ. މިފަހަރު ޚައިރާދު އެއައީ އެކަނި ނޫންކަމަށާއި އޭނާގެ ދަރިފުޅުވެސް ގޮވައިގެންކަމުގައި ސާރާ ބުންޏެވެ. އަދި ވީ އެންމެ އަވަހަކަށް ފަރީދާ އެނބުރި ރަށަށް އައުމަށް ސާރާ އެދުނެވެ. އެކަން ޙައްލުކުރުމަށް ކަމެއް ކުރެވޭނީ ހަމައެކަނި ފަރީދާއަށް ކަމުގައި ސާރާ ބުންޏެވެ. އަދި އެކަމަށް އެދި ރޮއެ އާދޭސްކުރަމުން ސާރާ ފޯނު ކަނޑައިލިއެވެ. ފަރީދާ ހަދާނެގޮތް ބޮޑުވިއެވެ. އެއީ ތެދެއްކަމަށް ވަންޏާ އެކަން ހަމަޖެއްސޭނީ އަނެއްކާވެސް ވަރަށް ބޮޑު ރޭވުމެއްގެ ތެރެއިންކަމުގައި ފަރީދާއަށް ފެނުނެވެ.

އަފްސީން ، ޚައިރާދާ ބައްދަލުކޮށްލުމަށްޓަކައި އެގެޔަށް ޒިޔާރަތްކުރިއެވެ. ދެރަޙުމަތްތެރިންގެ ވާހަކަ މުޅިންވެސް އޮތީ ހަރީމަށް ޚާއްޞަ ކުރެވިފައެވެ. ހަރީމުގެ ސާޖަރީ އޮތީ އަންނަ ހޯމަދުވަހަށް ތާވަލު ކުރެވިފައެވެ. ހަރީމަށް އޭނާގެ ބައްޕަގެ ލޯބި ވަރަށް ފުރިހަމަޔަށް ލިބިއްޖެއެވެ. ލޭގެ ގުޅުމުގެ އިތުރަށް ބައްޕަގެ ލޯތްބަކީ އެވަގުތަށް ހަރީމަށް ވަރަށް މުހިންމު އެއްޗެކެވެ. އަޝްހަރަކީ ރަނގަޅު ބައްޕައެއްކަން އޭނާ ސާބިތު ކޮށްދީފިއެވެ. ހަރީމްދެކެ އަޝްހަރު ވަރަށް ލޯބިވެއެވެ. އެކަމަށްޓަކައި ކޮޅުނެތްކޮޅަށް ، ﷲ އަށް ޚައިރާދު ޝުކުރު އަދާކުރެއެވެ. ކޮންމެ ނަމާދެއްގެ ފަހުގައި އޭނާގެ ދަރިފުޅަށް ޝިފާ ދެއްވުން އެދި ދުޢާ ކުރެއެވެ.

އަފްޝީން ހަމަހިމޭން ވެލިއެވެ. އަދި ވާހަކައެއް ބުނަންތޯ ޚައިރާދުކުރެން އެހިއެވެ. އަޝްހަރު އަލުން ޚައިރާދާގުޅި  ، ހަރީމާއެކު އުފާވެރި ދިރިއުޅުމެއް ފެށުމަށް އެދިއްޖެނަމަ ، އެކަން ޤަބޫލުކުރާށެވެ ! " އަފްޝީން ބުންޏެވެ.

ޚައިރާދުގެ މޫނުމަތިން ހިތްހަމަނުޖެހުން ފާޅުވިއެވެ. އޭނާގެ ދެލޯ ތަންމިނަށް ބޮޑުވިއެވެ. އަފްޝީން އެދައްކަނީ ކޮންކަހަލަ ވާހަކައެއްތޯ ސުއާލުކުރިއެވެ. އަދި އެއީ ވާނެ ކަމެއްނޫންކަމަށް ޚައިރާދު ހަރުއަޑުން ބުންޏެވެ. އެކަމާބެހޭގޮތުން އޭނާ އެއްވެސް ވަރަކަށް ދެން ނުވިސްނާނެކަމަށްވެސް ބުންޏެވެ.

އަޝްހަރު ބޭރަށް ދިއުމަށްޓަކައި ނުކުންނަނިކޮށް އަފްޝީނާއި ޚައިރާދު ވާހަކަ ދައްކަން ތިބިތަން ފެނުނެވެ. ޚައިރާދާއި އަފްޝީން ދެއްކި ވާހަކަތަކުގެ އަޑުއަހަން ، އަޝްހަރު ދުރުގައި މަޑުކޮށްލިއެވެ. އެމީހުން ދެއްކި ހުރިހާ ވާހަކަތަކެއް އަޝްހަރަށް ސާފުކޮށް އަޑުއިވުނެވެ. އަޝްހަރު އިތުރަށް މަޑުނުކޮށް ބޭރަށްދާން ނުކުތެވެ.

ކާރުސުއްވަމުން ދިޔަމަގުމަތީގައި އޭނާގެ ކަންފަތަށް ، ޚައިރާދާއި އަފްޝީންގެ އެންމެފަހު ވާހަކައިގެ ތަންކޮޅު ތަކުރާރުވިއެވެ.

" އަޝްހަރު އަލުން ޚައިރާދާ ގުޅި ، ހަރީމާއެކު އުފާވެރި ދިރިއުޅުމެއް ފެށުމަށް އެދިއްޖެނަމަ ، އެކަން ޤަބޫލުކުރާށެވެ ! އަފްޝީން އެދައްކަނީ ކޮންކަހަލަ ވާހަކައެއްތޯ ޚައިރާދު ސުއާލުކުރިއެވެ. އަދި އެއީ ވާނެ ކަމެއްނޫންކަމަށް ޚައިރާދު ހަރުއަޑުން ބުންޏެވެ. އެކަމާބެހޭގޮތުން އޭނާ އެއްވެސް ވަރަކަށް ދެން ނުވިސްނާނެކަމަށްވެސް ބުންޏެވެ. "

އަޝްހަރުގެ ލޮލުން ކަރުނަ އޮހިގަތެވެ. ދެލޯ ފުހުލާފައި  ކުރިޔަށް ދުއްވިއެވެ. މަންމަގެ ފަރާތުން އޭނާއަށް އެނގިހުރި ވާހަކަތަކާއި ޚައިރާދު ، އަފްޝީންގާތު އެބުނިވާހަކަތަކުން ، ޚައިރާދަކީ ދެން އޭނާއަށް ލިބިދާނެ މީހެއްކަމަކަށް އަޝްހަރަކަށް ނުފެނެއެވެ. ދަރިފުޅަށްޓަކައިވެސް ، އެއްވެސް ޤުރުބާނީއެއްވުމަށް ޚައިރާދު ތައްޔާރެއްނޫނެވެ.

(ނުނިމޭ)

ނޯޓް: މި ވާހަކަ ދެން ޝާއިއުކުރަމުން ގެންދާނީ ކޮންމެ އާދީއްތަ ދުވަހަކުއާއި އަންގާރަ ދުވަހަކުއާއި ބުރާސްފަތި ދުވަހަކުއެވެ.